سائادەت ساتتار ئايتۇغ ئەسەرلىرى

版权声明：转载时请以超链接形式标明文章原始出处和作者信息及本声明
logs/68626253.html

ساڭا مىھرىم بىر دەريا قىزىم،
ئۇندا غەمسىز ئۈزۈپ يۈرگەيسەن.
سەن ھاياتقا قالدۇرغان ئىزىم،
يوللىرىمنى داۋام ئەتكەيسەن.

سەن بىلەن تەڭ تۇغۇلغان سىزىم،
كۈچ-ھارارەت بېرەر جىسمىمغا.
سەن بىلەن تەڭ بىخلانغان ھىسىم،
باشلار مىنى ئىللىق ئىقلىمغا.

مىھىر نىمە؟،مۇھەببەت نىمە؟،
تونۇپ يەتتىم گۇڭراشلىرىڭدىن.
ئاھ،!دىللىرىم كەلدى لەرزىگە،
 گاھى كۈلۈپ يىغلاشلىرىڭدىن.

سەن تۇغۇلغان شۇ كۈندىن بېرى،
بەردىڭ ماڭا چەكسىز خوشاللىق.
مىيۇنلىغان ئانىلار كەبى،
تىلەپ كەلدىم ساڭا ئامانلىق.

جېنىم قىزىم بولغىن سالامەت،
ھايا بىلەن تاپقىن كامالەت.
شۇم كۆزلەردىن ساقلىسۇن اللاھ،
نۇسرەت تېپىپ ئۆرلە داۋامەت.