38 ياشلىق سىچۇەنلىك ئايال جاڭ لى (ئۆزگەرتىلگەن ئىسىم) ئاددىي تۇرمۇشىغا قانائەت قىلماي، توردا مۇھەببەتلىشىشكە باشلىدى. ئۇتۇق قازىنىش نىسبىتىنى يۇقىرى كۆتۈرۈش ئۈچۈن ئۇ 18 ياشلىق قىزىنىڭ سۈرىتىنى باش سۈرەت قىلىپ توردا باشقىلار بىلەن تونۇشتى، ھەمدە ئوڭۇشلۇق ھالدا 80-يىلىدىن كېيىن تۇغۇلغان بىر يىگىت بىلەن توردا مۇھەببەتلەشتى. ئۇ ئاجرىشىپ كېتىپ، بۇ ياش يىگىتى بىلەن توي قىلماقچى بولغاندا ئادەمنى ھەيران قالدۇرىدىغان بىر ئىش يۈز بەردى......

2012-يىلى جاڭ لى باشقىلارنى جەلىپ قىلىش كۈچىنى يۇقىرى كۆتۈرۈش ئۈچۈن 18 ياشلىق چىرايلىق قىزىنىڭ سۈرىتىنى ئۆزىنىڭ QQ باش سۈرىتى قىلىۋالدى، يەنە تېخى ئۆزىنى 1992-يىلى تۇغۇلغان دېدى. توردا ئۇ 90-يىلىدىن كېيىن تۇغۇلغان بىر گۈزەل قىزغا ئايلاندى.

بىر مەزگىلدىن كېيىن گۇاڭدوڭدا ئىشلەمچىلىك قىلىۋاتقان جاڭ لى توردا ئۆزىدىن توققۇز ياش كىچىك گاۋ لې (ئۆزگەرتىلگەن ئىسىم) بىلەن تونۇشۇپ قالدى. گاۋ لې چوڭچىڭدىن بولۇپ، شاڭخەيدە ئۇزۇن مەزگىل ئىشلەمچىلىك قىلغان ئىدى.

گاۋ لې جاڭ لىغا قىزىقىپ قالدى، ئۇلار ئادەتتىمۇ بىر-بىرىگە يېقىن مۇئامىلە قىلدى، ھەتتا توي قىلىش دەرىجىسىگىمۇ يېتىپ باردى، جاڭ لى بۇنىڭدىن ھاياجانلاندى.

بىر يىل بۇرۇن گاۋ لې جاڭ لى بىلەن كۆرۈشۈش تەلىپىنى ئوتتۇرىغا قويدى. ئالدى-كەينى ئويلاشقاندىن كېيىن جاڭ لى ئۆزىنىڭ كىملىكىنى سۈرەتكە تارتىپ گاۋ لېغا ئەۋەرتىپ بەردى، ھەمدە سەمىمىيلىك بىلەن بۇ مەزگىللىك مۇناسىۋەتنى ئاخىرلاشتۇرماقچى بولدى.

«ئۇ توردا خۇددى كىچىك قىزلارغىلا ئوخشايتتى، مەن ئۇنىڭ 40 قا يېقىنلاشقان توي قىلغان ئايال ئىكەنلىكىگە ئىشەنمەيمەن.» گاۋ لې جاڭ لىنىڭ كىملىكىنىڭ سۈرىتىنى كۆرگەندىن كېيىن جاڭ لى ئۆزىنى سىناۋاتىدۇ دەپ ئويلىغان، ھەمدە ئۇنىڭ بىلەن چوقۇم كۆرۈشۈش نىيتىگە كەلگەن. ئۆزىنىڭ سەمىمىيلىكىنى ئىپادىلەش ئۈچۈن گاۋ لې جاڭ لىغا:«سىز قېرى خوتۇن بولسىڭىزمۇ سىزنى چوقۇم ئالىمەن، سىز بىلەن قېرىغىچە بىللە ياشايمەن!» دېگەن.

گاۋ لېنىڭ بۇ سۆزلىرىنى ئاڭلاپ جاڭ لى بەكمۇ تەسىرلەنگەن. گاۋ لې گۇاڭجۇغا كېلىپ جاڭ لى بىلەن كۆرۈشمەكچى بولغان، ئويلىمىغان يەردىن جاڭ لىنىڭ ئوبرازى گاۋ لېنىڭ خىيالىدىكى بىلەن پەقەتلا ئوخشىمىغان. گاۋ لې ئامالسىز باھانە كۆرسىتىپ، نەچچە كۈندىن كېيىنلا گۇاڭجۇدىن شاڭخەيگە قايتىپ كەتكەن.

گاۋ لې ئاستا-ئاستا بۇ غەيرىي مۇناسىۋەتنى ئاخىرلاشتۇرماقچى بولغان. گاۋ لې ئايرىلىپ كېتىش مەقسىتىنى ئېنىق ئىپادىلىمىگەچكە، جاڭ لى ئۇنىڭ بىلەن داۋاملىق مۇھەببەتلىشىش نىيتىگە كەلگەن. نەچچە ئايدىن كېيىن جاڭ لى يولدىشى بىلەن ئاجرىشىپ كەتتى، ھەمدە شاڭخەيگە كېلىپ گاۋ لېغا ئەگەشتى.

جاڭ لى بىلەن بولغان مۇناسىۋىتىنى تۈپتىن ئۈزۈش ئۈچۈن گاۋ لې دادام ماشىنا ھادىسىسىگە ئۇچرىدى دېگەننى باھانە قىلىپ يۇرتىغا قايتىپ كەتتى. جاڭ لى تېلېفون ئارقىلىق گاۋ لې بىلەن ئالاقىلاشماقچى بولغان بولسىمۇ لېكىن ئۇنىڭ تېلېفونى ئۇلانمىدى.

گاۋ لې نى تېپىش ئۈچۈن جاڭلى شاڭخەيدىن سىچۇەنگە ياردەمچى ئىزدەپ كەلگەن، دوسىت-بۇرادەرلىرى ۋە ئۇرۇغ-تۇغقانلىرىنىڭ ھەممىسى ئۇنىڭغا بولدى قىلىش توغرىسىدا نەسىھەت قىلغان. پەقەت قىزىلا ئۇنىڭغا ياردەملىشىپ گاۋ لېنى ئىزدىمەكچى بولغان.

جاڭ لى قىزىنى ئېلىپ چوڭچىڭدىكى گاۋ لېنىڭ يۇرتى دازۇغا كەلگەن. 12-ئاينىڭ 6-كۈنى ئۇلار گاۋ لېنىڭ ئۆيىگە بارغان. گاۋ لې ئۆيىدە يوق بولۇپ، ئىككىنچى كۈنى جاڭ لى گاۋ لېنىڭ دادىسىنىڭ ماشىنا ۋەقەسىگە يولۇقمىغانلىقىنى بىلىپ، ئۇرۇش-جىدەل قىلىشقا باشلىغان، گاۋ لېنىڭ ئۆيىدىكى ئاشخانىنىڭ ياغاچ ئىشىكىنى تىپىپ سۇندۇرىۋەتكەن، ھەمدە كارۋاتتا يېتىۋېلىپ كەتكىلى ئۇنىمىغان. شۇنىڭ بىلەن گاۋ لېنىڭ ئانىسى ساقچىغا مەلۇم قىلىپ ياردەم سورىغان.

خەلق ساقچىلىرى خىزمەت ئىشلىشى بىلەن جاڭ لى ئاخىرى گاۋ لې بىلەن ئايرىلىپ كېتىشكە قوشۇلغان. گاۋ لېمۇ تېلېفوندا جاڭ لىدىن كەچۈرۈم سورىغان، ھەمدە ئۇلارنىڭ يول پۇلىنى تۆلىگەن.