بۇنداق گەپلەر ئىزدىنىشتا مودا بولۇپ تۇرىدۇ. بۇ قېتىمقى مودا سۆز ‹‹سەكسىي›› بوپتۇ. ئالدىنقىسى ‹‹ بىز مۇشۇنداق چاكىنلىشىمىز›› ئىدى.



مەنمۇ بۇلتۇر جىجاپ قويۇپ بلوگىمدا ئىلان قىلمىغان ساياھەت خاتىرەمدىمۇ ئۈرۈمچى قىزلىرىنى سۈپەتلىگەندە ئىشلىتىپتىكەنمەن سېكسىي دېگەن سۆزنى. لىكىن ئىشلىتىپ بولۇپلا بىر خىل بىئارام بولۇپ قالغان ئىدىم.



ئەسلى بۇ قېتىمقى سەپەردە ئۈرۈمچىدە 5-6 كۈن تۇرۇپ ئاندىن غۇلجا تەرەپلەرگە ئۆتمەكچى ئىدىم. بۇ قېتىمقى ساياھەت پىلانىمدىن خەۋىرى بار كونا خىرىدارلىرىم ۋە 80خالتا بلوگىنىڭ قىزغىن ئىشتىراكچىلىرىدىن بولغان تورداشلار ئۈرۈمچىدىكى ۋاقتىمدا مەن بىلەن كۆرۈشكىسى بارلىقىنى ئېيتىپ ئۇچۇر يوللاشتى. مەن ھەر بىر ئۇچۇر يوللىغۇچىغا ئىمكان بار ۋاقىت ئورۇنلاشتۇرۇپ كۆرۈشىدىغانلىقىمنى ئېيتىپ جاۋاپ قايتۇرغان بولساممۇ ئۈرۈمچىدە ئاران ئىككى كۈنلا تۇرالىدىم. ئۈرۈمچىدە تۇققانلارنى يوقلاپ، مىھمان بولۇپ دېگەندەك ئالدىراش يۈرۈپ ماڭا ئالدىن ئۇچۇر قىلغان خىرىدارلاردىن 2-3 بىلەن كۆرۈشەلىگەندىن باشقا كۆپلەر بىلەن ئۇچرىشىشقا ۋاقىت چىقىرالمىدىم. ئانام، ئايالىم ۋە ئوغلۇم بولۇپ تۆتىمىز ماڭغان بۇ ساياھەت ۋە تۇققان يوقلاش پىلانىدا مەم كۆپچىلىككە بويسۇنۇشقا مەجبۇر بولۇپ قالدىم. تۇققانلارنىڭ مىھماندارچىلىقىدىن قۇتۇلۇپ سەپەرنىڭ ھاردۇقىنى چىقىرىش ئۈچۈن بىر ساۋاقدىشىمنىڭكىگە بارماقچى ئىدىم، كەچ قالسام قونۇپ قىلىشىم مومكىن دەپ قويۇپ مىھمانخانىغا چۈشتۈم. تۇققانلار ھەر قانچە ياخشى كۈتىۋىلىشقا تىرىشقان بىلەن مىھمانخانىدا ياتقاندەك ئازادە بولغىلى بولمايدىكەن. ئەتىسى ئەتتىگەندە مىھمانخانا زالىدا كىلىشىپ قويغان خىرىدارلىرىم بىلەن ئۇچرىشىپ، ئىشىمنى تۈگۈتۈپ سىرتقا چىقتىم. ئۈرۈمچىنىڭ كوچىلىرىدا ئادەم بالدۇرقىدەكلا كۆپ ئىدى، قىز-ئاياللارنىڭ مودىلىشىپ ، جەلىپلىك كىيىنىشى مەن كۆرگەن 3-4 يىل بۇرۇنقى ئۈرۈمچىدىن تېخىمۇ يۇقۇرى كۆتۈرلۈپ، ئۆزىنىڭ ئاياللىق بەلگىلىرىنى تېخىمۇ رۇشەن گەۋدىلەندۈرۈش ئۈچۈن كىيىم-كېچەك ، چاچ پوسۇن، گېرىم دېگەندەكلەردە رەسمى سېكسىيلىشىپتۇ* .



ئېنگىلىزچە – ئۇيغۇرچە لۇغەت: sexy – مودا، جەلپ قىلارلىق، جىنسىي ھەۋەسنى قوزغايدىغان.



ياشلار باغچىسى ئالدىدا دورا-دەرمەك دۇكىنى ئاچقان ياسىنجان بىلەن كۆرۈشۈپ ئۆتەي دەپ 14-ئوتتۇرا مەكتەپ ئالدىدىن ئۆتۈپ كېتىۋېتىپ مەكتەپ دەرۋازىسىدىن چىقىپ ياشلار باغچىسى تەرەپكە قاراپ ماڭغان 4-5 نەپەر قىز-يېگىت ئوقۇغۇچىلار دىققىتىمىنى تارتتى. بۇ بالىلارنىڭ كېيىملىرىمۇ شۇنداق مودا ئىدى. لىكىن نىمىلا بولمىسۇن بۇلارنىڭ قولىدا كىتاب بار ئىدى.

ياسىنجان بىلەن ئۇچرىشىپ قايتاشىمدا بالامنى يىتىلەپ ياشلار باغچىسىنىڭ يېنىدىن ئۆتۈپ كىتىۋاتقۇچە 14-ئوتتۇرا مەكتەپتىن چىققان ھىلىقى ئوقۇغۇچىلارغا كۆزۈم چۈشۈپ قالدى. باغچىنىڭ بۇلۇڭىدا قولىدا كىتاب كۆتۈرىۋالغان، كېيىنىشى ئالامەت سېكسىي بىر قىز ساۋاقداشلارنىڭ ئالدىدا تاماكىسىنى شوراپلا ئوغۇل ساۋاقدىشىنىڭ يۈزىگە پۇۋلىدى…. ئەزەلدىن كىتاب ئوقۇيدىغان، ئالىي ئوقۇللاردا ئوقۇيدىغانلارغا بۆلەكچە ھەۋەس قىلاتتىم. بۇ قىتىم كونا ھەۋەس بىلەن ئۇشۇ ئۆسمۈر ئوقۇغۇچىلارغا لەپپىدە قاراپ سالغانلىقىم ئۆزىلا ماڭا بىر خىل خورلۇق تۇيۇلۇپ كەتتى. ئىلگىركى ھاياجان ۋاقىتلىرىم بولغان بولسام بۇنداق بىر كۆرۈنۈش ئۈچۈن نۇرغۇن ئەلەم تارتىپ، دەرت يۇتۇپ نەچچە كۈن ئۇيقۇم كەلمەس بولغىيتتى، ئىسىت مىللەت ئانىلىرى، مىللەتنىڭ گۈللىرى…دەپ چوقۇم يېغا تۇتاتتى. لىكىن بۇ قىتىم بۇنىڭغا ئوخشاش كۆرۈنۈشلەرنى كوچىلاردا تولا كۆرۈپ كۆنۈپ قالدىم بولغاي بەك ۋايىم يەپ كەتمىدىم. ئاچا-سىڭىللىرىمىزغا شەرمى-ھايا تىلەيمەن.



ئايال-باللىرىمنى ئىلىپ سۇ ئۈستى باغچىسىغا ئىلىپ باردىم. ئۇياق-بۇياقنى ئايلانغاچ بىر-ئىككى پارچە سۈرەت تارتىپ قويدۇم.



كۆل بويىدىكى شۇنچە ئۇز ئىچىلىپ كەتكەن ‹‹گۈل چاي›› غا مەستلىكىم كىلىپ سۈرەت تارتاي دەپ ئاپاراتنى توغۇرلاۋاتسام يان تەرەپتە ئولتۇرغان بىر-ئىككى سىتۇنېت قىز ھەييارلىق قىلىپ ‹‹ مانا بىز، بىز بۇياقتا…›› دەپ شەرەت قىلغىلى تۇرۇپتۇ. بوپتۇ كۆڭلۈڭلار يەردە قالمىسۇن، سىلەرنى سۈرەتكە تارتىپ قالسام تورغا يوللاپ سالىمەن، خاپۇمماڭلا دېگەچ بىر پارچە سۈرەت تارتىپ قويدۇم.