ئاۋات شەھەرنىڭ يېڭى پۇقراسى

ئاۋات شەھەرنىڭ يېڭى پۇقراسى

ئاپتورى:ئابدۇراخمان قاھار

باھاسى:47.00

2009-يىلى 8-ئاي 1-نەشرى

 2009-يىلى 8-ئاي 1-بېسىلىشى

تىراژى:3000

isbn:9787228128228

                                                                             مۇقەددىمە

    ئۇلار ئىككىسى – ئابدۇقادىر بىلەن ھەسەنجان قىزىق توپىغا ئاياغ بېسىپ ئالدىراپ ماڭدى . بىرى يەنە بىرىگە بىر كارامەت كۆرسەتمەكچى .

   – مەن بۈگۈن قالتىس بىر ئىش قىلىۋەتتىم .

   – شۇنداقمۇ ؟

   -بارغاندا كۆرىسەن، ھەيران قېلىشىڭ مۇمكىن .

    ھەيران قالغۇدەك قانچىلىك ئىشتۇ؟ تۈگمىدەك ئىشنى تۆگىدەك قىلىپ سۆزلەيدىغان نەرسە بولىدىغان بۇ … ھەسەنجان ئاتلىقى شۇنداق ئويلىغان بولسىمۇ ، لېكىن ئۇنىڭ دېگىنىگە قىزىقىپ قالدى .

   – قالتىس دېگىنىڭ چاغلىقلا ئىشتۇر ؟

   -چاغلىقلا دەيسەنغۇ ، قىز ئەپقېچىپ كەلدىم ، قىز .

   – پاھ ، كىمنى؟

   – ماھىنۇرنى.

   – قايسى ماھىنۇر؟

   -شەمشىنۇرنىڭ سىڭلىسىچۇ .

   – نېمە سەن ئۇنىڭ ھەدىسى بىلەن يۈرۋاتساڭ …

   -ئىككىسى بىلەن تەڭ يۈرگەن .

    ھەقىقىي ئادەم باشقىلارنىڭ ئىنسانىي قەدىر – قىممىتىنىڭ يەرگە ئۇرۇۋاتقانلىقىنى كۆرسە ياكى بىلسە ، ئۆزىنىڭمۇ ئىنسانىي  قەدىر – قىممىتى يەرگە ئۇرۇلۇۋاتقاندەك ھېسسىياتقا كېلىدۇ . ھەسەنجاننىڭ ۋۇجۇدى بىردىنلا قوزغالغان نەپرەتتىن سىلكىنىپ كەتتى . بەدەنلىرى تىكەنلەشتى ، يۈز – كۆزلىرىگە ھەم غەزەپلىك ، ھەم ھەيرانلىق ئالامەتلىرى شۇئان ئوقچۇپ چىقتى . ئابدۇقادىرنىڭ غەلىتە سۆزلىرى بىلەن ئۇ بىرەر گۇناھ ئۆتكۈزۈپ قويغان ئادەمدەك بېشىنى ساڭگىلاتتى . ئۇ ئەقىل – ھوشىنى بىلگەندىن تارتىپ ھازىرغىچە مۇنداق غەلىتىلىكنى ئاڭلاپ باقمىغانىدى . تېخى ئۇنىڭ ئوغىسىنى قاينىتىپ، ، ئابدۇقادىرنىڭ چىرايىدا شادلىق – مەغرۇرلۇقنىڭ ئەكس ئېتىپ تۇرغىنىچۇ … ماھىنۇرنىڭ نېمە قىلغىنىدۇ بۇ ؟ ئۇ ھەدىسىنى ، ئاتا – ئانىسىنى ئويلىمىدىمىكىنە ؟… كىچىكلىكىدۇر بەلكىم ، بۇ ئىشنىڭ ئاقىۋىتىنى ئويلاپ يىتەلمىدى – دە.