شىنجاڭ تورى خەۋىرى: دۆلەت يولى 314-لىنىيەسىنىڭ تۇرپان-ئۈرۈمچى يۆنىلىشىدىكى خوگېل ئەگمە كۆۋرۈكى بۆلىكىدە تۈنۈگۈن (26-ئاپرېل) سائەت 15:40 دە بىر قارا رەڭلىك پىكاپ ئۆزلۈكىدىن كۆيۈپ كېتىپ، نەچچە يۈز ئاپتوموبىل بۇ يولدا بىر سائەت توسۇلۇپ قالدى، ئۆچىرەت ئۇزۇنلۇقى ئۈچ كىلومېتىرغا يەتتى.
بۇ پىكاپنى ھەيدىگەن ياڭ ئۇستامنىڭ ئېيتىشىچە، ياڭ ئۇستامنىڭ ئىدارىسىدىكىلەر تۇرپانغا ئىش بېجىرگىلى بېرىش ئۈچۈن ئاپتوموبىل ئىجارىگە بېرىش شىركىتىدىن بۇ پىكاپنى ئىجارىگە ئالغان بولۇپ، ياڭ ئۇستام تۇرپاندىن ئۈرۈمچىگە قايتىۋاتقاندا پىكاپنىڭ موتور قىسمىدىن ئىس چىقىۋاتقانلىقىنى بايقاپ، تەكشۈرمەكچى بولۇپ توختاپ قاپقاقنى ئاچقاندا، قاپقاق ئىچىگە ئاللىقاچان ئوت كەتكەنلىكىنى بايقىغان ۋە دەرھال ئوت ئۆچۈرۈش ئۈسكۈنىسىنى چىقىرىپ ئوتنى ئۆچۈرمەكچى بولغان بولسىمۇ ئوتنى كونترول قىلالمىغان. ئەھۋالنى كۆرگەن باشقا يولۇچىلار توختاپ ياردەمگە كەلگەن، تۆت دانە ئوت ئۆچۈرۈش ئۈسكۈنىسىمۇ ئوتنى ئۆچۈرەلمىگەندىن كېيىن ئۇلار «119»غا تېلېفون قىلىپ ياردەم سورىغان.
شۇ كۈنى سائەت 16:37دە داۋانچىڭ رايونلۇق خەلق ھۆكۈمىتى مەخسۇس ئوت ئۆچۈرۈش ئەترىتىنىڭ بىر ئاپتوموبىلى نەق مەيدانغا كېلىپ، بەش مىنۇتقا قالمايلا ئوتنى ئۆچۈرۈۋالغان، بىراق، پىكاپنىڭ تۆمۈرلىرىلا قالغان. ئارقىدىن داۋانچىڭ قاتناش ساقچىلىرىنىڭ يولنى ئېچىشى بىلەن بۇ يولدا قاتناش ئەسلىگە كەلگەن.
نۆۋەتتە، ھادىسىنىڭ سەۋەبى تەكشۈرۈلىۋېتىپتۇ.