مەلۇم مەنىدىن ئېيتقاندا، ھاياتلىق ئوكسىدلىنىش – ئوكسىدسىزلىنىش رېئاكسىيەسىدۇر. ئوكسىگېننىڭ كېسەللەرنى قوشۇمچە داۋالاشقا ئىشلىتىلگىنى ئوكسىگېنلىق داۋالاش، دېيىلىدۇ؛ ئېغىر ئاغرىقلار ۋە تاسادىپىي ھادىسىگە ئۇچرىغانلارغا ئىشلىتىلگىنى ئوكسىگېن بېرىپ جىددىي قۇتقۇزۇش، دېيىلىدۇ؛ فىزىيولوگىيەلىك ئوكسىگېن كەملىكنى داۋالاشتا ئىشلىتىلگىنى ئوكسىگېنلىق ساقلىق ساقلاش، دېيىلىدۇ.

    تۆۋەندىكى ئاغرىقلار ئائىلىدە ئوكسىگېن سۈمۈرۈش ئەسلىھەسىنى دوختۇرنىڭ كۆرسەتمىسى بويىچە ئىشلەتسە بولىدۇ:

    1 . يۈرەك، مېڭە قان تومۇر كېسىلىگە گىرىپتار بولغانلار، بولۇپمۇ تاجىسىمان يۈرەك كېسىلىگە گىرىپتار بولغان، مېڭىسىگە قان يېتىشمەيدىغان ياشانغانلار.

    2 . ئۆپكە كېسىلىگە گىرىپتار بولغانلار، مەسىلەن: ئاستا خاراكتېرلىك نەپەس يولى يەللىكى، ئۆپكە فونكسىيەسى تولۇق يېتىلمەسلىك كېسىلىگە گىرىپتار بولغانلار. كېسەلنىڭ تۈرلىرى ئوخشاش بولمىغانلىقتىن، دوختۇرنىڭ ئوكسىگېن ئىشلىتىش كۆرسەتمىسىگە قاتتىق ئەمەل قىلىش لازىم.

    3 . دائىم بېشى ئاغرىيدىغان ياكى بېشىنىڭ يېرىمى ئاغرىيدىغان ئاغرىقلار بېشى ئاغرىسا، ۋاقتىدا ئوكسىگېن سۈمۈرۈپ داۋالانغاندا، كېسەل ئەھۋالى كۆرۈنەرلىك ياخشىلىنىدۇ.

    4 . ئوپېراتسىيە قىلىنغان ئاغرىقلار دوختۇرنىڭ كۆرسەتمىسىدە مۇۋاپىق مىقداردا ئوكسىگېنلىق داۋالانسا، يارىنىڭ تېز ئەسلىگە كېلىشىنى ئىلگىرى سۈرگىلى بولىدۇ.

    5 . ئۇزاق مەزگىل ئولتۇرۇپ خىزمەت قىلىدىغان كىشىلەر مۇۋاپىق ۋاقىتتا ئېقىم مىقدارى تۆۋەن ئوكسىگېن سۈمۈرۈپ بەرسە ۋە ئۆي ئىچىدە مەلۇم ھەرىكەتلەرنى قىلىپ بەرسە، مېڭىنىڭ چارچىشىنى ئۈنۈملۈك پەسەيتىپ، خىزمەت ۋە ئۆگىنىش ئۈنۈمىنى ئاشۇرغىلى بولىدۇ.

    ئومۇمەن، ئائىلىدە ئوكسىگېن سۈمۈرۈشكە ماس كېلىدىغان كىشىلەر كۆپ بولىدۇ، بۇنداقلار دوختۇرنىڭ يېتەكچىلىكى بولمىغان ئەھۋالدا، ئېقىم مىقدارى ۋە قويۇقلۇقى تۆۋەن ئوكسىگېننى سۈمۈرۈپ بەرسە بولىدۇ. ئېقىم مىقدارى مىنۇتىغا ئۈچ لىتىردىن تۆۋەن، قويۇقلۇقى %30 تىن تۆۋەن بولۇش، ئوكسىگېن سۈمۈرۈش ۋاقتى ئەڭ كۆپ بولغاندا ئىككى سائەتتىن ئېشىپ كەتمەسلىكى كېرەك.