نېلۇپەر قاسىم خەۋىرى: ئاپتونوم رايونلۇق سودا – سانائەت مەمۇرىي باشقۇرۇش ئىدارىسى، ئىستېمالچىلار جەمئىيىتى 1 – مارت بۇ يىللىق ‹‹15 – مارت ئىستېمالچىلارنىڭ ھوقۇق – مەنپەئىتىنى قوغداش كۈنى››نى تەشۋىق قىلىش، مەسلىھەت سوراش مۇلازىمەت ئېيى پائالىيىتى توغرىسىدا ئاخبارات ئېلان قىلىش يىغىنى ئېچىپ، ‹‹ئىستېمال ۋە بىخەتەرلىك›› ئاساسىي تېما قىلىنغان 2012 – يىللىق تەشۋىقات پائالىيىتىنىڭ مۇقەددىمىسىنى باشلىدى.
    ‹‹ئىستېمال ۋە بىخەتەرلىك›› باش تېمىسى، ئاساسلىقى كارخانىلارنىڭ ئىستېمالچىلارنىڭ ھوقۇق – مەنپەئىتىنى قوغداش ئېڭى ۋە سەۋىيەسىنى ئۆستۈرۈپ، بىخەتەر مەھسۇلات ئىشلەپچىقىرىش، بىخەتەر مۇلازىمەت بىلەن تەمىنلىش، بىخەتەرلىك يوشۇرۇن ئاپەتلىرىنىڭ ئالدىنى ئېلىش ۋە ئازايتىشىغا تۈرتكە بولۇپ، ئىستېمالچىلارنىڭ ئىستېمال جەريانىدىكى جىسمانىي ھوقۇقى ۋە مال – مۈلۈك ھوقۇقىنىڭ زىيانغا ئۇچرىماسلىقىغا كاپالەتلىك قىلىش؛ بايلىق تېجەش ۋە مۇھىت ئاسراش ئېڭىنى كۈچەيتىپ، مۇھىت بىخەتەرلىكىگە كاپالەتلىك قىلىپ، ئىستېمالچىلارنىڭ ئۇزاق مەزگىللىك مەنپەئىتىنى قوغداش؛ ئۈنۈملۈك تەدبىر قوللىنىپ، ياشانغانلار، بالىلار، دېھقانلار قاتارلىق ئاجىزلار توپىنى قوغداشقا ئالاھىدە ئەھمىيەت بېرىپ، ئۇلارنىڭ بىخەتەرلىكى، ھوقۇق – مەنپەئەتىگە كاپالەتلىك قىلىش؛ ئىلمىي، مۇۋاپىق ئىستېمال قارىشىنى تۇرغۇزۇپ، بىخەتەر ئىستېمال مۇھىتى يارىتىپ، ئىستېمالچىلارنىڭ بىخەتەرلىكى ۋە ھوقۇق – مەنپەئىتىنى تېخىمۇ ئوبدان كاپالەتكە ئىگە قىلىشتەك مەزمۇنلارنى ئۆز ئىچىگە ئالىدۇ.
    ئاخبارات ئېلان قىلىش يىغىنىدا ئاپتونوم رايونىمىزدىكى ھەر دەرىجىلىك سودا – سانائەت مەمۇرىي باشقۇرۇش ئورگانلىرى ۋە ئىستېمالچىلار جەمئىيەتلىرىدىن بۇ يىللىق ئاساسىي تېمىنىڭ مۇھىم ئەھمىيىتى ۋە رولىغا بولغان تونۇشنى چوڭقۇرلاشتۇرۇپ، مەسئۇليىتىنى ئوبدان ئادا قىلىپ، خىزمەتلەرنى ئىنچىكە ئورۇنلاشتۇرۇپ، ھەقىقىي چىڭ تۇتۇپ ياخشى ئىشلەش تەلەپ قىلىندى.