تۈنۈگۈن كەچ، مۇخبىر بىر تاشقى كېسەللىكلەر دوختۇرى ئەۋەتكەن ئۇچۇرنىڭ ئۈندىدار دوستلار چەمبىرىكىدە غۇلغۇلا قوزغىۋەتكەنلىكىنى كۆرگەن. ۋۇخەندىكى بىر دوختۇرخانىنىڭ دوختۇرى مۇنداق دەپ يازغان: «ئۆتكەن يىلى 12-ئاينىڭ 27-كۈنى، تۆت ياشلىق قىز بىلەن ئۇنىڭ مومىسىنى، بىر باكلىق سېمونت ئاپتوموبىلى سوقۇۋەتكەن، مومىسى ئۇنى قۇتقۇزىمەن دەپ بەختسىزلىككە ئۇچرىغان. قىزنىڭ سول تەرەپ تۆۋەن قىسمى ئاپتوموبىل چاقى تەرپىدىن بېسىپ يانجىلىپ، داس سۆڭىكى پارچىلىنىپ، پۇت سۆڭىكى سىرتىغا چىقىپ قالغان بولۇپ، ئەھۋالى ئىنتايىن ئىچىنىشلىق».

     دوختۇر مۇنداق دېگەن، بۇنداق ئېغىر تاشقى كېسەللىكلەر يارىسى بىمارلىرىنىڭ ئىچىدە، پۈتۈن دۇنيادا ئاران 50 نەچچىسىلا ھايات قالغان بولۇپ، بۇ قىز يېشى ئەڭ كىچىك يارىدار ھېسابلىنىدۇ. ئەسلىگە كەلتۈرۈش ئۈچۈن، سىرتىغا چىقىپ قالغان ئۈچەي يولى قاتارلىق ئىچكى ئەزالىرىنى تېرىسى ئوراپ تۇرالىشى كېرەك، بۇنىڭغا تەخمىنەن ئىككى ئايدىن كۆپرەك ۋاقىت ۋە ئون نەچچە قىتىملىق ئوپېراتسىيە قىلىشقا توغرا كېلىدۇ.

     ۋەقە تۇغدۇرغان شوپۇرنىڭ ھەيدىگىنى سۇغۇرتىلانمىغان نىمكەش ئاپتوموبىل بولۇپ، شوپۇر قولغا ئېلىنغان كېيىن، پۇل تۆلىيەلمەيدىغانلىقىنى ھەمدە تۆلەپ تۇرىدىغان پۇلىنىڭمۇ يوق ئىكەنلىكىنى ئېيتقان.

     قىزنىڭ ئاتا-ئانىسى ئادەتتىكى ئىشلەمچى بولۇپ، دەسلەپكى مەزگىلدىكى داۋالاشلارغا تەخمىنەن 200 مىڭ يۈەن خەجلىگەن. بۇ پۇللارنى ئۇرۇق-تۇغقان ۋە دوست-بۇرادەرلىرىدىن قەرز ئالغان، ئۇلار قىزىنىڭ ئۆلۈپ كەتكەن مومىسى ئۈچۈن چىداملىق بولۇشىنى، ھەمدە ئۆزلىرىنىڭمۇ ھەرگىز ۋاز كەچمەيدىغانلىقىنى بىلدۈرگەن.

     شۇ كۈنى، تاشقى كېسەللىكلەر دوختۇرى ئۈندىدار دوستلار چەمبىرىكىدە كىشىلەرنى ئىئانە قىلىشقا چاقىرغان. قىسقىغىنە 6 سائەت ئىچىدە، 4700 دىن كۆپرەك تورداش 300 مىڭ يۈەندىن ئارتۇق پۇل ئىئانە قىلغان ۋە قىزنى غەيرەت قىلىشقا چاقىرغان.

     تۈنۈگۈن كەچ مۇخبىر پۇل ئىئانە قىلماقچى بولغاندا، ئىئانىنىڭ جۇغلىنىپ بولغانلىقىنى، ئىئانە قىلىشنىڭ ئاللىبۇرۇن ئاخىرلاشقانلىقىنى بايقىغان.  

     مۇخبىر قىزنىڭ كېسەللىك ئەھۋالىدىن داۋاملىق خەۋەردار بولۇپ تۇرۇش ئۈچۈن ، بۈگۈن چۈشتىن بۇرۇن دوختۇرخانىغا يېتىپ كەلگەن بولۇپ، ھازىر قىزنىڭ ئائىلىسىدىكىلىرىنى ۋە دوختۇرنى زىيارەت قىلماقتا.