خالايىق ، سىلەر خەلق ئۈچۈن ئىشلەش دېگەننىڭ نېمە ئىكەنلىگىنى بىلەمسىلەر ؟! سىلەر خەلق ئۈچۈن نېمە قىلىپ بىرەلىدىڭلار ...؟ خەلق مەڭگۈ خوجايىن ، ئەمەلدارالار مەڭگۈ چاكار . مانا بۇ بۇ ئىبارە بىزنىڭ x ئىدارە باشلىقىغا تازا ماس كىلىدۇ . پەقەت مېنىڭ مۇشۇ باشلىقىملا ھەقىقى چاكارلارنىڭ ئۈلگىسى . راست ، ئۇ كەچتە ئۇخلىمايدۇ ، چۈنكى تۇغۇلىشىدىنلا ئاقكۆڭۈل ، رايىش بولغاچقا بۇرادەرلەرنىڭ ئۆزى ئۈچۈن تەييار قىلىغان سۆرۈنلىرىغا داخىل بولماسلىقتىن خىجىل بولىدۇ . چۈنكى ئۇنىڭ يۈرىگى تاش ئەمەستە ... باشقىلارنىڭ ياخشى كۆڭلىنى يەردە قويۇش سىپى ئۆزىدىن كىبىر بولماي نېمە ؟! ئۇكۈندۈزلىرى ۋاقتىنى ئاساسەن ئۇخلاپ ئۆتكۈزىدۇ ، چۈنكى خەلققە ئەڭ يۇقىرى چەكتە ، جان دىل بىلەن خىزمەت قىلىش ئۈچۈن سالامەتلىك بەك مۇھىم ، بۇنى دېمىسەممۇ ھەممىڭلارغا ئايان . دېمەك بىزنىڭ بۇ رەھبەر خەلق ئۈچۈن ئۇخلايدۇ . سىلەر بەلكىم ئۇنىڭ كۈندە تۆت ۋاق تاماق يەۋاتقىنىنى ، يەنە كېلىپ ئاشقازىنىنىڭ گۆشكە خۇمار بولۇپ قىلىپ ، گۆشى ئىستىمال قىلىنىدىغان ھايۋانلارنىڭ باشلىقنى كۆرسە قاچىدىغان بولۇپ قالغانلىقىنى كۆرگەن بولىشىڭلار مۈمكىن . ئەجەبا 100 كىلودىن ئىشىپ كەتكەن سىمىز قوساق ، كۆتەكتەك بەدەنگە ئۇنچىلىك يەپ - ئىچىش نورمال ئىشنىڭ ئىچىدىكى ئەڭ نورمال ئىش ئەمەسمۇ ؟! جان - جانىۋارلارنىڭ قېچىشى ئۆزىنىڭ ئىشى ... كىم ئۇلارنىڭ گۆشىنى تاتلىق بولۇپ قالسۇن دەپتۇ ...باشلىقىم جان - جانىۋارلارنى يېگەن بولسا ، ئەلۋەتتە ئىكئولگىيىلىك تەڭپۇڭلىقنىڭ بۇزۇلۇپ كەتمەسلىگىنى مەقسەت قىلغان بولىشى مۈمكىن ، چۈنكى رىئاللىقنىڭ بىر قانۇنىيىتى بار . ئۇبولسىمۇ،
» ئاجىزلار شاللىنىش كۈچلۈكلەر تاللىنىش « ...

ھەرقايسىڭلارنىڭ مېنىڭ بۇ سۆيۈملۈك رەھبىرىمگە يامان كۆزدە قارىشىڭلارغا چىداپ بولالمايمەن . مەن باشلىقىمنىڭ يوشۇرۇن تۇتىۋاتقان ئۆيىنىڭ بارلىقىنىمۇ بىلىمەن . باشقىلاردىن سوۋغات قۇبۇل قىلىۋاتقىنىنىمۇ بىلىمەن . سىلەر بۇنى ئاشنا ئويناش ، پارا يېيىش دەپ تولىمۇ سەت نام بىلەن ئاتايسىلەر ... ئەمما مېنىڭ باشلىقىم سىلەرنىڭ بۇنداق تۆھمەتلىرىڭلارغا پەرۋا قىلماي ، يەنىلا توغرا يولىدا دادىل قەدەملەر بىلەن ماڭماقتا . باشلىقىمنىڭ يۈرۈگىدە خەلقتىن ئىبارەت بۇ خوجايىنلارغا ئالاھىدە مۇھەببەت ئۇرغۇپ تۇرىدۇ .شۇڭا بىزنىڭ بۇ يەردە خەلق بانكىسى ، خەلق يولى ، خەلق تاللا بازىرى ، خەلق مەيدانى ، خەلق ئوبورنىخانىسى ۋە يەنە نۇرغۇن خەلق مەنپەتىنى چىقىش قىلغان ئورۇنلار ، سانىنىڭ كۆپلىگى ۋە ۋىۋىسكىسىنىڭ چىرايلىقلىغى بىلەن سىزنى ھەيران قالدۇرىدۇ . لېكىن مانا مۇشۇ ئورۇنلاردىن نورمال بەھرىمەن بولۇش ئۈچۈن سىزدە خەلق پۇلى بولىشى كېرەك ، ئەگەر يوق بولسا باشلىق چوقۇم بىيىشنىڭ ئەڭ ياخشى نەزەرىيىۋىي ئۇسۇلىنى سىزگە دەپ بېرىدۇ . مەن بۇ يەردە باشلىقىمنىڭ ھىيت - ئايەملەردە ، تۈرلۈك خاتىرلەش كۈنلىرىدە ، كۈنلۈك نورمىسىنى تاپالماي ، يەر قاتتىق ، ئاسمان يىراق بولۇپ ، خۇداغا نالە قىلىپ كۈن ئۆتكۈزىۋاتقانلارغا ، بەش كىلو ماي ، بىر خالتا ئۇن ۋە ئەللىك يۈەنلىكتىن ئۈچ تۆتنى بىرىپ ،قانچىلىك خوشال قىلىۋەتكەنلىگىنى ، بۇ مۇناسىۋەت بىلەن تېلىۋىزۇرلاردا قانچە قېتىم تەشۋىق قىلىنىپ بازارغا سىلىنغانلىقنى ھەرگىز دېمەيمەن . چۈنكى بۇنداق قىلسام ، كۆز - كۆز قىلىپ قويغان بولىمەن . چۈنكى ياخشىلىق قىلغان ئىكەنمىز ، ئۇنى خەلقى ئالەمگە سازاىي قىلىشىمىزنىڭ ھاجىتى يوقتە ... بۇنى سىلەرمۇ بىلىسىلەر ... (تەھرىرلىگۈچى:admin ئەسەر ئورتاقلاشقاندا مەنبەنى ئۇنۇتماڭ.)