يەر شارى تورى مۇخبىرى لى زۇڭزې خەۋىرى: تەيۋەن «جۇڭگۇاڭ تورى» نىڭ 30- سېنتەبردىكى ئۇچۇرى: ھاۋا ئوچۇق كۈز كۈنلىرىنىڭ بىرسىدە، دوناي دەرياسىدا بېلىق تۇتۇۋاتقان گرىب ئەپەندى دەريادا بىر ئاۋازنى ئاڭلايدۇ، ئۇ تېخى كۆۋرۈكتىكى بىرەيلەننىڭ نەرسىسى دەرياغا چۈشۈپ كەتكەن چېغى دەپ ئويلاپ تۇرغاندا، سودا بىر گەۋدىنىڭ لەيلەپ تۇرغانلىقىنى كۆرىدۇ- دە، دەرھال سۇغا سەكرەپ ئۇنى قۇتۇلدۇرۇۋالىدۇ. بۇ 15 يىلنىڭ ئالدىدىكى ئىش، ئەمما شۇ كۈندىن باشلاپ، گرىبنىڭ تۇرمۇشىدا ئۆزگىرىش بولىدۇ، ئۇ بېلىق تۇتقان چېغىدا ھەمىشە كۆۋرۈككە سەپ سېلىپ تۇرىدۇ، ئۇ ھازىرغا قەدەر كۆۋرۈكتىن سۇغا سەكرەپ ئۆلۈۋېلىشقا ئۇرۇنغان 25 كىشىنى قۇتۇلدۇرۇۋالىدۇ، ئۇ شۇ ۋەجىدىن «دوناي دەرياسىدىكى خاسىيەتلىك ئادەم» دېگەن نامغا ئىگە بولىدۇ، بېلگراد شەھەرلىك ھۆكۈمەتمۇ ئۇنىڭغا قەھرىمان دېگەن شەرەپنى بېرىدۇ.
پونسوۋ كۆۋرۈكى بېلگراد شەھىرىدىن كېسىپ ئۆتىدىغان دوناي دەرياسىدىكى بىردىنبىر كۆۋرۈك بولغاچقا، بۇ كۆۋرۈك ئۆلىۋالىدىغانلار كۆپ چىقىدىغان جايغا ئايلىنىپ قالغان. سېربىيەدە ئۆلۈۋېلىش نىسبىتى ياۋروپا ئەللىرى ئىچىدە بىر قەدەر يۇقىرى. 1990- يىلىنىڭ بېشىدىكى سابىق يۇگوسلاۋىيە ئۇرۇشى مەزگىلىدە، بۇ يەردە ئۆلۈۋېلىش نىسبىتى تولىمۇ يۇقىرى بولغان، شۇنىڭدىن كېيىن ئاستا- ئاستا تۆۋەنلەشكە باشلىغان. ئۆتكەن يىلى، يەتتە مىليون نوپۇسقا ئىگە يۇگوسلاۋىيەدە 1300 گە يېقىن ئادەم ئۆزىنى ئۆلتۈرۈۋالغان.
گرىب ئەپەندى بېلگرادتا بىر ئاشخانا ئاچىدىغان بولۇپ، ئۇ قۇتقۇزۇۋالغان 25 كىشى ئىچىدە بىر كىشىلا ھازىرغىچە ئۇنىڭ بىلەن ئالاقىلىشىپ تۇرىدۇ. ئەينى چاغدا 18 ياشقا كىرگەن، ئۆلۈۋېلىشنى ئىستەيدىغان بۇ قىز ھازىر ئانا بولدى. ئۇ ھەر يىلى ئۆزىنى ئۆلتۈرۈۋېلىشقا ئۇرۇنغان خاتىرە كۈنىدە، گرىب ئەپەندىنىڭ ئاشخانىسىغا بېرىپ، ئۆزىنىڭ 2- تۇغۇلغان كۈنىنى تەبرىكلەيدۇ.