TechWeb تورىنىڭ بېيجىڭ ۋاقتى 3-ئاينىڭ 31-كۈنىدىكى خەۋىرىگە ئاساسلانغاندا، شىنلاڭ مىكرو بىلوگى بىلەن تېڭشۈن مىكرو بىلوگى بۈگۈن ئەتىگەندە ئايرىم -ئايرىم ھالدا مۇنۇلارنى ئېلان قىلغان:«3-ئاينىڭ 31-كۈنى چۈشتىن بۇرۇن سائەت 8:00 دىن 4-ئاينىڭ 3-كۈنى چۈشتىن بۇرۇن سائەت 8:00 گىچە بولغان ۋاقىتتا مىكرو بىلوگنىڭ پىكىر بېرىش ئىقتىدارى يېقىندىن بىرى مىكرو بىلوگدا كۆپ كۆزگە كۆرۈلگەن ئىغۋا تارقىتىش قاتارلىق قانۇنسىز ۋە زىيانلىق ئۇچۇرلار سەۋەبىدىن تاقىلىدۇ».
ئىككى تەرەپنىڭ بىلدۈرۈشىچە، بۇ قېتىم ئۇلارنىڭ قانۇنسىز ۋە زىيانلىق ئۇچۇرلارنى تازىلىشى كەڭ دوستلارغا تېخىمۇ ياخشى بولغان پىكىر ئالماشتۇرۇش مۇھىتى ھازىرلاپ بېرىش ئىكەن.
تۆۋەندىكىسى شىنلاڭ مىكرو بىلوگىنىڭ باياناتى:
مىكرو بىلوگ ئەزالىرى:
يېقىندا مىكرو بىلوگىدا ئىغۋا تارقىتىش قاتارلىق قانۇنسىز ۋە زىيانلىق ئۇچۇرلار ئاۋۇپ قالدى. بىز بۇلارنى تازىلاش ئۈچۈن، 3-ئاينىڭ 31-كۈنى چۈشتىن بۇرۇن سائەت 8:00 دىن 4-ئاينىڭ 3-كۈنى چۈشتىن بۇرۇن سائەت 8:00 گىچە بولغان ۋاقىت ئىچىدە مىكرو بىلوگنىڭ پىكىر بېرىش ئىقتىدارىنى تاقىماقچى. بىز بۇ ئۇچۇرلارنى تازىلاپ بولغاندىن كېيىن، پىكىر بېرىش ئىقتىدارىنى ئېچىۋېتىمىز. بىزنىڭ بۇ ئۇچۇرلارنى تازىلاشتىكى مەقسىتىمىز كۆپچىلىككە تېخىمۇ ياخشى پىكىر ئالماشتۇرىدىغان مۇھىت ھازىرلاپ بېرىشتۇر، كەڭ ئابونتلارنىڭ توغرا چۈشىنىشى ۋە كەچۈرۈشىنى سورايمىز».
شىنلاڭ مىكرو بىلوگ
2012-يىلى 3-ئاينىڭ 31-كۈنى
تۆۋەندىكىسى تېڭشۈن مىكرو بىلوگىنىڭ باياناتى:
ئابونت دوستلار:
يېقىنقى مەزگىللەردە،  ئىغۋا تارقىتىشتەك قانۇنسىز، زىيانلىق ئۇچۇرلار مىكرو بىلوگ ئارقىلىق تارقىلىپ، يامان ئىجتىمائىي تەسىر پەيدا قىلدى. شۇڭلاشقا تور بېكىتىمىز 3-ئاينىڭ 31-كۈنى چۈشتىن بۇرۇن سائەت 8:00 دىن 4-ئاينىڭ 3-كۈنى چۈشتىن بۇرۇن سائەت 8:00 گىچە بولغان ئارىلىقتا مىكرو بىلوگقا پىكىر يوللاش ئىقتىدارىنى تاقاپ، بۇ خىلدىكى ئۇچۇرلارنى يىغىپ بىر تەرەپ قىلىشىنى قارار قىلدى. شۇ سەۋەبلىك سىلەرگە قۇلايسىزلىق ئېلىپ كەلگەن بولساق، چۈشىنىشىڭلارنى سورايمىز.

تېڭشۈن تورى
2012-يىلى3-ئاينىڭ 31-كۈنى