ساداقەتمەن بلوگى

版权声明：转载时请以超链接形式标明文章原始出处和作者信息及本声明
logs/40531922.html

ۋاپا ئىزدەپ جاپا چەكتىم جۇدالىق توستى بەختىمنى ،

كۆڭۈل بەرسەم نادانلەرگە چۈشەنمەي كەتتى قەلبىمنى .


تاپارمەن قايسى شادلىقنى ئۆزۈمنى بۇنچىلا خارلاپ ،

پىشانەمگە پۈتۈلگەن ئىش ئەمدى نە قىلاي زارلاپ .


ھاياتقا ئىشەنچىم باردۇر ، ياشاشنىڭ يوللىرى بىرلا ،

كۈرەش قىلماقنى ئىستەيمەن ،ماڭاكى باش پاناھ _ ئاللاھ .


ئۆمۈرنىڭ كۆكىدە نۇرلۇق ئۈمىدنىڭ يۇلتۇزى ئۆچمەس،

بۇ جېنىم بولسىلا تەندە ، ئىرادەم توزۇماس_ تۈگىمەس .



كەلمىدى


تەلمۈرۈپ كۈتتۈم نىگارنى ، بۇ يەرگە نىگار كەلمىدى ،

كۆڭلى ئاق ، تېنى ئىپار ، قەلبى باھار كەلمىدى .


ئىزدىسەم كۆككە بېقىپ زوھرە يۇلتۇزۇم قېنى ،

مامۇق بۇلۇت ئىچرە پەرى، شاد روزىغار كەلمىدى .


كارۋىنىم قىلسا سەپەر غەرب تامان قوقانىگە ،

كۆزلىرىم ئارقىدا قالدى ، خۇش ئىنتىزار كەلمىدى .


تاپمىدىم ئالەم كېزىپ كۆڭلۈمگە ھەمراھ بىر پەرى ،

ھۆر گۈلىدىن گۈل تىزىپ ،قاشىمغا ئۇز يار كەلمىدى .


بۇ زېمىننىڭ تۇپرىقى شور ، سۇلىرى كەتتى سېسىپ ،

بار قەلبىمدە دەرد _ئەلەم ، كۆڭۈلگە ئەسرار كەلمىدى .


مەن يۈرۈپ چۆللەر ئارا يارىمنى ھەر يان ئىستىدىم ،

ۋە لېكىن قالدىم پىراقتا ، روخسى گۈلنار كەلمىدى.

1933-يىل





سەن كىمنىڭ ئوغلىسەن ، ئويلىساڭچۇ ؟



سەن كىمنىڭ ئوغلىسەن ، ئويلىساڭچۇ ،

ئىززىتىڭ ، ھۆرمىتىڭ كەم بولۇرمۇ ؟

كۆكرىكىڭدىن يېنىپ تۇرمىسا ئوتلىرىڭ ،

ئەللىرىڭ ، يۇرتلىرىڭ نۇر بولارمۇ ؟



سەن كىمنىڭ ئوغلىسەن ، ئويلىساڭچۇ ،

ئىززىتىڭ ، ھۆرمىتىڭ كەم بولۇرمۇ ؟

تىغ ئېلىپ ، ئاتلىنىپ جەڭ قىلمىساڭ ،

يۇرتلىرىڭ ، خەلقلىرىڭ ھۆر بولارمۇ ؟

1933-يىل ، فېۋرال



سايرام كۆلى




سايرام كۆلى ئۆزۈڭ كىچىك ، دەردىڭ تولا ،

داۋالغۇيسەن ، ساھىللاردىن تاشالمايسەن .

ئەتراپىڭنى قورشىۋالغاچ ئېگىز تاغلار ،

ئۈمتۈلىسەن ، داۋانلاردىن ئاشالمايسەن .

1921-يىل ، بورتالا


پارچە


سۆيسە سۆيىمەن ،

يەر بىلەن يەكسان بولسا .

سۆيمىسە سۆيمەيمەن ،

مىسىرغا سۇلتان بولسا .

1935-يىلى ماي ، ئاتۇش


 مەنبە ئارمىنىم تورى <مەمتىلى ئەپەندى شېئىرلىرى > دىن