سۈرەتتە: شۇ جاي ۋاقتى 11-ئاينىڭ 27-كۈنى، بىر ئەر ئامېرىكا چىكاگودا قارشىلىق بىلدۈرۈش پائالىيىتىگە قاتنىشىۋاتىدۇ.

ئامېرىكا «ۋاشىنگىتون كۈندىلىك پوچتا گېزىتى» نىڭ 2-چېسلا خەۋەر قىلىشىچە، ئامېرىكا چىكاگو پۇقرالىرىنىڭ ئاق تەنلىك ساقچىنىڭ قارا تەنلىك ياشنى ئېتىپ ئۆلتۈرۈش دېلوسىغا قارىتا قارشىلىق بىلدۈرۈش، نامايىش قىلىش ۋەزىيىتى بارغانسېرى جىددىيلىشىپ كەتكەن. چىكاگو شەھىرىنىڭ باشلىقى رام ئېمانىيۇئېل (Rahm Emanuel) شۇ جاي ۋاقتى 1-چىسلا يىغىن ئېچىپ، ساقچى ئىدارىسىنىڭ باشلىقى گارىي مىككارتىي (Gary McCarthy) دىن ۋەزىپىسىدىن ئىستىپا بېرىشنى تەلەپ قىلغانلىقىنى بىلدۈردى.

سۈرەتتە: شۇ جاي ۋاقتى 11-ئاينىڭ 24-كۈنى، چىكاگو شەھەر باشلىقى رام ئېمانىيۇئېل (سولدا) ساقچى ئىدارىسىنىڭ باشلىقى گارىي مىككارتىي (ئوڭدا) بىلەن ئاخبارات ئېلان قىلىش يىغىنى ئاچتى.

1-چىسلا چۈشتىن كېيىن تەخمىنەن 100 گە يېقىن دىنى زات چىكاگو شەھەر باشلىقى ئىشخانىسى سىرتىدا نامايىش قىلدى. نامايىشچىلارنىڭ دېيىشىچە، رام ئېمانىيۇئېل ئېلان قىلغان نازارەت قىلىش تەدبىرى پەقەت «ئالدامچىلىق» بولۇپ، ئۇ يەنە تېخى ساقچى ئىدارىسىنىڭ باشلىقى گارىي مىككارتىينى ئىشتىن بوشىتىش ئارقىلىق پۇقرالارنىڭ دىققىتىنى باشقا ياققا بۇرىماقچى بولغان.

چىكاگو ساقچى دائىرىلىرى 11-ئاينىڭ 24-كۈنى ئاق تەنلىك ساقچىنىڭ قارا تەنلىك ياشنى ئېتىپ ئۆلتۈرۈش دېلوسىغا مۇناسىۋەتلىك بىر سىن ماتېرىيالىنى ئېلان قىلغان بولۇپ، سىن ماتېرىيالىغا ئاساسلانغاندا، ئاق تەنلىك ساقچى قارا تەنلىك ياش مەكدونالىد (Macdonald) قا ئارقىمۇ-ئارقىدىن 16 پاي ئوق ئاتقان.

سۈرەتتە: شۇ جاي ۋاقتى 11-ئاينىڭ 27-كۈنى، كىشىلەر ئامېرىكا چىكاگودا قارشىلىق بىلدۈرۈش پائالىيىتىگە قاتنىشىۋاتىدۇ.

چىكاگو ساقچى دائىرىلىرىنىڭ بىلدۈرىشىچە، دېلو يۈز بەرگەندە مەكدونالىدنىڭ يۈرۈش-تۇرۇشى گۇمانلىق بولغاندىن باشقا، ساقچىلار ئۇنىڭغا قولىدىكى تۆت ئىنگلىز چى كېلىدىغان پىچاقنى تاشلاشقا بۇيرىغاندا بۇيرۇققا بويسۇنمىغان ھەمدە ساقچىلارغا پىچاق شىلتىغان، شۇنىڭ بىلەن ساقچى ۋان دىيىك (Van Dyck)  نىڭ ھاياتى خەۋىپكە ئۇچرىغاچقا ئوق چىقارغان. بىراق سىن ماتېرىيالىغا ئاساسلانغاندا، مەكدونالىد ئەينى ۋاقىتتا يول بويىغا توختىتىپ قويۇلغان ساقچى ماشىنىسىدىن ئەگىپ ئۆتۈپ كەتمەكچى بولغان، ساقچىلارغىمۇ خەۋپ يەتكۈزىدىغان ئىش قىلمىغان، بىراق بىر قانچە مېتىر يىراقلىقتا تۇرغان ئاق تەنلىك ساقچى ۋان دىيىك بىۋاسىتە ئوق چىقىرىپ ئۇنى ئېتىپ ئۆلتۈرگەن.

       سىن ماتېرىيالى ئاشكارىلانغاندىن كېين، چىكاگودا كەڭ كۆلەملىك قارشىلىق بىلدۈرۈش پائالىيىتى قوزغالدى. 27-چىسلا نەچچە مىڭلىغان كىشى چىكاگونىڭ ئەڭ ئاۋات سودا مەركىزىگە يىغىلىپ، قارشىلىق بىلدۈردى ۋە شەھەر باشلىقى ھەم ساقچى ئىدارىسىنىڭ باشلىقىدىن ۋەزىپىسىدىن ئىستېپا بېرىشىنى تەلەپ قىلدى.

     ئىگىلىنىشىچە، سىن ماتېرىيالى ئېلان قىلىنىشتىن بىر قانچە سائەت بۇرۇن ۋان دىيىك بىرىنچى دەرىجىلىك قاتىللىق جىنايىتى بىلەن ئەرز قىلىنغان. بىراق 11-ئاينىڭ 30-كۈنى كېچىدە، ۋان دىيىك كېپىللىككە قويۇپ بېرىلدى. بىراق 12-ئاينىڭ 1-كۈنى چۈشتىن بۇرۇن يېڭى بىر كۆلەملىك قارشىلىق بىلدۈرۈش پائالىيىتى ئېلىپ بېرىلىشتىن بۇرۇن، چىكاگو شەھەر باشلىقى ساقچى ئىدارىسى باشلىقىنى ۋەزىپىسىدىن ئېلىپ تاشلىغانلىقىنى جاكارلىدى.