تەڭرىتاغ تورى خەۋىرى:2012-يىلى 3-ئاينىڭ 26-كۈنى،قەشقەر ۋىلايەتلىك ئوتتۇرا خەلق سوت مەھكىمىسى بىرىنچى سوتتا جاۋابكار ئابدۇكېرىم مامۇتقا زوراۋانلىق تېرورلۇق دېلوسىغا ئوچۇق سوت ئېچىپ،ئابدۇكېرىم مامۇتقا تېرورلۇق تەشكىلاتى ئۇيۇشتۇرۇش،رەھبەرلىك قىلىش،قەستەن قاتىللىق قىلىش جىنايەتلىرىنى قوشۇپ جازالاپ،ئۆلۈم جازاسىغا ھۆكۈم قىلىپ،سىياسىي ھوقۇقىدىن ئۆمۈرۋايەت مەھرۇم قىلىش جازاسى بەردى.
سوت مەھكىمىسى سوت قىلىش ئارقىلىق مۇنۇلارنى تەكشۈرۈپ چىقتى:جاۋابكار ئابدۇكېرىم مامۇتنىڭ 2011-يىلى 7-ئايدىن 2012-يىلى 2-ئايغىچە قانۇنسىز <<تەبلىغ قىلىش>> پائالىيەتلىرى قاتارلىق ۋاستىلار بىلەن دىنىي ئەسەبىيلىك،زوراۋان تېرورلۇق ئىدىيىسىنى تەشۋىق قىلغان،پائال خادىم تاللاپ،ئۆزى باش بولۇپ،ئوبۇلقاسىم مەمەت،توختى قۇۋان مەمەت قاترالىق توققۇز كىشى قاتناشقان زوراۋان تېرورلۇق تەشكىلاتىنى ئۇيۇشتۇرۇپ،كۆپ قېتىم مەخپى پىلانلاش ئېلىپ بارغان،تەشكىلات ئەزالىرىنىڭ يەر شەكلىنى تەكشۈرۈشكە قوماندانلىق قىلىپ،تېرورلۇق ھۇجۇم نىشانىنى بېكىتىپ،زوراۋانلىق تېرورلۇق ھەرىكەت لايىھىسىنى پىلانلىغان.2012-يىلى 2-ئاينىڭ 28-كۈنى چۈشتىن بۇرۇن جاۋابكار ئابدۇكېرىم مامۇت تېرورلۇق تەشكىلاتى ئەزالىرىنى ئۆزىنىڭ ئۆيىگە يىغىپ،زوراۋانلىق تېرورلۇق ھەركىتى ئېلىپ بېرىشنى مۇقىملاشتۇرغان ۋە ئەزالىرىنى گۇرۇپپىلارغا ئايرىپ،ئىش تەقسىملەپ ۋە ئۇلارغا پىچاق،پالتا قاتارلىق جىنايەت قوراللىرىنى تارقىتىپ بېرىپ،تېرورلۇق ھۇجۇم قىلىش ئۇسۇلىنى مانىۋېر قىلغان.شۇ كۈنى چۈشتىن كېيىن سائەت 18 لەردە ئۇ جىنايەت تەشكىلاتى ئەزالىرىنى باشلاپ قاغىلىق ناھىيىسىنىڭ بەخىت يولىدىكى پىيادىلەر كوچىسىغا بېرىپ،پىچاق،پالتا قاتارلىقلار بىلەن بىگۇناھ ئاممىنى ۋەھشىلەرچە چېپىپ،نەق مەيداندا 13 ئادەمنىڭ ئۆلۈشى،16 ئادەمنىڭ يارلىنىشىنى(بۇنىڭ ئىچىدە ئىككى كىشى قۇتقۇزۇش ئۈنۈم بەرمەي ئۆلۈپ كەتكەن)كەلتۈرۈپ چىقارغان.
جاۋابكار ئابدۇكېرىم مامۇت نەق مەيداندا تۇتۇلغان،يەتتە نەپەر زوراۋان تېرورچى ئۇنسۈر ئېتىپ ئۆلتۈرۈلگەن،يەنە بىر نەپىرى ئوق تېگىپ يارلانغاندىن كېيىن قۇتقۇزۇش ئۈنۈم بەرمەي ئۆلۈپ كەتكەن.ۋەقەنى بىر تەرەپ قىلىش جەريانىدا بىر نەپەر بىرلەشمە مۇداپىئە خادىمى قۇربان بولغان،تۆت نەپەر ج خ ساقچىسى يارلانغان.
يۇقىرىقى جىنايەت پاكىتلىرىنى ئۆز كۆزى بىلەن كۆرگەن گۇۋاھچىلارنىڭ گۇۋاھلىق سۆزى،زىيانكەشلىككە ئۇچرىغۇچىلارنىڭ بايانى،يىغىۋېلىنغان دېلو سادىر قىلىش قوراللىرى،نەق مەيداندىكى ۋېدىئو ماتېرىيالى،قانۇن دوختۇرىنىڭ جەسەت تەكشۈرۈشى،زەخمىنى بېكىتىش،نەق مەيداننى تەكشۈرۈش خاتىرىسى قاتارلىق دەلىل-ئىسپاتلار ئىسپاتلاپ بېرىدۇ،جاۋابكارمۇ جىنايىتىگە ئىقرار بولدى.
سوت قاراپ چىقىش ئارقىلىق مۇنداق دەپ قارىدى:جاۋابكار ئابدۇكېرىم مامۇت تېرورلۇق تەشكىلاتى ئۇيۇشتۇرغان،رەھبەرلىك قىلغان ۋە تەشكىلات خادىملىرىغا قوماندانلىق قىلغان شۇنداقلا بىگۇناھ ئاممىنى بېۋاستە ئۆلتۈرگەن،جىنايەت ۋاستىسى ئىنتايىن ۋەھشى بولۇپ،جىنايەت قىلمىشى ناھايىتىمۇ قەبىھ جىنايەت ئاقىۋىتى ئىنتايىن ئېغىر بولغان.شۇڭا يۇقىرىقى ھۆكۈم چىقىرىلدى.
سوتتا قاراپ چىقىش جەريانىدا،قانۇن بويىچە جاۋابكارنىڭ ئۆز مىللىتىنىڭ تىل-يېزىقى ئىشلىتىلىپ دەۋالىشىش ھوقۇقىغا كاپالەتلىك قىلىندى،جاۋابكارنىڭ ئاقلىغۇچى ئادۋوكاتى سوتتا جاۋابكارنى ئاقلىدى،جاۋابكارنىڭ ئۇرۇق-تۇققانلىرى،زىيانكەشلىككە ئۇچرىغۇچىلار ۋە ئۇلارنىڭ ئۇرۇق-تۇغقانلىرى شۇنداقلا جەمئىيەتتىكى ھەر ساھە ئامما سوتنى سىرىتتىن ئاڭلىدى.
