2015-يىللىق جۇڭگو تەكلىماكاننى ئايلىنىش (خەلقئارا) راللى مۇسابىقىسى ۋە جۇڭگو ئاپتوموبىل دالا يۈرۈشلۈك مۇسابىقىسىنىڭ شىنجاڭ رايونى مۇسابىقىسى 24-ئىيۇن 3-مۇسابىقە بۆلىكىدىكى كەسكىن رىقابەتنى ئاياغلاشتۇردى، نىڭشيا يۈەندا كېجيەن «چوققا» ئاپتوموبىل ئەترىتىدىكى ليۇ كۇن/لياۋ مىن گۇرۇپپىسى 2 سائەت 09 مىنۇت 48 سىكۇنتلۇق نەتىجە بىلەن «خارۋارد» ئاپتوموبىل ئەترىتىنىڭ مۇسابىقە باشلانغاندىن بۇيانقى «چېمپىيون مونوپۇللۇقى»نى بۇزۇپ تاشلاپ، مۇسابىقە بۆلىكىدىكى تۇنجى چېمپىيونلۇقنى قولغا كەلتۈردى.
23-ئىيۇن بىر كۈنلۈك دەم ئېلىشتىن كېيىن مۇسابىقە يەنە كەسكىن داۋاملاشتى، SS3(Discovery Expedition.قۇمتاغ مۇسابىقە بۆلىكى)نىڭ باشلىنىش نۇقتىسى ئېزىتقۇ، ئاخىرلىشىش نۇقتىسى چىقتىم ماي قاچىلاش پونكىتى بولۇپ، 201.59 كىلومېتىرلىق ئالاھىدە مۇسابىقە بۆلىكى بار ئىدى.
111-نومۇرلۇق «مۈشۈكئېيىق» مۇسابىقە ئاپتوموبىلى ھەيدىگەن ليۇ كۇن/لياڭ مىن شۇ كۈنى ئىككى مۇسابىقە بۆلىكىدىكى بىر قاتار ئەگرى-توقايلىقلار بىلەن كەسكىن ئېلىشىش ئارقىلىق بۇ مۇسابىقە بۆلىكىدىكى ئۈستۈنلۈكنى قولغا كەلتۈردى.
ــ بۇ بۆلەكتىكى مۇسابىقە خېلى ئوڭۇشلۇق بولدى، كۆپىنچە ئاپتوموبىللارنىڭ سائەتلىك سۈرئىتى 200 كىلومېتىرغا يېقىنلاشتى،-دېدى ليۇ كۇن.
بۇ كۈنكى مۇسابىقىدە ماھىرلار ۋە مۇسابىقە ئاپتوموبىللىرى مېڭىش تەس، ئەگرى-بۈگرى قۇملۇق يولىدىن، باشقا يەنە يۇقىرى تېمپېراتۇرىنىڭ سىنىقىغا ئۇچرىدى. نەق مەيداندىكى مۇخبىرلار ئۆلچەش ئارقىلىق يەر يۈزى تېمپېراتۇرىسىنىڭ ℃60قا چىققانلىقىنى بايقىدى.
بۇ خىل ناچار شارائىت ماھىرلار ۋە مۇسابىقە ئاپتوموبىللىرىغا غايەت زور سىناق ئېلىپ كەلدى، يۇقىرى تېمپېراتۇرىدا بەزى ئاپتوموبىللاردا ئۆزلۈكىدىن ئوت ئېلىپ كۆيۈش كۆرۈلدى، بىراق، مۇسابىقە تەشكىلىي كومىتېتى جىددىي تەدبىر قوللانغانلىقتىن ئادەملەر ئۆلۈش، يارىلىنىش ئەھۋاللىرى كۆرۈلمىدى.
«خارۋارد» ئاپتوموبىل ئەترىتىنىڭ ماھىرى خەن ۋېي ھەيدەپ ماڭغان ئاپتوموبىل قۇم بارخىنىغا كەلگەندە 360 گىرادۇس ئۆرۈلۈپ چۈشتى، شامال توسقۇچ ئەينەك چېقىلدى، خەن ۋېي ئەينەكنى ئېلىۋەتكەن بولسىمۇ، بىراق ئىشىك يېپىلمىغاچقا ئامالسىز مۇسابىقىدىن توختاپ مەسىلىنى بىر تەرەپ قىلىشقا مەجبۇر بولدى.
تەكلىماكاننى ئايلىنىش(خەلقئارا) راللى مۇسابىقىسى 25-ئىيۇن مارافونچە مۇسابىقە بۆلىكىگە كىرىدۇ، بۇ مۇسابىقە بۆلىكى 602 كىلومېتىر بولۇپ، نۆۋەتتە مەملىكىتىمىزدە ئېلىپ بېرىلىۋاتقان دالا راللى مۇسابىقىلىرى ئىچىدىكى ئەڭ ئۇزۇن مۇساپە ھېسابلىنىدۇ. بۇ مۇسابىقە بۆلىكىنىڭ يول يۈزى قۇم-شېغىل، دەشت-باياۋان، چوڭ يارداڭ، دەريا قىنى قاتارلىقلاردىن تەشكىل تاپقان بولۇپ، يەر شەكلى «چايقالما»، ئاچال يول ئېغىزى كۆپ بولۇشتەك ئالاھىدىلىكلەرگە ئىگە بولۇپ، ماھىرلار مۇسابىقە جەريانىدا خالتا جىلغىلارغا كىرىپ قېلىشتىن ئېھتىيات قىلىشى، كۆرۈش ئارىلىقى ياخشى بولمىغان ئەھۋال ئاستىدا ئاپتوموبىل سۈرئىتىنى كونترول قىلىشى لازىم .