تۈركزات:ئاي خېنىم

تۈركزات · ۋاقتى: 2012-6-28 22:25:01


	ناخشىنى تولا يازدىم، ئاھاڭغا سالامەن دەپ. قوشاق باشلىدىم بۇ كەچ، تاڭغىچە ئۇلامەن دەپ. ئات كىشنەيدۇ مۇڭ بىلەن، ئايرىۋەتكەن تاي بارمۇ؟ يۈرەكتە دەرت كۆيىدۇ، ئۆچۈرگىلى ئاي بارمۇ؟ (1) ئاسماندا بۇلۇت جىقكەن، يۇلتۇزلار جۇلالارمۇ؟ ئاي خېنىم بۆگۈن كەچتە، سۆھبەتداش بولالارمۇ؟ بېغىمنى قاشا قىلدىم، لايدىن تەڭلىكىم يوقتۇر. سەن بولغاچ تۈنۈمگە ئاي، ئايدىن تەڭلىكىم يوقتۇر. شوراڭدىن كىرەي كەچتە، بېغىڭغا چىقامسەن ئاي؟ قىزىل گۈل گۇۋاھ بولسۇن،، قولۇمنى سىقامسەن ئاي؟ (2) يۇلتۇزلار تۈنەپ چىقىتى، تۈن ئەيلەپ قاراقىڭدا. خىرامان ئۆتەمسەن ئاي، دەرت چەكسەم پىراقىڭدا. ئۇچۇر يازىمەن دەيدۇ، بارماقنى چانايمۇ ئاي؟ تاقەت قالمىدى ئەندى، بۇ جاندىن تانايمۇ ئاي؟! دەرۋازاڭ تاقاقلىقكەن، يۈشۈرنۇپ مارايمۇ ئاي؟ دېرىزەڭ قاياقتىدى، ئېسىلىپ قارايمۇ ئاي؟ (3) چېھرىڭگە كۆيەيمۇ ئاي، خۇلقىڭغا كۆيەيمۇ ئاي؟ قاچان ئويغىناكىن دەپ، بېشىڭدا تۈنەيمۇ ئاي؟ كۆكسۈمدە پىچاقىڭ بار، پىچاقنى ئېلىۋەتمە! تاڭغىچە مېنى تاشلاپ، باغرىمنى تىلىۋەتمە! (4) قايناقسۇ تۆكىۋىلىپ، پۇتۇم كۆيدىغۇ ئايىم. جىسمىمنى ئوتۇن ئەيلەپ، ئوتۇڭ كۆيدىغۇ ئايىم. تاملىرىڭ سۇۋاغلىقكەن، ئۆگزەڭگە چىقاي دەپتىم. شوراڭنى ئېتىۋاپسەن، سۇ بولۇپ ئاقاي دەپتىم. «ئات بېشىغا كۈن چۈشسە، سۇ ئىچەر يۈگەن بىلەن». بىر كېچە تۈنەپ چىقسام، ئاي خېنىم لېۋەن بىلەن! دەرت تۆكەي قورام تاشقا: يار ئوتى ئىكەن باشقا. قاچانمۇ ئېرىشەرمەن، ئاي خېنىم قەلەم قاشقا. (5) تاغلارغا قانات چىقسا، ئۇچارمۇ دېڭىزلارغا؟ قاچان قوي سالاسەن ئاي، مەن كۈتكەن ئېڭىزلارغا؟ يېنىمغا كېلەر بولساڭ، ئالدىڭغا چىقايمۇ ئاي؟ قەرەلى قاچان ئېدى، ئېنىق بىر ئۇقايمۇ ئاي؟ ئاڭلاپتۇ پىغانىمنى، تاشلاردا قۇلاق بارمۇ؟ ھىجراندىن لېۋىم چاكتۇر، باغرىڭدا بۇلاق بارمۇ؟ (6) قولۇڭدا قىزىل ئالما، چەنلەپ بىر ئاتاسەنمۇ؟ ۋىسالدىن بېرىپ شەپە قوشاقلار قاتاسەنمۇ؟ ئۆستەڭنىڭ سۈيى تاشتى، باغلاشقا توپاڭ بارمۇ؟ باغرىم خۇن-يارا سەنچۈن، شىپالىق ئۇپاڭ بارمۇ؟ (7) ئاق تاغلىق يىگىت تۇرسام، دەيسەنغۇ قارا تاغلىق. سەندىن باشقىغا ئايىم، يۈرىكىم قۇلۇپلاغلىق. تەلمۇرسەم ساڭا شۇنچە، ئاچمايسەن قۇچاقىڭنى. جاننى ئالمىدىڭ ياكى تارتمايسەن پىچاقىڭنى. (8) كاۋاپ قىل يۈرەكىمنى، ئوت بولسا ئوچاقىڭدا. ئارمانسىز كېتەتتىم ئاي، جان بەرسەم قۇچاقىڭدا. شامال سوقسا يىغلايدۇ، دەرەخ ئۇچىدا ياپراق. ۋىسالدىن ھاياتلىق بەر، يا ئۆلتۈر مېنى پاتراق. (9) يامغۇرلار سىمىلدايدۇ، كۈنلۈكنى تېپىپ قويغىن. ھىجراندىن دىلىم غەمناك، مېنى ياد ئېتىپ قويغىن. ئولتۇرۇپ خىيال سۈرسەم، سەن بارغۇ ئېڭىمدا ئاي؟ ئۇزۇن بولسىمۇ تۈنلەر، يورىيسەن تېڭىمدا ئاي! بۇ يازمىنى ئاخىرىدا تۈركزات تەھرىرلىگەن. ۋاقتى 2012-7-1 02:06

تەبەسسۇم · ۋاقتى: 2012-6-28 23:59:15


	تولىمۇ ياخشى چىقىپتىكەنتۇق. شۇ خۇشاللىقىمدا ئاي خېنىم ناملىق ناخشىنى قىستۇرۇپ قوياي دىسەم بۇ مۇنبەردە ناخشا-مۇزىكا قىستۇرغىلى بولمايدىكەن. مۇنبەر تىما، ئىنكاس كۆزنىكىگە مۇزىكا قويغۇچ سەپلىگىلى بولماسمۇ ؟ شۇنداق بولغان بولسا بەك ياخشى بولاركەنتۇق... بۇ يازمىنى ئاخىرىدا تەبەسسۇم تەھرىرلىگەن. ۋاقتى 2012-6-29 00:06

تەبەسسۇم · ۋاقتى: 2012-6-29 13:30:43


	غۇنچەم دىرامىسىدىكى ناخىشىلارنى ئەسلىتىپ قويدى.

شەمشادى · ۋاقتى: 2012-6-30 23:43:07


	يېڭى زامان قوشاقلىرىغا مۇبارەك! بۇ يېڭى خەلق قوشاقلىرىنىڭ باشلىنىشى بوپتۇ. قوشاقلارنىمۇ يېڭىچە ئوبرازلىق سۆزلەر بىلەن يېڭىلاپ قويساق بولغىدەك. ئىزدىنىشىڭىزدىن سۆيۈندۈم.

HOJAKABIZ · ۋاقتى: 2012-7-1 20:18:47


	خەلق قوشاقلىرى ئىزىدىن مېڭىش-ئەسلىنى تاپقانلىق،بىزنىڭ قولىمىزغا قەلەم ئېلىشىمىزغا مۇشۇنداق تاتلىق-چۈچۈك خەق قوشاقلىرى تۈرتكە بۇلغان. مەن ئۈچۈن ھېچنىمەزىمنىڭ بىر تاغار لاۋىزا،پەلىپەتىش يازمىلىرىدىن خەلق قوشاقلىرىنىڭ بىر بېيىتى ئەلا!

mamutomar · ۋاقتى: 2012-7-13 19:01:22


	خاتىردىن خاتىرگە كۆچۈرۈپ يۈرگەن چاغلىرىمنى ئەسلەتتى

بۇغراخان · ۋاقتى: 2012-7-18 18:42:26


	تىلى بەك يەڭگىل يىقىشلىق، ئاسان ئەستە قالىدۇ .ئوقۇغان سىرى ئوقۇغۇسى كىلىدۇ كىشىنىڭ . بۇ يازمىنى ئاخىرىدا بۇغرا تەھرىرلىگەن. ۋاقتى 2012-7-18 18:43

شەھرزات@ · ۋاقتى: 2012-7-18 19:45:02


	قوشاقلار بەك ئاز تىلغا ئىلىنىۋاتقان مۇشۇ كەملەردە سىزنىڭ بۇ قوشاقلىرىڭىز مىنى بەكمۇ زوقلاندۇردى. سىزگە كۆپ رەھمەت!

سەھەر · ۋاقتى: 2012-7-20 15:18:51


	ئاي خېنىم ئايغا قاراپ ئولتۇرار، ھەسرىتى سۇدەك ئېقىپ يامراپ تۇرار. ئاي خېنىمنىڭ ياشلىرى قاپاقتا لىق، بىلمىگەنلەر بىر يۇتۇم سوراپ تۇرار.

سەھەر · ۋاقتى: 2012-7-26 17:41:30


	ئاي خېنىمنىڭ يۈزىنى، سۈت بىلەن يۇيغانمىكىن. ئايخېنىمغا ساقلىدىم، ئۇ بۈگۈن تۇيغانمىكىن. ئاي خېنىمنىڭ يۈزلىرى، ئايغا ئوخشاش ئاپمۇئاق. ئاي خېنىمنى ساقلىدىم، بىر يىل بولدى ساپمۇ ساق. ئاي خېنىمنىڭ يۈزىگە، ئايمۇ خىجىل قارارمىش. بىر كۆرسەم دەپ كۈنمۇ ھەم، رۈجىكىدىن مارارمىش.

arkan · ۋاقتى: 2012-7-28 17:24:47


	قوشاقلار بەكمۇ ياخشى يىزىلىپتۇ، پۇت-قوللىرىغا دەت كەلمىسۇن! ياراتقان ئاللاھ ئىجادىيەتلىرىگە ئۇتۇق، ئىلھاملىرىغا بەرىكەت ئاتا قىلسۇن!

مېھربان · ۋاقتى: 2012-7-29 23:24:55


	ئايغا ئوخشاتتىم سېنى، كۈنگە ئوخشاتتىم سېنى. كەلمىدىڭسەن ئاي خىنىم، ساماندەك سارغايتىپ مېنى. بىزنىڭ باغنىڭ ئالمىسى، ئېككى مەڭزى قىپ -قىزىل. سۆيگەن يارىم ئاي خىنىم، مەن ساڭا بولدۇم ئىجىل. ئاي خىنىم دەيمۇ سېنى ، گۈل خىنىم دەيمۇ سېنى . تۇركىزاتنى ئوتقا سالغان ، ئاتەش خىنىم دەيمۇ سېنى .. بۇ يازمىنى ئاخىرىدا مېھربان تەھرىرلىگەن. ۋاقتى 2012-7-30 03:13

arkan · ۋاقتى: 2012-8-5 17:06:57


	ئاي خىنىم سۈزۈك چىراينىڭ يۈزىدە بار ئاينىڭ جۇلاسى، ئاي خىنىمغا ناخشا ئىيتىپ ئۆتتى ۋاقىتنىڭ تەڭدىن تولاسى. قوشاق يىزىپ تۈركزات مۇ ئاي خىنىمغا قىشىنى ئاتتى، شىپالىق ئۇپا ئىزدەپ تۈركزات نىڭ بىشى قاتتى. چاخ-چاق ھە.... بۇ شىئىرلىرى ھەقىقىتەن ياخشىى چىقىپتۇ، سىلىنىڭ مۇشۇنداق تىتىملىق تىمىلارنى يىزىپ تۇرۇشلىرىغا تىلەكداشمەن! بۇ يازمىنى ئاخىرىدا ئەركان تەھرىرلىگەن. ۋاقتى 2012-8-5 17:11

تۈركزات · ۋاقتى: 2012-8-6 12:44:50


	مەلۇم سەۋەپ تۈپەيلىدىن بىر نەچچە كۈندىن بىرى مۇنبەرگە كىرەلمىگەن ئېدىم.ئەركان قاتارلىق قەلەمداش بۇرادەرلىرىم تىملىرىنى كۆرۈپ ئىنكاس يېزىپ،مېنى ياد ئېتىپ تۇرۇپتۇ.مۇنبەردىكى بارلىق دوستلىرىمغا ساغلاملىق،خاتىرەجەملكىك،ئىجادى مۇۋاپىقىيەت تىلەيمەن! بۇ يازمىنى ئاخىرىدا تۈركزات تەھرىرلىگەن. ۋاقتى 2012-8-6 12:47

مېھرى · ۋاقتى: 2013-2-6 18:41:03


	HOJAKABIZ يوللىغان ۋاقتى 2012-7-1 20:18 خەلق قوشاقلىرى ئىزىدىن مېڭىش-ئەسلىنى تاپقانلىق،بىزنى ... ئوخشاش قاراشتىمەن . «نەسرىدىن ئەپەندىمنىڭ سالام خېتى» دەك ئۆزى ئوقۇپ بەرمىسە چۈشەنگىلى بولمايدىغان يازمىلار ئاۋۇپ كەتكەن كۈندە ، تۈركزادنىڭ يېڭىچە قوشاقلىرى باشقىچە ھوزۇر بەردى. تۈركزادقا پۈتمەس ئىلھاملار يار بولغاي!

مىكروبلوگ[ يېڭى | 24 سائەت | 7 كۈن | 30 كۈن ]

تۈركزات:ئاي خېنىم

分享到：

ئەزا ئۇچۇرى