ئىز تورى-爱智网

　　

جۇڭگو ئۇيغۇرچە رادىيو تورى 11-مارت بېيجىڭ خەۋىرى: 10-مارت ياپونىيەنىڭ ھاكىمىيەت بېشىدىكى دېموكراتلار پارتىيىسىنىڭ دائىمىي باش ئىش بېجىرگۈچىسى، ئاۋام پالاتاسى ئەزاسى رايئۇچى دۇي كورىيەدە ياپونىيەنى تاكى-شىما ئارىلىنىڭ ئىگىلىك ھوقۇقىدىن ۋاز كېچىشنى تەلەپ قىلىدىغان بىرلەشمە باياناتقا قول قويغانلىقى ئۈچۈن، ئاۋام پالاتاسى سىياسىي ئەخلاقنى تەكشۈرۈش كومىتېتىنىڭ باشلىقىدىن ئىستېپا بەردى. ياپونىيە ئاخبارات ۋاستىلىرىنىڭ خەۋىرىگە قارىغاندا، رايئۇچى دۇي شۇكۈنى مۇخبىرلارنى كۈتۈۋېلىش يىغىنىدا بۇ مەسىلىدىكى سىياسىي مەسئۇلىيەتتىن قاچالمايدىغانلىقىنى، دېموكراتلار پارتىيىسى دائىمىي باش ئىش بېجىرگۈچىلىكىنى ئۆز ئىچىگە ئالغان بارلىق ۋەزىپىلىرىدىن ئىستېپا بىرىدىغانلىقىنى ئېيتقان.ئۇ مۇنداق دېگەن: ئەينى ۋاقىتتا مەن بىرلەشمە باياناتنىڭ مەزمۇنىنى ئەستايىدىل كۆرمەپتىمەن، بۇ ئىش ئۈچۈن بارلىق خەلق ئاممىسىدىن كەچۈرۈم سورايمەن. تاكى-شىما ئارىلى چاۋشيەن يىرىم ئارىلىنىڭ شەرقىي دېڭىز رايونىغا جايلاشقان، يەر كۆلىمى 0.18 كۋادرات كىلومېتىر. چاۋشيەن، كورىيە ۋە ياپونىيەنىڭ ھەممىسى ئۆزلىرىنىڭ بۇ ئارالنىڭ ئىگىلىك ھوقۇقىغا ئىگە ئىكەنلىكىنى جاكارلىغان، نۆۋەتتە بۇ ئارال كورىيەنىڭ كونتروللىقىدا.