چەتئەل تاراتقۇلىرىنىڭ 20-دېكابىردىكى خەۋىرىگە قارىغاندا، ئامېرىكا جۇمھۇرىيەتچىلەر پارتىيەسىنىڭ زۇڭتۇڭ نامزاتى كىچىك بۇشنىڭ نەۋرە ئىنىسى- جېب بۇش 20-دېكابىر ئامېرىكا كولومبىيە رادىيو شىركىتىنىڭ زىيارىتىنى قوبۇل قىلغاندا مۇنۇلارنى بىلدۈرۈپ: رۇسىيە زۇڭتۇڭى پۇتىننىڭ مەۋجۇت بولۇپ تۇرۇۋاتقانلىقىدىن، ئامېرىكا نۆۋەتتە ئۆزىنىڭ دۇنيا مىقياسىدىكى تەسىر كۈچىنى يوقىتىۋاتىدۇ، دېگەن. ئۇ يەنە «چوڭ ئېغىز» تىرامپنىڭ پۇتىننى ئۇلۇغ رەھبەر دەپ ماختىغان قىلمىشىنى ئەيىبلىگەن.   جېب بۇش مۇنداق دېدى: پۇتىن نۆۋەتتە ئامېرىكىنىڭ دۇنيادىكى تەسىر دائىرىسىگە جەڭ ئېلان قىلىۋاتىدۇ، ئۇ بىزگە مۇتتەھەملىك قىلىشنى ئۆزىنىڭ مۇۋەپپەقىيىتى دەپ بىلىدۇ. بىز ھازىر تەسىر كۈچىمىزنى يوقىتىۋاتىمىز، پۇتىن بولسا بىر چەتتە بىزنى تاماشا قىلىپ تۇرىدۇ.

      جېپ بۇش يەنە مۇنداق دېدى: پۇتىن بىزنىڭ ئىتتىپاقدىشىمىز ئەمەس، ئۇ بولسا بىر مۇستەبىت، مۇتتەھەم. ئۇ يەنە تولۇقلاپ مۇنداق دېدى: رۇسىيە قورال كۈچى ئىشلىتىشكە ئامراق، ئامېرىكىمۇ ئۆزىنىڭ قورال كۈچىنى ئىشلىتىپ خەلقئارا ئىشلىرىدا رۇسىيە بىلەن قارشىلىشىشى كېرەك.

     ئۇ مۇنۇلارنى بىلدۈردى: بىز بىر ياخشى زۇڭتۇڭغا موھتاج، مەيلى ياۋروپادا بولسۇن ياكى ئوتتۇرا شەرق ئىشلىرىدا بولسۇن ئۇ چوقۇم ئامېرىكىنىڭ مەيدانىدا تۇرۇشى كېرەك، مۇشۇنداق بولغاندا ئاندىن پۇتىن بىلەن ياخشى مۇناسىۋەت ئورناتقىلى بولىدۇ.

12-ئاينىڭ 17-كۈنى پۇتىن «چوڭ ئېغىز» تىرامپنى «ئەقىللىق، زۇڭتۇڭ بولۇشقا مۇناسىپ» دەپ ماختىغان، كېيىن تىرامپمۇ پۇتىننى «ھۆرمەتلەشكە ئەرزىيدىغان دۇنيانىڭ غوجىسى» دەپ تەرىپلىگەن.

     ئىگىلىنىشچە، «چوڭ ئېغىز» تىرامپ ئامېرىكا ئوكلاخوما شتاتىدىكى سايلام رىقابىتىدە قوللىغۇچىلىرىغا مۇنۇلارنى بىلدۈرۈپ: مۇشۇنداق دۆلەت ئىچى ۋە سىرتىدا قاتتىق ھۆرمەتكە سازاۋەر كىشى سىزنى ماختىغاندا، سىز ئىنتايىن ئىپتىخارلىنىسىز، بۇ نېمە دېگەن زور شەرەپ. پۇتىننىڭ ھېچ بولمىغاندا زۇڭتۇڭلۇق سالاپىتى بار، ئۇ ئۆزىنىڭ دۆلىتىنى قانداق باشقۇرۇشنى ئوبدان بىلىدۇ، ھەرگىزمۇ بىزنىڭ دۆلىتىمىزدىكى ھېلىقى (ئوباما) غا ئوخشىمايدۇ.