پۇتىن بىلەن پوروشېىنكونىڭ ئىككىنچى قېتىم قول ئېلىشىپ كۆرۈشۈشىدىن قارىغاندا نۇرغۇن مەسىلىنى ھەل قىلىشقا ئامالسىزدەك قىلىدۇ. رۇسىيە بىلەن ئۇكرائىنانىڭ ھاكىمىيەت يۈرگۈزگىچىلىرى مىنىسكىدا ھېچقانداق ماھىيەتلىك كېلىشىم ھاسىل قىلالمىغان ئەھۋالدا، رۇسىيەنىڭ ئون مۇنتىزىم ئەسكىرىنىڭ ئۇكرائىناغا كىرگەنلىكى ئۈچۈن قولغا ئېلىنغانلىقى ئىككى دۆلەتنىڭ يەنە بىر نۆۋەتلىك جامائەت پىكىرى ئۇرۇشىنى پەيدا قىلدى.

ئۇكرائىنا ئارمىيە دائىرىلىرى قولغا ئالغان رۇسىيە ئەسكەرلىرى كىيىفقا ئېلىپ كېلىندى ھەمدە ئاخبارات ئېلان قىلىش يىغىنىغا قاتناشتى. رۇسىيەنىڭ مۇنتىزىم ئارمىيەسىنىڭ ئۇكرائىناغا تاجاۋۇز قىلغانلىقى ھەققىدىكى خەۋەرلەر بەس بەستە خەلقئارا تاراتقۇلارنىڭ قىزىق نۇقتىسىغا ئايلاندى، رۇسىيە بولسا: رۇسىيە ئەسكەرلىرى چېگرادا رازۋېدكا قىلىۋاتقاندا ئۇقۇشماستىن ئۇكرائىنا كىرىپ قالغان دېگەندە چىڭ تۇردى.

ئۇكرائىنا بىخەتەرلىك ئىدارىسى 25-ئاۋغۇست سەھەردە ئېلان قىلغان خەۋەردە مۇنداق دېيىلدى: رۇسىيە بىلەن چېگرىلىنىدىغان رايوندا قورال ۋە گۇۋاھنامىسى بار رۇسىيەنىڭ ئون نەپەر پاراشۇت ئەسكىرىنى قولغا ئالدۇق. بۇلارنىڭ ئىچىدە توققۇزى ئاخبارات ئېلان قىلىش يىغىنى ئېچىلغان مەيدانغا ئېلىپ بېرىلدى. رۇسىيەلىك ئەسكەرلەر ئاشكارا ھالدا: بىز قەستەن ئۇكرائىنا چېگراسىغا كىرمىدۇق دېدى. ئاشكارىلىنىشىچە، ئۇلار رۇسىيە بىلەن ئۇكرائىنا چېگراسىدا ماشىنىلىق چارلاۋاتقاندا تۇيۇقسىز توپقا تۇتۇلغان، شوپۇر ئېغىر يارىلانغان، ئارقىدىن ئۇكرائىنا ئارمىيەسى تەرىپىدىن قولغا ئېلىنغان. شۇندىلا ئۆزلىرىنىڭ ئۇكرائىنا چېگراسىغا خاتا كىرىپ قالغانلىقىنى بىلگەن. چارلاش ۋەزىپىسىنى ئۆتەۋاتقاندا رۇسىيە ئارمىيەسى ئوت ئېچىش ھەققىدە بۇيرۇق تاپشۇرۇپ ئالمىغان، ئۇلار تۇتۇلغاندا ئوقلىرى بەتلەنمىگەن. ئاخبارات ئېلان قىلىش يىغىنىدىن كېيىن رۇسىيە ئەسكەرلىرى تۈرمىگە تاشلاندى.

بۇ ئۇكرائىنانىڭ تۇنجى قېتىم چېگراسى ئىچىدە رۇسىيەنىڭ مۇنتىزىم ئەسكەرلىرىنى ئەسىرگە ئېلىشى. ئۇكرائىنا دائىرىلىرى: بۇ رۇسىيە ئارمىيەسىنىڭ ئۇكرائىناغا تاجاۋۇز قىلغانلىقىنىڭ دەلىل ئىسپاتى دەپ قارىدى. ئۇكرائىنانىڭ دۆلەت مۇداپىئە مىنىستىرى بۇ پاراشۇت ئەسكەرلىرىنىڭ رۇسىيەنىڭ ئۇكرائىناغا ھەربىي تاجاۋۇز قىلىشقا قاتناشقانلىقىنى ئەيىبلىدى. ئۇكرائىنا دۆلەت بىخەتەرلىكى ۋە دۆلەت مۇداپىئە كومىتېتىنىڭ باياناتچىسى رېشىنكو: رۇسىيەلىك بۇ ئەسكەرلەرنىڭ ئۇكرائىنا چېگراسىغا كىرىشى ئالاھىدە ۋەزىپىنى ئىجرا قىلىش ئۈچۈن دەپ تەكىتلىدى.

بۇندىن سىرت ئۇكرائىنا ھۆكۈمىتى يەنە: ئۇكرائىنا گىۋاردىيەسى ئىككى كۈن بۇرۇن ئۇكرائىنانىڭ بايرىقىنى ئېسىۋالغان ئەلئارا قوراللىق تەشكىلاتنىڭ بىر بىرونېۋىك كالونى رۇسىيەدىن ئۇكرائىنانىڭ شەرقىدىكى مارىئۇپولغا قاراپ يول ئالدى دېدى. ئۇكرائىنا دائىرىلىرى مۇنداق دېدى: بۇ كالون شەرقتىكى ئەلئارىسىدىكى قوراللىق تەشكىلات كونتروللۇقىغا تەۋە بولمىغان دائىرىدىكى شېرباك يېزىسى ئەتراپىدا چېگرىدىن كىردى، بىز بۇلارنىڭ ئارىسىدىكى ئىككى تانكىنى ۋەيران قىلىۋەتتۇق. لېكىن رۇسىيەنىڭ دىپلوماتىيە مىنىستىرى لاۋروف بۇنىڭغا رەددىيە بېرىپ، بۇ ئۇكرائىنا قوزغىغان تەشۋىق ئۇرۇشى دەپ قارىدى.

رۇسىيە ئەسكەرلىرىنىڭ تۇتقۇن قىلىنغانلىقىغا قارىتا، رۇسىيە دائىرىلىرى پەقەت ئەسكەرلەر يولدىن ئېزىپ قالغانلىقتىن كېلىپ چىققان تاسادىپىي ۋەقە دەت تەكىتلىدى، رۇسىيە قوراللىق كۈچلىرىنىڭ سابىق باش شتاپ باشلىقى يۇرىي بالۇيېۋىسكى مۇنداق دەپ قارىدى: رۇسىيە ئەسكەرلىرى چېگرىدىن تاسادىپىي ئۆتتى، رۇسىيە بىلەن ئۇكرائىنا ئارىسىدا چېگرا بەلگىسى يوق، چېگرا رايونلارمۇ نازارەت قىلىنمىغان، پاراشۇتچى ئەسكەرلەر ئۆزلىرىنىڭ باشقا دۆلەتنىڭ چېگراسىغا كىرىپ قالغىنىنى سەزمىگەن بولۇشى مۇمكىن.
رۇسىيە زۇڭتۇڭى پۇتىن: مەن تېخى دۆلەت مۇداپىئە مىنىستىرلىقىنىڭ دوكلاتىنى تاپشۇرۇپ ئالمىدىم، بىلىشىمچە ئۇلار چېگرا چارلاۋاتقاندا، ئۇكرائىنا چېگراسىغا كىرىپ قالغان بولۇشى مۇمكىن دېدى. ئۇ شۇنىڭ بىلەن بىرگە مۇنداق دەپ كۆرسەتتى: بۇندىن ئىلگىرىمۇ شەرقتىكى ئالاھىدە ھەرىكەتكە قاتناشقان ئۇكرائىنا ئەسكەرلىرى رۇسىيە چېگراسىغا كىرىپ قالغان، ئۇلار بەش ياكى ئون ئادەم بولماستىن بەلكى نەچچە ئون ئادەم ئىدى.

موسكۋادىكى ئالاقىدار زاتلار ئومۇميۈزلۈك: بۇ قېتىمقى رۇسىيە ئەسكەرلىرىنىڭ چېگرا ھالقىپ ئۇكرائىنا چېگراسىغا كىرىپ قېلىشى تاساددىپىيلىق دەپ بېكىتتى. بەزى كۆزەتكۈچىلەر مۇنداق دەپ كۆرسەتتى: ناۋادا رۇسىيە ئەسكەرلىرى ئۇكرائىنا چېگراسىغا كىرىپ ئالاھىدە ۋەزىپە ئۆتۈمەكچى بولسا، ئومۇميۈزلۈك ياخشى كاپالەتكە ئىگە بولغان بولاتتى، بۇنداق ئاسانلىقچە قولغا چۈشمەيتتى. بۇندىن باشقا، ناۋادا ئالاھىدە ۋەزىپە ئىجرا قىلسا، كىممۇ رەتلىك كىيىنىپ، گۇۋاھنامىلەرنى تولۇق ئېلىپ ئۇكرائىنا چېگراسىغا كىرىدۇ؟.