شىنجاڭ ‹‹خۇاچۈن›› يۇڭ توقۇمىچىلىق چەكلىك شىركىتىنىڭ كىيىم – كېچەك ئاخبارات ئېلان قىلىش يىغىنىدا ئىتالىيەلىك لۇگى لايىھەلىگەن كىيىم – كېچەكلەرنى 100گە يېقىن سودىگەر تالىشىپ سېتىۋالدى. بۇ شىنجاڭدا ئىشلەپچىقىرىلغان قوي يۇڭى مەھسۇلاتلىرىنىڭ دۇنياغا يۈزلىنىپ، خەلقئارا بازارغا كىرىۋاتقانلىقىدىن دېرەك بېرىدۇ.
شىنجاڭ ‹‹خۇاچۈن›› يۇڭ توقۇمىچىلىق چەكلىك شىركىتىنىڭ باش دىرېكتورى ۋاڭ لۇچۈەن تونۇشتۇرۇپ مۇنداق دېدى: 2013 – يىلى 1 – ئايدا ئىشلەپچىقىرىشقا كىرىشكەندىن بۇيان، ‹‹خۇاچۈن›› يۇڭ توقۇمىچىلىقىنىڭ يىللىق قوي يۇڭى مەھسۇلاتى 150 مىڭ قۇرغا يەتتى، 2015 – يىلى 6 – ئايغا قەدەر كارخانا قوبۇل قىلغان زاكاز ئۇدا ئىككى يىل بىر ھەسسىگە يېقىن كۆپەيدى، كارخانىنىڭ 2015 – يىللىق مەھسۇلات مىقدارىنىڭ 500 مىڭ قۇردىن ئېشىپ كېتىشى مۆلچەرلەنمەكتە.
ئۇنىڭدىن باشقا، ئېكسپورت قىلىنىدىغان رايونلارمۇ كۆپەيدى، دەسلەپ %80 مەھسۇلات ياۋروپا – ئامېرىكا بازىرىدا سېتىلاتتى، ھازىر ياۋروپا – ئامېرىكا، ياپونىيە، رۇسىيە، شياڭگاڭ ھەم ئەتراپتىكى قوشنا دۆلەت ۋە رايونلارغا سېتىلىدىغان بولدى.
ۋاڭ لۇچۈەن مۇنداق دېدى: ئۈسكۈنىلەرنىڭ كۆپىيىشى، زاكازنىڭ ئېشىشى، خېرىدارلارنىڭ كۆپىيىشى، مەھسۇلات تۈرلىرىنىڭ كۆپىيىشى سېتىش سوممىمىزنىڭ تېز ئېشىشىدىكى ئاساسلىق سەۋەبتۇر. ئىگىلىنىشىچە، شىنجاڭنىڭ يۇڭ توقۇمىچىلىق كەسپىنىڭ ئالدىنقى سەپنى مەڭگۈ ئىگىلىشى ئۈچۈن، ‹‹خۇاچۈن›› يۇڭ توقۇمىچىلىقى شاڭخەيدە تېخنىكا ئېچىش شىركىتى قۇرۇپ، فىرانسىيە، ئىتالىيە قاتارلىق دۆلەتلەردىن خەلقئارادا ئالدىنقى قاتاردا تۇرىدىغان لايىھەلەش ئۇستىلىرىنى تەكلىپ قىلغان، شۇنىڭ بىلەن بىللە، تېخنىكا ئېچىش سالمىقىنى ئۈزلۈكسىز ئاشۇرغان.
كارخانىنىڭ تەرەققىياتى ھۆكۈمەتنىڭ قوللىشىدىن ئايرىلالمايدۇ. 2014 – يىلى 7 – ئايدا ئاپتونوم رايون چىقارغان ‹‹توقۇمىچىلىق، كىيىم – كېچەك كەسپى تەرەققىياتىنىڭ ئىشقا ئورۇنلاشتۇرۇشقا تۈرتكە بولۇشىنى ئىلگىرى سۈرۈش توغرىسىدىكى پىكىر›› بىلەن بىرلا ۋاقىتتا ئېلان قىلغان ئون چوڭ ئېتىبار سىياسىتى باج، تۆۋەن توك ھەققى قاتارلىق نۇرغۇن مەزمۇنغا چېتىلىدۇ. ھۆكۈمەتنىڭ سىياسەت جەھەتتىن قوللىشى بىلەن، ‹‹خۇاچۈن›› يۇڭ توقۇمىچىلىقى تېزلا قەشقەر ئىقتىسادىي تەرەققىيات رايونىنى باشقۇرۇش كومىتېتى بىلەن ئىستراتېگىيەلىك مەبلەغ سېلىش رامكا كېلىشىمنامىسى ئىمزالاپ، يىلىغا 400 مىڭ قۇر قوي يۇڭى مەھسۇلاتى ئىشلەپچىقىرىدىغان قەشقەر يۇڭ توقۇمىچىلىق ئىشلەپچىقىرىش بازىسى قۇرۇلۇشىغا 300 مىليون يۈەن مەبلەغ سېلىشنى پىلانلىدى، كەلگۈسىدە بۇ بازا شىنجاڭدىكى ئەڭ چوڭ قوي يۇڭى ئىشلەپچىقىرىش بازىسىغا ئايلانغۇسى.
ئۇنىڭغا ئۇلاپلا ئاپتونوم رايون يۇڭ توقۇمىچىلىق، كەندىر يىپ مەھسۇلاتلىرىنى شىنجاڭدىن چىقىرىپ توشۇشقا تولۇقلىما بېرىش تۈزۈمىنى ئېلان قىلدى، شىنجاڭدىن چىقىرىلىدىغان يۇڭ توقۇلما، يىپ مەھسۇلاتلىرىنىڭ ھەر توننىسىغا 1000 يۈەن ۋە 800 يۈەن تولۇقلىما بېرىلىدۇ. ۋاڭ لۇچۈەن مۇنداق دېدى: ‹‹خۇاچۈن›› يۇڭ توقۇمىچىلىقى تولۇقلىما بېرىلىدىغان تۈرلەرنى ئىلتىماس قىلدى. ياخشى سىياسەتلەر كارخانىنىڭ تەرەققىياتىغا نىسبەتەن تۈرتكىلىك رول ئوينايدۇ، تۆۋەن توك ھەققى سىياسىتىنى ئېلىپ ئېيتساق، كارخانىغا ئايدا 20 مىڭ يۈەن تېجەپ بېرىدۇ.