ئەي، مىللەتنىڭ ئائىلىدىكى ۋەكىلى بولغان ئەر، شۇنى بىلگىنكى، بىلىم تەس، بىلىمسىزلىك ئۇنىڭدىنمۇ تەس. تەقۋادارلىق قىيىن، گۇناھكارلىق ئۇنىڭدىنمۇ قىيىن. چۈنكى، بىلىمسىزلىك ۋە گۇناھكارلىقنىڭ ئاقىۋىتى پالاكەتتۇر، گۇناھ ۋە ھارامدىن ساقلانغانلارنىڭ بولسا يولۇققان قىيىنچىلىقلىرىنى يېنىكلىتىش، مۈشكۈللەرنى ئاسانلاشتۇرۇشقا كېپىللىك قىلىدىغان بىر يۈرۈش قوغدىغۇچىلىرى بار. گۇناھ ۋە ھارامدىن ساقلانغانلار بۇ دۇنيادا ياخشى مەدھىيلەرگە ئېرىشكىنىدەك، ئاخىرەتتىمۇ تۈگىمەس ئەجرىلەرگە ئىگە بولىدۇ. چۈنكى گۇناھ ۋە ھارامدىن ساقلانغۇچىلار ھەر ئىش ۋە ھەر خۇسۇسىنىڭ ھەقىقىتىنى تەھلىل قىلىدىغان، ماھىيىتى ۋە ئىچكى سىرىدىن خەۋەردار بولغان ۋە تەپەككۇر قىلىدىغانلاردۇر.