جاھان ئاگېنتلىقى 26-مارت خەۋىرى؛ لەگلەك تورى تەرجىمىسى: تۈركىيە پرېزىدېنتى رەجەب تاييىب ئەردوغان، سەئۇدى ئەرەبىستاننىڭ يەمەنگە قاراتقان ھەربىي مۇداخىلىسىنى قوللايدىغانلىقىنى تەكىتلەپ، «ئىران رايۇنغا ھاكىم بولۇشقا تىرىشىۋاتىدۇ. بۇنىڭغا رۇخسەت قىلىنمايدۇ، بۇ ئەھۋال بىزنى ۋە قولتۇق دۆلەتلىرىنى بىئارام قىلماقتا» دېدى.
تۈركىيە پرېزىدېنتى ئەردوغان، ئاخبارات ئېلان قىلىش يىغىنىدا يەمەن ھەرىكىتىگە ئالاقىدار سۇئاللارغا جاۋاب بەردى. ئەردوغان ئىراننىڭ سۇرىيە ۋە ئىراقتىكى تۇقۇنۇشلارغا ئارىلىشىشنى ئەيىپلەپ مۇنداق دېدى: «يەمەندە ھۇسىي شىئە قۇراللىقلىرىنىڭ ھەرىكەتلىرى مەزھەرب تۇقۇنىشىدۇر. بۇ ئادەتتە شىئە-سۈننىي تۇقۇنىشىغا ئايلاندى. بىز بۇنداق بولۇشىغا ئىجابىي قارىمايمىز. يەمەن ئۆز ئىچىدە بۆلۈنۈشكە قاراپ ماڭماقتا. بىز يەمەن خەلقىنىڭ ھەممىسىنى قېرىندىشىمىز دەپ قارايمىز. شۇئاندا ھەربىي ساھەدە ياردەم بېرىشتە بىر نەرسە دىيەلمەيمەن. ئەمما ھەر قايسى ساھەلەردە ياردەم بېرىشنى داۋاملاشتۇرىمىز. ئىراننىڭ بۈگۈنگە قەدەر رايۇندا يۈرگۈزگەن سىياسەتلىرى ۋە ھەرىكەتلىرى نۇرغۇن دۆلەتلەرنىڭ غەزىپىنى قوزغىماقتا. ئىران رايۇنغا ھاكىم بولۇشقا تىرىشىۋاتىدۇ. بۇنىڭغا رۇخسەت قىلىنمايدۇ. ئىراننىڭ قىلمىشى بىزنى بىئارام قىلماقتا. ئىران بۇنى ئويلىنىشى لازىم. ئىراققا قارىساق، بىر تەرەپتىن ئىراق ۋە شام ئىسلام دۆلىتى تەشكىلاتى بىلەن تۇقۇنىشىۋاتىدۇ، يەنە بىر تەرەپتىن ئىران ئىراققا ئەۋەتكەن ئىنقىلاب مۇھاپىزەتچىلىرى بىلەن. ئىراننىڭ يەمەن ، سۇرىيە ۋە ئىراقتىن ھەرقايسى كۈچىنى چېكىندۈرۈشى لازىم. بۇ دۆلەتلەرنىڭ زېمىن پۈتۈنلىكىگە ھۆرمەت قىلىشىمىز كىرەك» دېدى.
ئەردوغان فرانسىيە 24 قانىلىنىڭ سۇئالىغا جاۋاب بېرىپ، «سەئۇدى ئەرەبىستان باشچىلىقىدا مىسىر ۋە قولتۇق دۆلەتلىرىنىڭ يەمەن ھەرىكىتىنى قوللايدىغانلىقىنى ئېيتىپ، شۇئاندا داۋاملىشىۋاتقان ھەرىكەتلەر يەمەننىڭ كىلەچىكى نوقتىسىدىن مۇھىم دەپ قارايمەن. ۋە بىز بۇ سىياسىي جەھەتتىكى قوللىشىمىزنى داۋاملاشتۇرىمىز» دېدى.
ئەردوغان، ئىراننىڭ سۇرىيەدە ئەسەد ھۆكۈمىتىنى ئىنقلاب مۇھاپىزەتچىلىرىنى ئەۋەتىپ قوللىشى، ئىراقتا شىئە قۇراللىقلارنى ئەۋەتىشى ۋە يەمەندە شىئە ھۇسىي ھەرىكىتىنى قوللىشى ئارقىلىق رايۇندىكى نۇپۇزىنى ئاشۇرۇش ۋە رايۇنغا ھاكىم بولۇشنى مەقسەت قىلىۋاتقانلىقىنى ئىپادىلىدى.