بۇ ئىككى كۈندە، تېلېفۇن ئارقىلىق 12306 تېرمىنالىدا بېلەت سېتىۋالغاندا ئەسكەرتىش چىقىپ، تېلېفۇندا قوش يۆنىلىشلىك دەللىللەش مۇلازىمىتى ئېلىپ بېرىشنى تەلەپ قىلغان. مۇخبىرلارنىڭ تۆمۈر يول تارماقلىرىدىن ئەھۋال ئىگىلىشىچە، بۇ سالاھىيەت ئۇچۇرىنىڭ ئوغرىلىنىشىنىڭ ئالدىنى ئېلىش ئۈچۈن ئىكەن، شۇنىڭ بىلەن بىر ۋاقىتتا قوش يۆنىلىشتە دەللىللىنىپ بولغاندىن كېيىن، يولۇچىلار ئىشلەتكۈچى نامىنى ئۇنتۇپ قالغان تەقدىردىمۇ تېلېفۇندا بىۋاسىتە تىزىملىتالايدىكەن.

   12306 قوش يۆنىلىشلىك دەللىللەش قىسقا ئۇچۇرى

   تۆمۈر يول تارماقلىرىنىڭ تەلىپىگە ئاساسەن، 12-ئاينىڭ 2-كۈنىدىن بۇرۇن دەللىللەش تاماملىنىدىكەن، مۇنداقچە ئېيتقاندا ئەتىدىن باشلاپ، تەكشۈرۈشتىن ئۆتمىگەن يولۇچىلار بۇنىڭدىن كېيىن توردا بېلەت سېتىۋالالمايدىكەن.

   توردا بېلەت سېتىۋالغاندا، مەيلى كومپىيوتېر ياكى تېلېفۇن تېرمىنالى بولسۇن، تىزىملاتقان ۋاقىتتا كىملىك نومۇرى بىلەن تېلېفۇن نومۇرىنى قالدۇرىدىغان بولۇپ، تېلېفۇن نومۇرىدا بېلەت سېتىۋېلىش ئۇچۇرىنى قوبۇل قىلىدىكەن. بۇ قوش يۆنىلىشلىك دەللىللەشتە، كىملىك نومۇرى ۋە تېلېفۇن نومۇرى باغلىنىدىكەن.

   ئەسكەرتىشكە ئاساسەن، ئابونت دەسلەپتە تىزىملاتقاندا قالدۇرۇپ قويغان تېلېفۇن نومۇرىدا «999» نى 12306 غا يوللاپ، تاپشۇرۇۋالغان دەللىللەش نومۇرىغا ئاساسەن، كىملىك ئۇچۇرى ۋە تېلېفۇن ئۇچۇرىنى تەكشۈرۈپ دەللىللەش ئاخىرلىشىدىكەن، ئاندىن 12306 تور بېكىتىدە ياكى تېلېفۇن تېرمىنالىدا قايتا تىزىملىتىدىكەن.

   تىزىملىتىشقا قولايلىق يارىتىلىشتىن باشقا، قوش يۆنىلىشلىك دەللىللەشتە يەنە بىر مۇھىم ئىقتىدارى كىملىك نومۇرىنىڭ سۈيئىستېمال قىلىنىشى ياكى ئوغرىلىنىشىنىڭ ئالدىنى ئالغىلى بولىدىكەن.

   تۆمۈر يول تارماقلىرىنىڭ دېيىشىچە، ناۋادا قوش يۆنىلىشلىك دەللىللەشتە «كىملىك ئۇچۇرىنى قايتىلاڭ» دېگەن ئەسكەرتىش كۆرۈنسە، مەزكۇر كىملىكتە باشقىلارنىڭ تىزىمغا ئالدۇرۇپ بولغانلىقىنى بىلدۈرىدىكەن، بۇ ۋاقىتتا ئىناۋەتلىك كىملىكنىڭ ئەسلى نۇسخىسىنى ئېلىپ ۋوگزالنىڭ بېلەت سېتىش كۆزنىكىدە قايتا ئەسلىگە كەلتۈرۈشكە توغرا كېلىدىكەن، باشقىلارنىڭ بېجىرىشىگە ھاۋالە قىلىشىغا بولمايدىكەن. كۆزنەكتە بىر تەرەپ قىلىپ بولغاندىن كېيىن، تىزىمغا ئالدۇرغان ئابونت 12306 تور بېكىتىدە كىملىك ئۇچۇرىنى ئۆزگەرتىدىكەن.

   نۆۋەتتە تۆمۈر يول تارماقلىرى پۇرسەتنى قولدىن بېرىپ قويغان يولۇچىلارنىڭ بۇندىن كېيىن قانداق قىلغاندا توردا بېلەت سېتىۋالالايدىغانلىقىنى مۇزاكىرە قىلىۋېتىپتۇ.

   نۆۋەتتىكى ئەھۋالدىن قارىغاندا، قوش يۆنىلىشلىك دەللىللەش ئىنتايىن مۇھىم بولۇپ، ھازىرقى ۋوگزالغا كىرىش بەلگىلىمىسىگە ئاساسەن، بېلەت، كىملىك، ئادەم بىردەك بولغاندىلا، ئاندىن ۋوگزالغا كىرەلەيدىكەن، مۇنداقچە ئېيتقاندا بېلەت سېتىۋالغۇچى بىلەن كىملىك ۋە بېلەت ئۇچۇرى بىردەك بولغاندىلا ئاندىن ۋوگزالغا كىرەلەيدىكەن، بولمىسا بىخەتەرلىك تەكشۈرۈش ئېغىزىدا توسۇۋېلىنىدىكەن. شۇڭلاشقا، ئەگەر ئۇچۇر بىردەك بولمىسا، ۋوگزالغا كىرەلمەي قېلىشتەك ئوسال ئەھۋال يۈز بېرىشى مۇمكىنكەن.