گوگۇل Project Ara يانفۇنى بولسا دۇنيا بويىچە تۇنجى پارچىلىغىلى بولىدىغان يانفۇن ، ئىشلەتكۈچىلەر پۈتۈنلەي ئۆزىنىڭ قىزىقىشى بويىچە يانفۇننىڭ بۆلەكلىرىنى ئالماشتۇرۇپ ئىشلىتەلەيدۇ. بۇ خىل يانفۇننىڭ بارلىق سىرتقى زاپچاسلىرىنى خۇددى باتارىيەنى ئالماشتۇرغاندەك چىقىرىپ ئالماشتۇرغىلى بولىدۇ . مەسىلەن ، ئاپىرات بېشى، ياڭراتقۇ، زەرەتلەش ئېغىزى ، ھەتتاكى ئاساسىي ئېكراننىمۇ ئالماشتۇرۇپ ئىشلەتكىلى بولىدۇ.

كالىفورنىيە شىتاتىدىكى گوگۇل باش شىتاتىدا ئۆتكۈزۈلگەن Project Ara پروگراممىرلىرى يىغىنىدا بۇ تۈرنىڭ باش نازارەتچىسى پاۋلو كەلگۈسىدە بازارغا سېلىنىدىغان ئىككىنجى ئەۋلاد Project Ara يانفۇنىغا مۇناسىۋەتلىك بەزى ئۇچۇرلارنى ئاشارىلىدى ، ئىككىنجى ئەۋلاد يانفۇن كەلگۈسىدە ئىككى مەركىزىي بىرتەرەپ قىلغۇچ بۆلىكى قوللىنىدۇ ، بىرسى Rockwell يەنە بىرسى NVIDIA K1 ، ئېكراننىڭ ئېنىقلىق دەرىجىسى1280*720 بولۇپ 3G تېخنىكىسىنى قوللايدۇ. ئۇنىڭدىن باشقا يەنە گوگۇل بۇ يىلنىڭ ئاخىرىدا ئۈچىنجى ئەۋلاد يانفۇنىنى بازارغا سېلىشنى ئۈمۈد قىلىدۇ، ئۈچىنجى ئەۋلاد يانفۇن 4G LTE تېخنىكىسىنى قوللايدۇ، ھەمدە باتارىيە ئۈچۈن تېخىمۇ چوڭ بوشلۇق قالدۇرۇلىدۇ.  Project Ara يانفۇنى دۇچ كېلىدىغان ئەڭ چوڭ مەسىلە بولسا تېلفۇننىڭ ئۇدا خىزمەت قىلىش ۋاقتى ، بۇ خىل يانفۇننىڭ باتارىيەسىنىڭ خىزمەت قىلىش ۋاقتى ئوخشاش سەپلىمىدىكى باشقا نورمال يانفۇنلارغا سېلىشتۇرغاندا 30% ئاز بولۇپ ، گوگۇل ئۈچىنجى ئەۋلاد يانفۇنىدا باتارىيەنى بىر كۈن يېتىدىغان قىلىشقا تىرىشىدۇ. شۇنىڭ بىلەن بىر ۋاقىتتا ئۈچىنجى ئەۋلادتا ئالماشتۇرغىلى بولىدىغان بۆلەكنىڭ سانى ئاشۇرۇلىدۇ، ھازىر بۆلەكنىڭ ئومۇمىي سانى 11 بولۇپ ، كەلگۈسىدە 20 ياكى 30 غا يېتىشى مۇمكىن.