ئەنگلىيەلىك بىر ئايال دورا ئىچكەندىن كېيىن توختىماستىن قاتتىق يۆتىلىپ، ئاخىرىدا ئىككى سانتىمېتىر ئۇزۇنلۇقتىكى ئۆسمە توقۇلمىسىنى يۆتىلىپ چىقىرىۋەتكەن. دوختۇرنىڭ ئېيتىشىچە، ئەگەر ئۇ ئۆسمىنى يۆتىلىپ چىقىرىۋەتمىگەن بولسا، ئۇنىڭ ھايات قېلىش نىسبىتى %50 تىن ئاشمايدىكەن. بۇ ئايال يېقىندا بۇ ئىشنى جېننىس دۇنيا رېكورتىغا ئىلتىماس قىلىپ، دۇنيادىكى تۇنجى بولۇپ مۇكەممەل ئۆسمە توقۇلمىسىنى يۆتىلىپ چىقىرىۋەتكەن ئادەم بولماقچى بولدى.
كلارې ئوسبورنې ئىسىملىك بۇ ئايال 38 ياشقا كىرگەن بولۇپ، كوۋېنترى دېگەن جايدا تۇراتتى، ئالتە بالىسى بار ئىدى. ئۆتكەن يىلى 10- ئاينىڭ 11- كۈنى، ئوسبورنې دورا ئىچىۋاتقاندا تۇيۇقسىز كېكىردىكى بىئارام بولغان، ھەمدە ئۇدا بەش مىنۇت يۆتەلگەندىن كېيىن كېكىردىكىدىن غەلىتە بىر نەرسە «ئۇچۇپ» چىققاندەك ھېس قىلغان.
كىم بىلسۇن، ئوسبورنې ئەتىسى ئاپتوموبىلغا ئولتۇرۇپ ئوغلى بىلەن سىرتقا چىققاندا، ئاپتوموبىلغا يەنە قاتتىق يۆتىلىپ ئۇزۇنلۇقى ئىككى سانتىمېتىر كېلىدىغان يۈرەك شەكىللىك بىر ماددىنى چىقىرىۋەتكەن.
ئىككى ھەپتىدىن كېيىن دوختۇر ئوسبورنىغا: بۇنىڭ تاجاۋۇز قىلىش تىپىدىكى كېكىردەك راكى ۋە ئېغىز بوشلۇقى راكى ئىكەنلىكىنى ئېيتقان. دوختۇرنىڭ ئانالىز قىلىشىچە، ئۆسمە ئوسبورنېنىڭ كېكىردىكىنىڭ ئارقا قىسمىغا ئۆسكەن بولۇپ، ئۇ قاتتىق يۆتەلگەن چاغدا ئۇنىڭدىن ئايرىلغان.
«ئۇلار بۇنى ئوپېراتسىيە قىلغىلى بولمايدۇ، خىمىيەلىك داۋالاشنى قوبۇل قىلىشقا تەييارلىنىڭ دەيدۇ» دېدى ئوسبورنې.
دوختۇر ئوسبورنېنىڭ تېنىدە يەنە ئۆسمە بولۇشىدىن ئەنسىرەپ، ئۇنىڭ پۈتۈن بەدىنىنى تەكشۈردى. بەختكە يارىشا، تەكشۈرۈشتە چاتاق كۆرۈلمىدى. ئۆتكەن يىلى 11- ئاينىڭ 29- كۈنى، ئوسبورنى ئاخىرقى بىر قېتىملىق ئوپېراتسىيەنى قوبۇل قىلىپ، تىلىنىڭ ئارقا قىسمىدىكى راك ھۈجەيرىسى كىسىپ ئېلىۋېتىلدى.
بۇ يىل 2- ئايدا يەنە بىر قېتىم تەكشۈرگەندىن كېيىن، دوختۇر ئوسبورنېنىڭ پۈتۈنلەي ساقايغانلىقىنى بېكىتتى. مۇشۇ ئاينىڭ بېشىدا ئۇ ئاخىرقى بىر قېتىم تەكشۈرۈلگەندىن كېيىن، دوختۇر ئۇنىڭ بەدىنىدە راك ئۆسمىسى قالمىغانلىقىنى ئېيتتى.
ئوسبورنىنىڭ ئېيتىشىچە، ئىلگىرى دوختۇر بۇنداق يامان سۈپەتلىك ئۆسمىدىن ھايات قېلىش نىسبىتىنىڭ ئاران %50 ئىكەنلىكىنى ئېيتقان، ئۇ بىر مەھەل ئۆزىنىڭ ئاخىرەتلىك ئىشلىرىغا تەييارلىق كۆرۈپ قويۇشنى ئويلىغان. ئويلىمىغان يەردىن يۆتەل ئۇنىڭ جېنىنى قۇتۇلدۇرۇپ قالغان.
بۇ قېتىمقى كەچۈرمىش تولىمۇ ئاجايىپ بولغاچقا، ئوسبورنې يېقىندا بۇ ئىشنى جېننىس دۇنيا رېكورتىغا ئىلتىماس قىلىپ، دۇنيادىكى تۇنجى بولۇپ مۇكەممەل ئۆسمە توقۇلمىسىنى يۆتىلىپ چىقىرىۋەتكەن ئادەم بولماقچى بولدى.