تاغدىن-باغدىن پاراڭ سىلىشمايلىما! [تاغدىن-باغدىن]

پاراڭ سىلىشمايلىما؟!!

ئىككى كۈن بولدى ئادەمدە تاقەت قويمىغۇدەك ھاۋا ئىسسىپ كەتكىلى. بۇ يىل قەشقەرنىڭ ھاۋا كىلىماتىدا ئۆزگىرىش چوڭ. مۇشۇ ئىككى كۈن بولغۇچە ھاۋا كۈندە نەچچە خىل ئۆزگىرەپ تولا يامغۇر يېغىپ چاپان سالغۇزمىدى. كىشىلەرنىڭ سەزگۈرلىكى ئىشىپ سىرتقا چىقسىلا كۈنلۈك كۆتۈرىۋالىدىغان ھالەت شەكىللەندى. شەھەر ئەتراپىدىكى يېزىلاردا  دىھقانلارنىڭ بالدۇر پىشىدىغان چىلگە قوغۇنلىرىمۇ مۇشۇ خىل غەلىتە كىلىمات سەۋەبىدىن بالدۇرلا پىلەكلىرى سارغىيىپ قۇرۇپ تۈگەپتۇ. بەزى تەجىربىلىك دېھقانلارنىڭ سۆزلىرىگە قارىغاندا يامغۇرنىڭ ئاچچىق سۈيى قوغۇن پىلەكلىرىنىڭ قۇرۇپ كېتىشىگە سەۋەب بولغان ئاساسلىق ئامىل ئىكەن. 3 -4 مو يەرگە قوغۇن تېرىغان كىشىلەرنىڭ كەيپىياتى خىلىلا تۆۋەن. قوغۇن تېرىسا چىقىم كۆپ كېتىدىغان، ئەمگەك كۈچى ئۇندىن ئىشىپ كېتىدىغان جاپالىق بىر جەريان. بۇ ھال دېھقانلارغا ھەقىقەتەنمۇ ئېغىر تۇيۇلىدۇ. <<قانداق قىلىمىز، يالغۇز بىزنىڭ چىلگىلەرلا قۇرۇپ تۈگەپتىكەنمۇ، قالغىنىغا خۇدايىم بار، بۇ ئاي، بۇ كۈنلەردە خۇدايىم كىمنى ئاچ قويۇپتىكەن، ھەممە ئەدەمنىڭ شۇنداق>>، دەپ ئۆزلىرىگە تەسەللى بىرىشىدۇ.
ئىككى كۈن بولدى ئادەمدە تاقەت قويمىغۇدەك ھاۋا ئىسسىپ كەتكىلى.
ئىچىم قىززىپ كەتكەندەك بولۇپ ئىچكىدەك مۇزدەك بىرنەرسە يوق، قارىسام دۇكاندارنىڭ مۇزلاتقۇسىدا پەپسى كولا سەل سوغۇقراق ئىكەن. ماۋۇنى ئىچەيمۇيا دېسەم دۇكاندار سىلى بۇنى ئىچسىلە بولمايتتى، دەپ كۆزۈمگە مەنىلىك قاراپ قويدى. <<موللىنىڭ دېگىننى قىل، قىلغىننى قىلما >> دېگىنى مۇشۇمىكى يا، بۇنى ئىچكىنىم بىلەن مىجەزىمنى قانداق تەڭشەشنى ئۆزۈم بىلىمەن دەپ كۈلۈپ قويۇپ بىرنى ئىچىپ قويدۇم. بلوگىمدا باشقىلارغا ئانچە - مۇنچە ساغلاملىق ھەققىدە مەسلەھەت بىرىپ تۇرغاچقىمىكىن، ئەتراپىمدىكى تورغا چىقىپ تۇرىدىغان بەزى كىشىلەر تەبئىي ھالدا مېنىڭ ئوزۇقلىنىشمغا. يۈرۈش-تۇرۇشۇمغا دېققەت قىلىدىغان ئەھۋاللارنى ھېس قىلىپ تۇرىمەن. ئۆتكەندە تاماقخانىدا باچكا شورپىسى ئىچىپ ئولتۇرسام بىر ياش يېنىمدىن ئۆتۈپ كېتىۋاتقاچ << سىلى باچكا شورپىسى ئىچكەنگە قارىغاندا ، بەك پايدا قىلامدۇ نېمە بۇ؟!!>> دەپ سورىۋېدى، سىلىمۇ ئىچىپ قويسىلا، سوغۇقنى ئالىدۇ، ئاشقازان، بۆرەكنى قۇۋۋەتلەيدۇ دەپ قويدۇم.
بەزىدە مايلىق تاماق يەپ سالغان بولسام ئانچە-مۇنچە تۇرۇپنى كۆپرەك سىلىپ لەڭپۇڭ يەپ قويىمەن. مېنى لەڭپۇڭخانىدا كۆرۈپ قالغان لەڭپۇڭغا ئامراق بەزى تورداشلار << تېۋىپمۇ لەڭپۇڭ يەمدا، سىلى لەڭپۇڭ يېگەنگە قارىغاندا بىزمۇ يەپ قويساق زىيان قىلماس ھە! >> دەيدۇ. سىلى تېۋىپ ئەمەس تۇرۇپمۇ لەڭپۇڭ يەيدىكەنسىلە ئەمەسما. مەنغۇ تەڭشەپ تۇرۇپ يەيمەن، دەيمەن. ئىشقىلىپ سىلە باچكىخانىنىڭ بازىرىنى چىقىرىپ لەڭپۇڭ-راڭپىزا، سوغۇق ئىچىملىك ساتىدىغانلارغا زىيان سىلىۋاتىلا جۇما ، ئۇلار ئۈستىلىرىدىن ئەرىز قىلمىسۇن يانا، دەپ چاقچاق قىلىدىغانلارمۇ بار. شۇ ئەشۇلار ئەرز قىلىپ قالمىسۇن دەپ -ئاز بولسىمۇ زېيىنىنى يەڭگىللىتەي دەپ سوغۇق ئىچىملىك ئىچىپ بەزىدە لەڭپۇڭمۇ يەپ قويىمەن مانا دېسەم سىلىگە گەپ تېپىپ بەرگىلى بولمىغۇدەك زادى دېيشىدۇ. ئابدىكىرىم ئابلىزدەك << قۇرۇپ كەتكەن دەريانىڭ سۈيى>> نىلا ئىچىپ ياشىغىلى بولمايدۇ. قېتىق بىرسىگە پايدا قىغان بىلەن بەزىلەرگە زەرەر قىلىشى مومكىن. ھەر كىم ئۆز مىزاجىغا لايىق غىزالىنىشى، مىزاجىنى بۇزىدىغان، سالامەتلىكىگە زەرەر يەتكۈزىدىغان يېمەك-ئىچمەكلەردىن ئۆزىنى تارتسا نۇرغۇن كېسەللىكلەرنىڭ ئالدىنى ئالالايدۇ. بەزىدە سوغۇق سۇ، لەڭپۇڭ، قېتىقمۇ دورا بولۇپ قالىدۇ. ھەر نەرسە ئۆز ۋاقتى، ئورنىنى تاپقاندا ئاندىن ئۇنىڭ قىممىتى بولىدۇ.
ھاۋا بەك ئىسسىق، تۈنۈگۈن ئىسسىقلىق چاي دەملەپ تەرلەپ ئولتۇرۇپ بىر قانچە چەينەك چاي ئىچىۋېتىپتىمەن. شۇنچە ئىسسىق بولسىمۇ ئاشۇ دورىلىق چاينىڭ تەسىرىدىن كۆڭلۈم پەقەتلا سوغۇقلۇق تارتمىدى. كەچقۇرۇنمۇ ئۇسسىماپتىمەن. ئادەم چىدىماسلىق قىلىپ دوغ ۋە باشقا سوغۇق ئىچىملىك ئىچىپ قويسا ئۇسسۇلۇقىنى بىسىش تۈگۈل بەدەنلىرى بوشاپ، ئۇيقۇدىن باش كۆتۈرەلمەي قالىدىكەن. بەزىدە قايناق سۇنى سوۋۇتۇپ قويۇپ بىر-ئىككى قوشۇق ھەسەل سىلىپ ئىچىپ قويىمەن. بۇمۇ ئۇسسۇلۇقنى ئوبدانلا باسىدۇ. كەيپىياتىم جانلىنىپ تېتىكلىشىپ قالىمەن.
يەنە ھاۋا تۇتىلىۋاتىدۇ، ھىلىغىچە يامغۇر ياغارمىكىن...