ب د ت تورىنىڭ 30-نويابىردىكى خەۋىرىگە قارىغاندا، 1-دېكابىر دۇنيا ئەيدىز كۈنى يېتىپ كېلىش ھارپىسىدا ب د ت سىستېمىسى تۈرلۈك پائالىيەتلەرنى ئۆتكۈزۈپ، تەتۈر يۆتكىلىش ۋىرۇسىغا تاقابىل تۇرۇش داۋالاش ئۇسۇلى(抗逆转录病毒疗法)نى ئەيدىز بىلەن يۇقۇملانغان بارلىق كىشىلەر توپىغا كېڭەيتىپ، كېيىنكى ئەۋلادلاردا ئەيدىز بولماسلىقنى ئىشقا ئاشۇرۇشقا چاقىرىق قىلغان.

   دۇنيا سەھىيە تەشكىلاتى 31-ئۆكتەبىر مىڭ يىللىق تەرەققىيات نىشانىدىكى ئەيدىز يۇقۇم ئەھۋالىنى كونترول قىلىش نىشانىنىڭ ئاللىقاچان مۇددەتتىن بۇرۇن ئەمەلگە ئاشقانلىقىنى ئېلان قىلغان. بۇ غايەت زور مۇۋەپپەقىيەت تەتۈر يۆتكىلىش ۋىرۇسىغا تاقابىل تۇرۇش داۋالاش ئۇسۇلى بىلەن زىچ مۇناسىۋەتلىك.

        دۇنيا سەھىيە تەشكىلاتى كۆرسىتىپ، تەجرىبىلەردىن ئەيدىز ۋىرۇسى بىلەن يۇقۇملانغۇچىنىڭ يۇقۇملانغاندىن كېيىن دەرھال تەتۈر يۆتكىلىش ۋىرۇسىغا تاقابىل تۇرۇش دورىلىرىنى ئىشلەتسە، ئۇنىڭ ساغلام ھالەتنى ساقلاپ تۇرۇشىنىڭ ئېھتىمالغا تېخىمۇ يېقىن ئىكەنلىكىنى، شۇنداقلا ۋىرۇسنى باشقىلارغا تارقىتىش پۇرسىتى ئازلايدىغانلىقىنى؛ يۇقۇملىنىش خەۋپى ئېغىر كىشىلەر بولسا بۇ خىل دورىلارنى ئىشلەتسە بۇنىڭ يۇقۇملىنىشنىڭ ئالدىنى ئېلىشتىكى يېڭى بىر چارە ئىكەنلىكىنى؛ بۇنىڭ بىلەن بىر ۋاقىتتا، ئەيدىز ۋىرۇسى بىلەن يۇقۇملانغان ئانا تەتۈر يۆتكىلىش ۋىرۇسىغا تاقابىل تۇرىدىغان دورىلارنى ئىشلەتسە، ۋىرۇسنىڭ بوۋاققا ئۆتۈپ كېتىش پۇرسىتىنى ئازايتىدىغانلىقىنى ئېيتقان.

      تەتۈر يۆتكىلىش ۋىرۇسىغا تاقابىل تۇرۇش داۋالاش ئۇسۇلى ئەيدىزگە ئالاقىدار ئۆلۈش نىسبىتىنى تۆۋەنلىتىش بىلەن بىر ۋاقىتتا، يېڭى يۇقۇملانغۇچىلار نىسبىتىنى ئازايتقان. 2004-يىلى ئەيدىز يۇقۇمى «يۇقىرى پەللە»گە چىققاندىن ھازىرغا قەدەر، ئەيدىز بىلەن ئۆلۈش نىسبىتى پۈتۈن دۇنيادا %42 تۆۋەنلىگەن، يېڭى يۇقۇملانغۇچىلار سانى 2000-يىلدىن بۇيان %35 تۆۋەنلىگەن. بولۇپمۇ تەتۈر يۆتكىلىش ۋىرۇسىغا تاقابىل تۇرۇش داۋالاش ئۇسۇلى ئافرىقىدا ئومۇميۈزلۈك كېڭەيتىلگەن، 2000-يىلى پەقەت 11 مىڭ ئادەم بۇ داۋالاش ئۇسۇلىنى قوبۇل قىلغان بولسا، ھازىر بۇ سان 11 مىليونغا يەتكەن.

     بۇ يىلقى دۇنيا ئۇچرىشىشى مەزگىلىدە، ھەر قايسى دۆلەت رەھبەرلىرى بىردەك ھالدا يېڭى سىجىل تەرەققىيات نىشانىنى ماقۇللىغان، بۇنىڭ ئىچىدە 2030-يىلىغا بارغاندا ئەيدىز يۇقۇمىنى تەلتۆكۈس تۈگىتىش نىشانى بار. دۇنيا سەھىيە تەشكىلاتى تەكىتلەپ، بۇ نىشاننى ئەمەلگە ئاشۇرۇش ئۈچۈن 2020-يىلىغا بارغاندا يېڭى يۇقۇملانغۇچىلار سانىنى ھازىرقىدىن %75 تۆۋەنلىتىش، شۇنداقلا تەتۈر يۆتكىلىش ۋىرۇسىغا تاقابىل تۇرۇش داۋالاش ئۇسۇلىنى قوبۇل قىلغانلار سانىنى بىر ھەسسە كۆپەيتىشنىڭ ئىنتايىن مۇھىم ئىكەنلىكىنى ئېيتقان.