كۆزەتكۈچى تورى خەۋىرى : لەگلەك تورى تەرجىمىسى، ئىسلام دۆلىتى تەشكىلاتى قوراللىق قىسىم ئەسكەرلىرى 9.ئاينىڭ 3.كۈنى سەھەردە يەنە بىر نەپەر ئامېرىكىلىق مۇخبىر سىتىۋېن سوتلوفنى بوغۇزلىغانلىق سىن ھۆججىتىنى ئېلان قىلغان.

تېرورلۇق تەشكىلاتلارنىڭ توردىكى پائالىيتىنى نازارەت قىلىدىغان تور بېكەت SITE نىڭ ئاشكارىلىشىچە، بېيجىڭ ۋاقتى 3.چىسلا سەھەردە، ئىراق ئىسلام دۆلىتى قوراللىق قىسىملىرى سىن ھۆججەتنى ئېلان قىلىپ ھەرقايسى دۆلەت ھۆكۈمەتلىرىنىڭ ئامېرىكىدەك ئىسلامغا قارشى جاھالەتلىك بىرلەشمىدىن يىراق تۇرۇشقا ئاگاھلاندۇرغان.

بۇ ئىككى مىنۇت 46 سېكنۇتلۇق سىن ھۆججىتىدە، سوتلوف ئۆزىنىڭ ئامېرىكا ھۆكۈمىتىنىڭ ئسىلام دۆلىتى تەشكىلاتىغا زەربە بېرىش قارارى ئۈچۈن بەدەل تۆلىگەنلىكىنى بىلدۈرۈپ، <ئوباما، سەن ئىراقنىڭ تاشقى دېپلوماتىيە ئىشلىرىغا ئارىلىشىپ ئۇنى ئامېرىكا خەلقىنىڭ ھاياتى ۋە مەنپەئىتىنى قوغداش ئۈچۈن دېدىڭ، ئۇنداقتا نىمىشقا مەن سېنىڭ ئارىلىشىشىڭ ئۈچۈن بەدەل تۆلىگىدەكمەن؟ مەن ئامېرىكا پۇقراسى ئەمەسمۇ؟>، <سەن نەچچە مىليارد پۇلنى تۈگەتتىڭ، بىزنىڭ ئارمىيمىزدە نەچچە مىڭ ئادەم تالەپەتكە ئۇچرىدى.

بۇ ئۇرۇشنى قايتا قوزغاشتا ئامېرىكا خەلقىنىڭ مەنپەئەتى قانداق ئويلىشىلدى؟ ئېسىمدە قېلىشىچە سەن يەنە زۇڭتۇڭ سايلىمىدا يېڭىش ئۈچۈن ئېراق ۋە ئامېرىكىدا تۇرغۇزۇلغان ئەسكەرلەرنى چېكىندۈرىدىغانلىقىڭ ۋە گۇەنتانامو تۈرمىسىنى ئەمەلدىن قالدۇرىدىغانلىقىڭ ھەققىدە كاپالەت بەرگەن ئىدىڭ. سېنىڭ ۋەزىپە ئۆتەش مۇددىتىڭ تۈگەشكىمۇ ئاز قالدى، يۇقارقى كاپالەتلەرنىڭ بىرسىنىمۇ ئەمەلگە ئاشۇرمىدىڭ، يەنە كېلىپ بىز ئامېرىكا خەلقىنى ئوتقا ئىتتىردىڭ. > دېگەن.

ئالدىنقى قېتىم ئامېرىكا مۇخبىرىنى بوغۇزلىۋېتىش قىلمىشىغا ئوخشايدىغان يېرى، بوغۇزلىغۇچى ئەنگىلىيە تەلەپپۇزىدا سۆزلىگەن. ئۇ يەنە <ئوباما، سېنىڭ ئىسلام دۆلىتىگە يۈرگۈزگەن تەكەببۇر، يوغانچىلىق دېپلوماتىيە سىياسىتىڭ ئۈچۈن مەن قايتىپ كەلدىم> دېگەن.

سوتېلوف 31 ياش، ئىلگىرى دەۋر ژورنىلىدا خىزمەت قىلىپ، CNN، فوكىس خەۋىرى قاتارلىقلاردا ئېكرانغا چىققان، كۆپ قېتىم سۈرىيە، مىسىر، لىبىيەلەردە مۇخبىرلىق قىلغان. 2013.يىلى 8.ئايدا سۈرىيەدە ئىز-دېرەكسىز غايىب بولغان. 8.ئاينىڭ 19.كۈنى ISIS بىرىنجى نەپەر ئامېرىكا مۇخبىرىنى بوغۇزلىغاندا، ئەگەر ئوباما داۋاملىق ئوقۇرىنى ئېگىز قىلىۋالسا، كېيىنكى قېتىمدا بوغۇزلىنىدىغان ئادەمنىڭ سوتېلوف ئىكەنلىكىنى دەپ تەھدىد سالغان. 8.ئاينىڭ 27.كۈنى ئاخبارات ۋاستىلىرى سوتېلوفنىڭ ئاپىسى شۆلى سوتېلوفنىڭ ئىسلام دۆلىتى ئاتامانىنى خەلىپە دەپ ئېتراپ قىلىپ ئۆز ئوغلىنى قويۇپ بېرىشنى ئۆتۈنگەنلىك سىن ھۆججىتىنى ئېلان قىلغان.

ISIS داۋاملىق تەھدىد سېلىپ، كېيىنكى قېتىم قەتلە قىلماقچى بولغان ئادەمنىڭ ئەنگىلىيەلىك داۋىي خەيئېنس ئىكەنلىكىنى دېگەن. ئىگىلىنشىچە، ISIS يەنە ئاز دېگەندە ئىككى نەپەر ئامېرىكىلىقنى كونترول قىلىۋالغان.