تەڭرىگە يېزىلغان خەت [ئەدەبىي تەرمىلەر]

جېك پوچتىخانىدا ئىشلەيتتى . ئۇ ئادرېسى خاتا يېزىلىپ قالغان خەت–چەكلەرنى بىر تەرەپ قىلىشقا مەسئۇل ئىدى . بىر كۈنى بىر پارچە خەت ئۇنىڭ ئۈستىلىگە قويۇلدى. بۇ بىر موماينىڭ تىترەپ تۇرغان قوللىرى بىلەن يازغان خېتىدەك قىلاتتى، كونۋېرت ئۈستىگە ‹‹تەڭرىگە تەگسۇن›› دەپ يېزىقلىق ئىدى. جېك خەتكە ئىنتايىن قىزىقتى ۋە ئېچىپ كۆرۈپ، نېمىلەر يېزىلغانلىقىنى بىلمەكچى بولدى. شۇنىڭ بىلەن ئۇ كونۋېرتنى يىرتىپ، خەتنى ئوقۇشقا باشلىدى:

‹‹قەدىرلىك تەڭرىم، مەن بۇ يىل 83 ياشقا كىردىم، ئىگە – چاقىسىز، باش – پاناھسىزمەن. ھەر ئايدا ئازغىنا كۈتۈنۈش سۇغۇرتىسى ئېلىپ تۇرمۇش كەچۈرىمەن. بىراق كىشىنى غەزەپلەندۈرىدىغىنى، تېخى تۈنۈگۈنلا بىر ئۆلگۈر ئوغرى ھەميىنىمنى ئوغرىلاپ كەتتى، ھەمياندىكى 100 دوللار مېنىڭ بارلىق مال – دۇنيارىم ئىدى. ھازىر مەن بىر تىيىنىمۇ يوق گاداي بولۇپ قالدىم، ئەمدى كېلەر قېتىملىق كۈتۈنۈش سۇغۇرتىسىنىڭ تارقىتىلىشىنى ساقلىماقتىن باشقا چارەم قالمىدى.

بىراق كېلەر ھەپتىلا مىننەتدارلىق بايرىمى ، مەن تېخى ئىككى دوستۇمنى ئۆيۈمگە تاماققا تەكلىپ قىلىپ قويغان ئىدىم . ھازىر پۇلۇم يۈتۈپ كەتتى. نەرسە – كېرەك سېتىۋېلىپ ئۇلارنى كۈتەلمەيدىغان بولدۇم. مېنىڭ بالا –چاقام يوق، بىرەر تۇغقىنىممۇ يوق، سىز مېنىڭ بىردىنبىر ئۈمىدىم، ماڭا ياردەم قىلىشىڭىزنى سورايمەن››.

جېك خەتتىن چوڭقۇر تەسىرلىنىپ ، ئۇنى باشقا خىزمەتداشلىرىغىمۇ كۆرسەتتى. كۆپچىلىك خەتنى كۆرۈپ بولغاندىن كېيىن، مەسلىھەتلىشىۋالغاندەكلا پورتماللىرىدىن ئازراقتىن پۇل چىقىرىشىپ جېكقا تۇتقۇزدى، جېك بىردەمدىلا 96 دوللار ئىئانە يىغىۋالدى. ئۇ پۇلنى كونۋېرتقا سېلىپ، ھېلىقى مومايغا ئەۋەتىپ بەردى. جېك ۋە خىزمەتداشلىرى ئۆزلىرىنىڭ ساۋابلىق ئىش قىلغانلىقلىرىدىن كەيپى تولىمۇ خۇشۋاق ئىدى.

بايرام ئۆتۈپ كەتتى ، ھېلىقى موماي تەڭرىگە يەنە بىر پارچە خەت يازغان بولۇپ ، خىزمەتداشلار بىر يەرگە يىغىلىپ خەتتە نېمىلەر يېزىلغانلىقىنى بىلمەكچى بولۇشتى . جېك خەتنى ئېچىپ ئوقۇشقا باشلىدى : ‹‹قەدىرلىك تەڭرىم ، سىزنىڭ مەن ئۈچۈن قىلىپ بەرگەنلىكىڭىزگە قانداق رەھمەت ئېيتىشنى بىلەلمەيۋاتىمەن. چۈنكى سىزنىڭ ھىممىتىڭىزدە دوستلىرىمنى مەززىلىك تاماق بىلەن كۈتۈۋالدىم. ئۇ كۈنى بىز تولىمۇ خۇشال بولدۇق، دوستلىرىمغا بۇلارنىڭ سىزنىڭ ماڭا قىلغان سوۋغىڭىز ئىكەنلىكىنى ئېيتىپ بەردىم . بۇلارنى سۆزلەۋېتىپ سىزگە يەنە بىر ئىشنى ئېيتقۇم كېلىۋاتىدۇ. كونۋېرتتا تۆت دوللار كەم تۇرىدۇ، مېنىڭچە بۇنى چوقۇم پوچتىخانىدىكى ئاشۇ بىر نېمىلەر ئوغرىلاپ كەتكەن گەپ››.
خالىدە ئوسمان تەرجىمىسى
مەنبە:مەرىپەت تورى