شىنخۇا تورىنىڭ 1- ئۆكتەبىر توكيودىن ئەۋەتكەن تېلېگراممىسى: 10- ئاينىڭ 1- كۈنىدىن باشلاپ، ياپونىيە نېفىت، تەبئىي گاز قاتارلىق يېقىلغۇلاردىن «يەر شارىنىڭ ئىللىپ كېتىشىگە تاقابىل تۇرۇش بېجى»، يەنى مۇھىت بېجى يىغىدۇ. بۇ باج ئېنېرگىيە تېجەيدىغان، مۇھىت ئاسرايدىغان مەھسۇلاتلار تولۇقلىمىسى، ھاسىلىي ئېنېرگىيەنى ئومۇملاشتۇرۇش قاتارلىقلارغا ئىشلىتىلىدۇ.

ياپونىيە ھۆكۈمىتى بۇ يىل 3- ئايدا مۇھىت بېجى تەسىس قىلغانلىقى، 10- ئاينىڭ – كۈنىدىن باشلاپ باج يىغىلىدىغانلىقىنى قارار قىلغانىدى. ھازىر يىغىلىدىغان مۇھىت بېجىنىڭ ئۆلچىمى مۇنداق: ھەر مىڭ لېتىر نېفىتتىن 250 يېن (تەخمىنەن 3.2 ئامېرىكا دوللىرى)، ھەر توننا تەبئىي گازدىن 260 يېن (تەخمىنەن 3.3 ئامېرىكا دوللىرى)، ھەر توننا كۆمۈردىن 220 يېن (تەخمىنەن 2.8 ئامېرىكا دوللىرى) باج ئېلىنىدۇ. 2014- يىلى ۋە 2016- يىلى يەنە باسقۇچقا بۆلۈنۈپ باج ئېلىش ئۆلچىمى ئۆستۈرۈلىدۇ. مۆلچەرلىنىشچە 2016- يىلىغا بارغاندا، ھەر يىلى يىغىلىدىغان مۇھىت بېجى 262 مىليارد 300 مىليون يېن (تەخمىنەن ئۈچ مىليارد 370 مىليون ئامېرىكا دوللىرى) غا يېتىدىكەن.

مۇھىت بېجى ياپونىيەدىكى تاشقا ئايلانغان يېقىلغۇ ئىشلىتىدىغان ھەر قايسى ئېلېكتر ئېنېرگىيە شىركەتلىرى ۋە يېقىلغۇ گاز شىركەتلىرىدىن ئېلىنىدۇ، ئەمما ئاخىرىدا يەنىلا ماي باھاسى، توك ھەققى ۋە يېقىلغۇ گاز ھەققى ئىستېمالچىلارغا يۈكلىنىپ قالىدۇ. ياپونىيە مۇھىت ۋازارىتىنىڭ مۆلچەرلىشىچە، مۇھىت بېجى يىغىلغاندىن كېيىن، 2016- يىلىغا بارغاندا، ھەر بىر ئائىلىنىڭ ھەر يىللىق ئېنېرگىيە چىقىمى شۇ سەۋەبلىك 1228 يېن (تەخمىنەن 15.8 ئامېرىكا دوللىرى) كۆپىيىپ كېتىدىكەن.