[پارس ئاخبارات ئاگېنتلىقى، تېھران، 18-سېنتەبىر تېلېگراممىسى] ئىران بۈگۈن ئۆزىنىڭ ھاۋا مۇداپىئە سىستېمىسىدا ئۇچقۇچىسىز ئايروپىلان ئىشلىتىشكە باشلىغانلىقىنى جاكارلىدى. بۇ، ئىراننىڭ ھاۋا مۇداپىئە ئىقتىدارىنى كۈچەيتىش پىلانىنىڭ بىر قىسىمى.
   بۈگۈن تېھراندا ئۆتكۈزۈلگەن دۆلەت ھاۋا ئارمىيە كۈنىدە، ھاتەم ئەنبىيە ھاۋا ئارمىيە بازىسىنىڭ قوماندانى، گېنېرال بىرىگادىر فەرزاد ئىسمايىل مۇخبىرلارغا: ئىران ھاۋا مۇداپىئە سىستېمىسىغا «كەسكىن»ناملىق ئۇچقۇچىسىز ئايروپىلان سەپلەندى، دېدى.
     ئۇ ئىراننىڭ ئۇچقۇچىسىز ئايروپىلان ئۆلچىمى ۋە ئۇنىڭ كونكرېت ۋەزىپىسى قاتارلىقلار توغرىسىدىكى تەپسىلاتلارنى كۆپ ئاشكارىلىمىدى.
  فەرزاد ئىسمايىل ئىراننىڭ ئۇچقۇچىسىز ئايروپىلان كەسپىگە تېخىمۇ كۆپ مەبلەغ سالىدىغانلىقىنى تەكىتلىدى. ئۇ: ئامېرىكىنىڭ«RQ-170» بەلگىلىك«قاراۋۇل» ناملىق رادارغا چۈشمەيدىغان ئۇچقۇچىسىز ئايروپىلانىنى ئېتىپ چۈشۈرگەندىن كېيىن، بىزنىڭ بۇنداق ئايروپىلان ياساش تېخنىكىمىز تېخىمۇ ئۆستى، دېدى. 
    بۇلتۇر 4-دېكابىر، ئىران: ھاۋا مۇداپىئە قىسىمىمىز بىر قېتىملىق يۇقىرى دەرىجىلىك تور ھۇجۇمىدا ئامېرىكىنىڭ رادارغا چۈشمەيدىغان بۇ ئۇچقۇچىسىز ئايروپىلاننى قولغا چۈشۈردۇق، دېگەنىدى.
   بۇ ئامېرىكىنىڭ تۇنجى قېتىم بۇنداق زىيانغا ئۇچرىشى.