خاڭجوۋ شەھەرلىك ئىقتىساد ۋە ئۇچۇرلاشتۇرۇش كومىتېتىنىڭ سابىق مۇدىرى جاۋ جىلەي (ماتېرىيال سۈرەت)

شىنخۇا تورى ، خاڭجوۋ ، 30-ئىيۇل تېلېگراممىسى : خاڭجوۋ شەھىرىنىڭ ئالاقىدار تارماقلىرى 30-ئىيۇل سائەت 23:00 لەردە ئېلان قىلغان خەۋىرىگە قارىغاندا : خاڭجوۋ شەھەرلىك ئىقتىساد ۋە ئۇچۇرلاشتۇرۇش كومىتېتىنىڭ سابىق مۇدىرى جاۋ جىلەي شەھەرلىك ھۆكۈمەت بىناسىدىن ئۆزىنى تاشلاپ ئۆلۈۋالغان .

30-ئىيۇل سائەت 15:00 لەردە ، بىر ئەر خاڭجوۋ شەھەرلىك ھۆكۈمەتنىڭ بىناسىدىن ئۆزىنى تاشلاپ ئۆلۈۋالغان . نەق مەيدانى تەكشۈرۈش ئارقىلىق ، ئۆلگۈچىنىڭ يانچۇقىدىن خىزمەت كىنىشكىسى ۋە ئاشخانىنىڭ تاماق كارتىسى تېپىلىپ ، ئىسمىنىڭ جاۋ جىلەي ئىكەنلىكى ، خاڭجوۋ شەھەرلىك ئىقتىساد ۋە ئۇچۇرلاشتۇرۇش كومىتېتىنىڭ سابىق مۇدىرى ئىكەنلىكى ئېنىقلانغان .

جامائەت خەۋپسىزلىكى ئورگانلىرى جاۋ جىلەينىڭ ئىشخانىسىنى تەكشۈرگەندە ۋەسىيەتنامىگە ئوخشاپ كېتىدىغان پارچە-پۇرات قەغەزلەرنى بايقىغان ، قەغەزلەرنى ئەسلىگە كەلتۈرگەندە ئۇنىڭ پوچۇركىسى ئىكەنلىكى ئىسپاتلانغان ھەمدە جاۋ جىلەينىڭ ۋەسىيەتنامىسى ئىكەنلىكى بېكىتىلگەن . جاۋ جىلەي ۋەسىيەتنامىسىدە ئۆزىنىڭ قالقان بەز راكى كېسىلىگە گىرىپتار بولغىنىغا نەچچە يىللار بولغانلىقى ، ھازىر ئۆپكىسىنىڭ بىر قىسمىغا داغ چۈشۈپ قالغانلىقى ، يېقىنقى مەزگىللەردە يەنە ئېغىر دەرىجىدە ئۇيقۇسىزلىق ئالامىتى كۆرۈلۈۋاتقانلىقى ، جىگىرىنىڭمۇ يوشۇرۇن ئاغرىقى بارلىقى ، شۇ سەۋەبتىن تەشكىل ۋە ئائىلىسىدىكىلەرنى ، يەنە ئۆزىنى ئاۋارىچىلىققا قويماسلىق ۋە رىيازەت چەكتۈرمەسلىك ئۈچۈن ئۆلۈۋېلىشنى قارار قىلغانلىقىنى تىلغا ئالغان . جاۋ جىلەي ۋەسىيەتنامىسىدە ئۆزىنىڭ تەشكىلگە يۈز كېلەلمىگۈدەك ئىش قىلمىغانلىقى ۋە قانۇنغا خىلاپ ئىشلار بىلەن شۇغۇللانمىغانلىقىنى بىلدۈرگەن .