بەگتۈرك:تەبىئەتتەك ياشايدۇ شائىر

begturk

	تەبىئەتتەك ياشايدۇ شائىر    ئىستىداتلىق شائىر،ئەدەبىي تەرجىمان،ئىجتىھاتلىق مۇھەررىر قۇربان باراتنىڭ ۋاپاتىغا ئاتايمەن ئەخمەتجان تۇرۇپ بەگتۈرك      چېچەك قىساي دېگەندە باغلار،   ئۇستاز شائىر يۈمدى كۆزىنى.        پۈتمەي تۇرۇپ ئاخىرقى شېئىر، تۇپراققىلا كۆمدى سۆزىنى.    بارمىقىدىن چۈشتى سىيرىلىپ،   ساق ئاتمىش يىل كىشنىگەن قەلەم. سانجىلدىغۇ  زىدە يۈرەككە، نەيزىسىنى ئۇشلىغان ئەلەم. ئاتۇشتىكى گىگانىت تاغلار، چۆكۈپ كەتتى بىر تامچە ياشقا. ئاغۇدىكى(1)*خىلۋەت بۇلاقلار، بىر ئىسىمنى ئويىدى تاشقا. كەلدى ھۆڭرەپ كۆنچى بويىدىن، << ئاپئاق رومال ئارتقان پەرىزات>>(2)*. << قار گۈلى>>گە(3)* كەتتى كۆمۈلۈپ، ئۈرۈمچىدە << ياپيىشىل ھايات>>(4)*.   ئاسمىنىدىن ئۆچتى سەنئەتنىڭ، ئېگىز ئۇچقان بۇركۇت ئاۋازى. ئارمان بولۇپ قالدى ئۇيغۇرغا، ئانا تىلنىڭ سۈزۈك پەرۋازى. ئۇ كۈيلىگەن قەدىم  ئانا يەر، ئىسسىق تەننى باستى باغرىغا. تەبىئەتتەك ياشار ئۇ ئەمدى، سادا بېرىپ تەڭرى تېغىغا.   ئىزاھات:ئاغۇ(1)_ شائىر تۇغۇلغان يېزىنىڭ ئىسمى. (2)،(3)،(4) شائىرنىڭ ئەسەرلىرىنى كۆرسىتىدۇ. 2016-يىلى نورۇز ئېيىنىڭ 6-كۈنى(يەكشەنبە)،گۇما

maripatogli

	كەلدى ھۆڭرەپ كۆنچى بويىدىن، <<ئاپئاق رومال ئارتقان پەرىزات>>(2)*. ‹‹قار گۈلى››گە(3)* كەتتى كۆمۈلۈپ، ئۈرۈمچىدە ،  ئاھ !<< يېشىل ھايات>>(4)*. مەن ئۇستازغا يول كۆرسەتكۈدەك يەردە ئەمەسمەن ، ئەمما مەرسىيەنى ئوقۇپ تۇنجى قېتىم ئېڭىمدا شەكىللەنگەن تۇيغۇمنى سۆزلەپ ئۆتسەم. يۇقاردا مەن ئۆزگەرتكەن بىر مىسرادىكى <<ئاھ>>دېگەن سۆز ئادەتتە ھەسرەت نادامەتنى ، ئۆكۈنۈش مەنىسىنى بىلدۈرىدىغان سۆز ، بۇ سۆزنى ئىشلەتكەندە مەرھۇمغا بولغان سېغىنىشنى يەنىمۇ كۈچەيتىپ بىرىدىكەن دەپ ئويلۇدۇم ، ئۇندىن باشقا مەرھۇمنىڭ ئەسىرىنىڭ ئەسلى تېمىسى <<يېشىل ھايات >>بولغاچقا ئۇستازىم ئالغان<< ياپيېشىل ھايات>> دېگەن سۆزدىكى بىر بوغۇمنى باياتىنقى <<ئاھ >>دېگەن سۆزدىكى پىغان-ھەسرىتىمىز بىلەن ئىپادىلەپ تولۇقلاپ ئەسەرنىڭ ئەسلى نامى بولغان <<يېشىل ھايات>>تېمىسىنى ئەسلى پىتى ئىشلەتسەك بۇ ھەم ئەسەرنىڭ كۈچىنى ئاشۇرۇشقا ، مەرھۇمغا بولغان سېغىنىش ھېسياتىنى تىخىمۇ كۈچلۈك ئىپادىلەشكە ،يەنە بىرى مەرھۇمنىڭ ئەسەرلىرىنىڭ تېمىسىنى ئۆز پىتى بويىچە ئىپادىلەشكە تولىمۇ باب كەلگۈدەك دەپ ئويلۇدۇم ، ناۋادا بالىلارچە پىكىر قىلغان بولسام ئۇستاز كۆرسەتمە بەرگەي .

HOJAKABIZ

	مەرھۇمغا ئاتاپ يېزىلغان مەرسىيەلەردىن كۆز چاناقلىرىم نەملەندى. قەلىمى تىز شائىرلىرىمىزنىڭ ئەجرىگە ئاپىرىن ! مەرھۇمنىڭ ئاخىرەتلىكى خەيىرلىك بولغاي.

pixwa

	مەرھۇمغا ئاتاپ يېزىلغان يەتتە پارچە مەرسىيە ئاۋازلىق تارقىتىلدى. ئارىيە: ئەخمەتجان تۇرۇپ بەگتۈركنىڭ مەرسىيەسى http://mp.weixin.qq.com/s?__biz= ... da4498f3dc5987b2#rd

begturk

	رەھمەت! مۇمكىن بولسا كېيىن تولۇقلىغان نۇسقىسى ئوقۇلغان بولسا .