بۇ يىلدىن باشلاپ، شىنجاڭ ئىككى يىل ئىچىدە 888مىليون
يۈەن مەبلەغ سېلىپ، قەشقەر، خوتەن ۋىلايەتلىرى ۋە قىزىلسۇ قىرغىز ئاپتونوم
ئوبلاستى قاتارلىق جەنۇبىي شىنجاڭدىكى نامرات رايونلاردا يەرلىكنىڭ ئىشقا
ئورۇنلاشتۇرۇش خىزمىتىنى ئىلگىرى سۈرۈشنى مەقسەت قىلغان بىر تۈركۈم  <<قىسقا، تەكشى، تېز>> كەسپ
تۈرلىرىنى يولغا قۇيىدىغان بولۇپ، 100مىڭدىن كۆپرەك كىشىنى ئىشقا ئورۇنلاشتۇرۇش
ئارقىلىق، جەنۇبىي شىنجاڭنىڭ ئىقتىسادىي تەرەققىياتى ۋە ئىجتىمائىي مۇقىملىقىنى
ئىلگىرى سۈرۈش مۆلچەرلەندى.

      9-كۈنى
شىنجاڭ ئۇيغۇر ئاپتونوم رايونلۇق پارتكوم << قىسقا، تەكشى، تېز >>تۈرلەرنى
تۇنۇشتۇرۇش يىغىنى چاقىردى. ئاپتونوم رايونلۇق ئىقتىساد-ئۇچۇرلاشتۇرۇش كومىتېتىنىڭ
مۇدىرى خۇ كەيجياڭ ماۋۇلارنى بىلدۈردى: <<قىسقا، تەكشى، تېز>> تۈرلەر
بەلگىلىك تەرەققىيات ئاساسىغا ئىگە، ئازراق يار-يۈلەك بولسىلا تەرەققىياتنى
ئىلگىرى سۈرۈپ، يەرلىكنىڭ ئىشقا ئورۇنلاشتۇرۇشىغا ئۈنۈملۈك تۈرتكە بولۇپ،
پۇقرالارغا نەپ يەتكۈزىدىغان كەسپ تۈرلىرىنى كۆرسىتىدۇ.

      ئاپتونوم رايونلۇق مالىيە نازارىتىنىڭ نازىرى ۋەن خەيچۈەن مۇنداق
دېدى: شىنجاڭ ئىككى يىل ئىچىدە 888مىليون يۈەن مەبلەغ سېلىپ، قەشقەر، خوتەن ۋە
قىزىلسۇدا 10نۇقتىلىق كەسپكە چېتىلىدىغان 195تۈرگە مەدەت بېرىدۇ. بۇنىڭ ئىچىدە،
288مىليون يۈەن مەبلەغ سېلىپ، 53تۇقۇمىچىلىق، كىيىم-كېچەك تۈرىنى، 600مىليون يۈەن
مەبلەغ سېلىپ 142باشقا كەسپ تۈرىنى قوللايدۇ. بۇ ئارقىلىق كارخانىلارنىڭ 58مىڭ
300كىشىنى يېڭىدىن ئىشقا ئورۇنلاشتۇرۇشى ھەمدە 50مىڭ كىشىنىڭ كەسپ بىلەن
شۇغۇللىنىشىغا تۈرتكە بولۇش مۆلچەرلەندى.