شىياۋمى شىركىتى تۈنۈگۈن «كونا يانفوننى يېڭىسىغا ئالماشتۇرۇش» پائالىيىتىنى يولغا قويغان. ئەمما قىسمەن كونا نۇسخىدىكى شىياۋمى يانفونىنىڭ يىغىۋېلىش باھاسى بەك تۆۋەن بولغانلىقتىن، نۇرغۇنلىغان تورداشلارنىڭ نارازىلىقىنى قوزغىغان، مەسىلەن، شىياۋمى يانفونى 1 نىڭ يىغىۋېلىش باھاسى ئاران 10 يۈەن بولۇپ، ئاز بولمىغان تورداشلار شىياۋمىنى مەسخىرە قىلىپ، « 10 يۈەن پوچتا ھەققىگىمۇ يەتمەيدۇ» دېيىشكەن. (دېمىسىمۇ شۇنداق!)

   بۇنىڭغا قارىتا، شىياۋمى شىركىتىنىڭ لېدىرى لىن بىن بۈگۈن ئەسلىدىكى كونا يانفوننى يىغىۋېلىش پىلانى ئاساسىدا، يەنە يېڭى بىر تۈرلۈك ئابونتلارغا جاۋاب قايتۇرۇش پائالىيىتىنى ئوتتۇرىغا چىقارغان. لىن بىن مىكرو بىلوگىدا مۇنداق دەپ يازغان: « 12-ئاينىڭ 25-كۈنىدىن كېلەر يىلى 1-ئاينىڭ 15-كۈنىگىچە بولغان مەزگىلدە، شىياۋمى 1 تۈرىدىكى يانفونلارنى ئىشلەتكۈچىلەر شىياۋمى يولغا قويغان كونا يانفوننى يېڭىسىغا ئالماشتۇرۇش مۇلازىمىتىنى ئىشلەتسە، ئەسلىدىكى يىغىۋېلىش باھاسى ئاساسىدا يەنە 100 يۈەنلىك يانفون سېتىۋېلىش نەق پۇل ئىتىبار كارتىسىغا ئېرىشەلەيدۇ. شىياۋمى 1، 1S ۋە شىياۋمى 1 ياشلار نۇسخىسى قاتارلىق يانفون ئابونتلىرى پائالىيەتكە قاتناشسا بولىدۇ.»

دېمەك، بۇنداق بولغاندا شىياۋمى 1 نىڭ باھاسى 110 يۈەنگە ئۆسىدۇ دېگەپ گەپ، دىققەت قىلىشقا تىگىشلىكى، بۇ يەردە دېيىلغان 100 يۈەن پەقەت يانفون سېتىۋالغاندا ئىشلەتكىلى بولىدىغان ئىتىبار كارتىسى، نەق پۇلغا ئايلاندۇرغىلى بولمايدىكەن. قىسقىسى، تۆت يىل بۇرۇن بازارغا سېلىنغان كونا يانفوننى بازارغا ئاپىرىپ ساتماقمۇ تەس، شۇڭا، 110 يۈەنلىك يىغىۋېلىش باھاسىنى ھەقىقەتەن يامان ئەمەس دېيىشكە بولىدۇ.

ھالبۇكى، بىر قىسىم تورداشلار يەنە شىياۋمى يانفونى 1 نى خاتىرە ئەھمىيىتىگە ئىگە مەھسۇلات دەپ قارايدىغانلىقىنى بىلدۈرگەن، ئۇلارنىڭ قارىشىچە، بۇ يانفوننى سېتىۋەتكەندىن كۆرە، ساقلاپ قويغان ياخشى ئىكەن.