2013-يىلى 1-پەسىلدە شىنجاڭنىڭ ئىشلەپچىقىرىش ئومۇمىي قىممىتى 119 مىليارد 32 مىليون يۈەنگە يېتىپ، باھاغا سۇندۇرۇپ ھېسابلىغاندا، ئالدىنقى ئوخشاش مەزگىلدىكىدىن % 10.3 ئېشىپ، پۈتۈن مەملىكەتنىڭ 2.6 يۈز نۇقتىسىدىن يۇقىرى تۇرغان، ئېشىش سۈرئىتى پۈتۈن مەملىكەتنىڭ رەت تەرتىپىدە ئالدىنقى يىلىدىكى ئوخشاش مەزگىلدىكى 16-ئورۇندىن 12-ئورۇنغا ئۆرلىگەن.
شىنجاڭ ئۇيغۇر ئاپتونوم رايونلۇق ئىستاتىستىكا ئىدارىسى 19-ئاپرېل ئاخبارات ئېلان قىلىش يىغىنى ئېچىپ، 2013-يىلى 1-پەسىلدىكى ئاپتونوم رايوننىڭ خەلق ئىگىلىكىنىڭ يۈرۈشۈش ئەھۋالىنى ئېلان قىلدى. شىنجاڭ ئۇيغۇر ئاپتونوم رايونلۇق ئىستاتىشتىكا ئىدارىسى پارتگۇرۇپپىسىنىڭ ئەزاسى، مۇئاۋىن ئىدارە باشلىقى، ئاخبارات باياناتچىسى ۋاڭ يۆ مۇنداق دېدى: شىنجاڭنىڭ بۇ يىلقى ۋەزىيىتى ئىنتايىن ياخشى. ئېشىش سۈرئىتى، قۇرۇلمىلارنى تەڭشەش ۋە خەلق تۇرمۇشىنى ياخشىلاش قاتارلىق جەھەتلەردىكى ئەھۋاللاردىن قارىغاندا، شىنجاڭنىڭ ئىقتىسادىي تەرەققىياتىنىڭ ئىچكى ھەرىكەتلەندۈرگۈچ كۈچى ئۈزلۈكسىز ئېشىۋاتقان، سۈپىتى ۋە ئۈنۈمى ئۈزلۈكسىز يۇقىرى كۆتۈرۈلۈۋاتقان بولۇپ، بۇنى بىر ياخشى ۋەزىيەت، مۇقىملىق ئىچىدە ئالغا ئىلگىرىلەش دېيىشكە بولىدۇ.
