ئاقسۇ ۋىلايىتىنىڭ ئادەتتىكى تولۇق ئوتتۇرا مەكتەپلىرىدىكى ئوقۇغۇچىلار 2014–يىل كۈزلۈك ئوقۇش مەۋسۇمىدىن باشلاپ دۆلەتنىڭ ياردەم بېرىش سىياسىتىدىن بەھرىمەن بولۇپ ، ئوقۇش ھەققى ، ئوقۇتۇش ماتېرىيال ھەققى قاتارلىقلار ھەممىسى ھەقسىز قىلىندى ، شۇنىڭ بىلەن جەنۇبىي شىنجاڭدىكى 3 ۋىلايەت ، بىر ئوبلاست ، يەنى قەشقەر ۋىلايىتى ، خوتەن ۋىلايىتى، قىزىلسۇ قىرغىز ئاپتونوم ئوبلاستى ۋە ئاقسۇ ۋىلايىتىدە ئادەتتىكى تولۇق ئوتتۇرا مەكتەپلەرنى ھەقسىز قىلىش ئىشقا ئاشۇرۇلدى .

مۇخبىرنىڭ شىنجاڭ مالىيە نازارىتىدىن ئىگىلىشىچە ، جەنۇبىي شىنجاڭدىكى 3 ۋىلايەت ، بىر ئوبلاستتىكى ئادەتتىكى تولۇق ئوتتۇرا مەكتەپلەردىكى ئوقۇغۇچىلارغا ياردەم بېرىش سىياسىتىنىڭ كونكرېت مەزمۇنى تۆۋەندىكىچە ئىكەن : جەنۇبىي شىنجاڭدىكى 3 ۋىلايەت ، بىر ئوبلاستتىكى ئادەتتىكى تولۇق ئوتتۇرا مەكتەپلەردىكى ئوقۇغۇچىلاردىن ئوقۇش ھەققى ئېلىنمايدۇ ، شىنجاڭ مالىيەسى ھەر بىر ئوقۇغۇچىغا ھەر ئوقۇش مەۋسۇمىدا 600 يۈەن ئۆلچەم بويىچە ياردەم بېرىپ ، مەكتەپنىڭ نورمال يۈرۈشۈشىگە كاپالەتلىك قىلىدۇ ؛ جەنۇبىي شىنجاڭدىكى 3 ۋىلايەت ، بىر ئوبلاستتىكى ئادەتتىكى تولۇق ئوتتۇرا مەكتەپلەردىكى ئوقۇغۇچىلارنىڭ ئوقۇتۇش ماتېرىيال ھەققى بىكار قىلىنىدۇ ، ئوقۇتۇش ماتېرىياللىرىنى ئاپتونوم رايون بىر تۇتاش سېتىۋېلىپ تارقىتىدۇ ؛ ۋىلايەت ، ئوبلاست ، ناھىيە ( شەھەر) لەر مالىيەسى شۇ يەرلىك ئادەتتىكى تولۇق ئوتتۇرا مەكتەپلەردىكى ئوقۇغۇچىلارنىڭ ياتاق باشقۇرۇش ۋە يۈرۈشتۈرۈش تەننەرخىنى ئۆز ئۈستىگە ئالىدۇ . ئۇنىڭدىن باشقا ، جەنۇبىي شىنجاڭدىكى 3 ۋىلايەت ، بىر ئوبلاستتىكى ئادەتتىكى تولۇق ئوتتۇرا مەكتەپلەردىكى ئوقۇغۇچىلار داۋاملىق دۆلەتنىڭ ئوقۇش ياردەم پۇلى سىياسىتىدىن بەھرىمەن بولىدۇ .

جەنۇبىي شىنجاڭدىكى 2 ۋىلايەت ، بىر ئوبلاستتىكى ئادەتتىكى تولۇق ئوتتۇرا مەكتەپ ئوقۇغۇچىلىرى 2013–يىل كۈزلۈك ئوقۇش مەۋسۇمىدىن باشلاپ ياردەم سىياسىتىدىن بەھرىمەن بولۇشقا باشلىغان ئىدى . 2–قېتىملىق مەركەزنىڭ شىنجاڭ خىزمىتى سۆھبەت يىغىنى روھىنى ئىزچىل ئەمەلىيلەشتۈرۈش ئۈچۈن ، جەنۇبىي شىنجاڭدىكى ۋىلايەت ، ئوبلاستلارنىڭ مائارىپ ئىشلىرى تەرەققىياتى ئىلگىرى سۈرۈلدى ، تولۇق ئوتتۇرىغا كۆچۈش نىسبىتى يۇقىرى كۆتۈرۈلدى ، شۇنىڭ بىلەن ئاقسۇ ۋىلايىتىمۇ سىياسەت يۈرگۈزۈش دائىرىسىگە كىرگۈزۈلدى .