جۇڭگو خەۋەر تورى 15-مارت خەۋىرى: نۇر تورى تەرجىمىسى؛

  ھىندىستانلىق بۇ بىر جۈپ ئەر-ئايال ئائىلىسىدىكىلەرنىڭ قارشى تۇرۇشىغا قارىماي توي قىلغانلىقتىن، يولدا باشقىلارنىڭ قەست قىلىشىغا ئۇچرىدى. چەتئەل تاراتقۇلىرىنىڭ خەۋىرىگە قارىغاندا، سىنىپى تۈزۈم ھىندىستاندا چوڭقۇر يىلتىز تارتقان بولۇپ، بۇ خىل ھالەت نۇرغۇنلىغان تىراگېدىيەلەرنى پەيدا قىلىپلا قالماي يەنە ناچار جەمئىيەت كەيپىياتىنى پەيدا قىلغان. ھىندىستاندا بىر جۈپ ئەر-ئايالنىڭ قىز تەرەپ ئائىلىسىدىكىلەرنىڭ قارشى تۇرۇشىغا قارىماي ئۆزىدىن بىر دەرىجىدە تۆۋەن تۇرىدىغان «تېگى پەس» ئەرگە ياتلىق بولغانلىقى ئۈچۈن، ئاقىۋەتتە قىز تەرەپنىڭ ئۇرۇق تۇغقىنى ئادەم ئەۋەتىپ ئۇلارغا ھۇجۇم قىلىپ، ئېرىنىڭ ئۆلۈپ كېتىشى ۋە ئايالىنىڭ ئېغىر يارىلىنىشىنى كەلتۈرۈپ چىقارغان.

  تەيۋەن تاراتقۇلىرىنىڭ 15-مارتتىكى خەۋىرىگە قارىغاندا، 19 ياشلىق كاسۇلىيا مەكتەپتە 22 ياشلىق ئەر سانكار بىلەن تاسادىپىي ئۇچرىشىپ قالغان ھەمدە بىر-بىرىنى ياخشى كۆرۈشۈپ قالغان، بۇ ئىككىيلەن ئايرىم ئايرىم ھالدا تۆتىنچى يىللىق ۋە ئىككىنچى يىللىقتا ئوقۇيدىغان ئوقۇغۇچىلار بولۇپ، توي قىلغاندىن كىيىن كاسۇلىيا مەكتەپتىن چېكىنىپ ئۇقۇش تاشلىغان، كاسۇلىيا ئاتا-ئانىسىنىڭ رەت قىلىشىغا قارىماي، سەككىز ئاينىڭ ئالدىدا «تېگى پەس» دەپ قارالغان سانكارغا ياتلىق بولغان، شۇنداق قىلىپ ئائىلە ماجراسىمۇ تەڭ باشلانغان، توي قىلغاندىن كېيىن، ئۇلار توختىماستىن قىز تەرەپنىڭ ئائىلىسىدىكىلەرنىڭ ئۆلۈم تەھدىتىگە ئۇچرىغان.

   3-ئاينىڭ 13-كۈنى، بۇ ئىككىيلەن سىرتقا مال سېتىۋېلىش ئۈچۈن چىققاندا، توساتتىن ئەسكى كىشىلەرنىڭ ھۇجۇم قىلىشىغا ئۇچرىغان بولۇپ، بەتنىيەتلەر قولىدا پىچاق كۆتۈرۈپ سانكارنى تەلۋىلەرچە چاپقان، كاسۇلىيا بولسا باش تەرىپى ئېغىر يارىلانغان، ئەينى چاغدا مەيداندىكى ھېچكىم ئۇلارغا ياردەم قىلىشنى خالىمىغان، بەتنىيەتلەر قىلىدىغىنىنى قىلىپ بولۇپ ئايرىلغاندا ئاندىن بەزى كىشىلەر  ئۇلارنى دوختۇرخانىغا ئېلىپ بارغان. سانكار ئېغىر يارىلانغانلىقتىن قۇتقۇزۇش ئۈنۈم بەرمەي ئۆلۈپ كەتكەن، كاسۇلىيا بولسا بۇ بالايى قازادىن ئامان قالغان، نۆۋەتتە ئۇنىڭ ئەھۋالى مۇقىملاشقان. ساقچى دائىرىلىرى نەق مەيداندىكى كىشىلەرنىڭ تارتىۋالغان سۈرەتكە ئاساسەن قاتىلنى پۈتۈن كۈچى بىلەن ئىزدەۋاتقان ئىكەن.