يوللانغان ۋاقتى : 2009-02-18 12:38:04    كۆرۈلۈش سانى : 228  

         بىر كۈنى، ئورمانلىقتىكى بارلىق ھايۋانلار چوڭ دەرەخنىڭ ئاستىغا يىغىلىشىپ >قۇملۇقتا جانلىق بارمۇ - يوق< دېگەن تېمىدا بەس - مۇنازىرە ئېلىپ بېرىپتۇ. مايمۇنچاق >قۇملۇقتا جانلىق بار< دەپتۇ. >جانلىق بار دەمسەن، قېنى ئىسپاتىڭ بولسا كۆرۈپ باقايلى< دەپتۇ شىمپەنزە مايمۇنچاقنى زاڭلىق قىلغان ھالدا. >خەپ مەن ساڭا ھامان ئىسپاتنى كۆرسىتىمەنغۇ< دەپتۇ مايمۇنچاق قەتئى ئىشەنچتە. شۇنداق قىلىپ مايمۇنچاق ئۆز كۆز قارىشىنىڭ توغرىلىقىنى  ئىسپاتلاش ئۈچۈن قۇملۇققا ساياھەتكە بارماقچى بوپتۇ. ساياھەتكە ماڭىدىغان كۈن ئاخىرى  يېتىپ كەپتۇ. مايمۇنچاق قىزىل رەڭلىك ھاۋا شارىغا ئولتۇرۇپتۇ ھەمدە ئورمانلىقتىكى بارلىق ھايۋاناتلار  بىلەن خوشلىشىپ سەپەرگە ئاتلىنىپتۇ. ئورمانلىقتا قالغان  باشقا ھايۋاناتلار  بولسا مايمۇنچاققا ئاق يول تىلىشىپتۇ. قىزىل رەڭلىك ھاۋا شارى دوستلارنىڭ گۈزەل تىلەكلىرى ئاستىدا بارا - بارا كۆزدىن غايىپ بوپتۇ. ئۈچ كۈن كېچە - كۈندۈز يول يۈرگەندىن كېيىن، مايمۇنچاقنىڭ كۆز ئالدىدا كۆز يەتكۈسىز قۇم بارىخانلىرى كۆرۈنۈپتۇ. قۇملۇقنى كۆرگەن مايمۇنچاق بەكلا ھاياجانلىنىپ كېتىپتۇ ھەمدە قىزىل رەڭلىك ھاۋا شارىنى ناھايىتى تېزلىكتە قۇملۇققا قوندۇرۇپتۇ. مايمۇنچاق ئۆزى يالغۇز قۇملۇقتا يول يۈرۈپتۇ. تۆت ئەتراپتا نە سۇ، نە ئوت - چۆپلەر كۆرۈنمەيتتى. ھەممىلا يەر چەكسىز قۇملۇق ئىكەن.   تۇيۇقسىز مايمۇنچاقنىڭ كۆزلىرى ئويناپ كېتىپتۇ. چۈنكى ئۇ ئۆزىگە قاراپ كېلىۋاتقان ھەم يوغان ھەم ئېگىز بىر تۆگىنى كۆرگەن ئىكەن. >ياخشىمۇ سەن< دەپ ئەھۋال سوراپتۇ مايمۇنچاق تۆگىدىن. >ياخشىمۇسەن< دەپ جاۋاب قىپتۇ تۆگىمۇ. ئۇلار ئۆز ئارا تونۇشقاندىن كېيىن مايمۇنچاق تۆگىدىن: >سەن مۇشۇ قۇملۇقتا تۇرمۇش كەچۈرەمسەن< دەپ سوراپتۇ. >ھەئە< دەپتۇ تۆگە بېشىنى لىڭشىتقاچ. مايمۇن  خۇشاللىقىدىن قىن - قىنىغا پاتماي قاپتۇ. چۈنكى ئۇ >قۇملۇقتا جانلىق بار< دېگەن قاراشقا ئىسپات تاپقان ئىكەن. ئەمما ئۇ يەنە ئۆزى چۈشىنەلمىگەن مەسىلىنى تۆگىدىن سوراپتۇ. >ئەي تۆگە، سەن بۇ سۇمۇ يوق، ئوت - چۆپمۇ يوق بۇ قۇملۇقتا قانداق ھايات كەچۈرىسەن<  دەپتۇ. تۆگە ئۆز - ئۆزىدىن پەخىرلەنگەن ھالدا: >چۈنكى مەن جاپا - مۇشەققەتكە چىدايمەن. ئەلۋەتتە، مەن ئۇزاق مەزگىل قۇملۇقتا ياشىغاچقا، بۇ يەرگە ماسلىشالايدىغان ئىقتىدارنى يېتىلدۈرگەن< دەپتۇ. مايمۇنچاق تۆگە بىلەن خېلى ۋاقىت مۇڭدىشىپتۇ. ئاندىن تۆگە بىلەن خوشلىشىپ داۋاملىق ئالدىغا قاراپ مېڭىپتۇ. چۈنكى ئۇنىڭ قۇملۇقتا تېخىمۇ كۆپ جانلىقلارنىڭ بار ئىكەنلىكى توغرىسىدا، تېخىمۇ كۆپ ئىسپاتقا ئېرىشكىسى بار ئىكەن. تۇيۇقسىز مايمۇنچاقنىڭ كۆز ئالدىدا پۈتكۈل بەدەنلىرى تىكەن باسقان  يېشىل ئۆسۈملۈكلەر  پەيدا بوپتۇ. بۇ ئۆسۈملۈكنىڭ ئىسمى  پىتەكگۈل ئىكەن،  مايمۇنچاق ناھايىتى تېزلىكتە ئۇنىڭ ئالدىغا كەپتۇ  ھەمدە ئۇنىڭدىن >سەن شۇنچە كىچىك تۇرۇپ،  بۇ بىپايان قۇملۇقتا قانداقمۇ تۇرمۇش كەچۈرىدىغانسەن< دەپ سوراپتۇ. پىتەكگۈل مايمۇنچاققا ئۆزىنىڭ ھاياتلىق سىرىنى سۆزلەپ بېرىپتۇ. شۇندىلا مايمۇنچاق بۇ سىرنىڭ تېگىگە يېتىپتۇ. كېيىن مايمۇنچاق قۇملۇقتىكى دوستلىرى بىلەن خوشلىشىپ ئورمانلىققا قايتىپ كەپتۇ. مايمۇنچاق ئورمانلىققا قايتىپ كەلگەندىن كېيىن ئۆزىنىڭ قوملۇقتىكى ئاجايىپ كەچۈرمىشلىرىنى ئورمانلىقتىكى دوستلىرىغا سۆزلەپ بېرىپتۇ ئورمانلىقتىكى ھايۋانلارمۇ قۇملۇقتا يەنە باشقا ھاياتلىقنىڭمۇ بارلىقىدىن ئىبارەت بىلىمگە ئىگە بوپتۇ.      قېنى كىچىك دوست، سىز دەپ بېقىڭ، پىتەكگۈلنىڭ قۇملۇقتا ھايات قالالىشىدىكى سىرى نېمە؟       جاۋاب: پىتەكگۈلنىڭ بەدىنىدىكى تىكەنلەر بولسا ئۇنىڭ يۇپۇرمىقىدىن ئىبارەت. بۇ يوپۇرماقلارنىڭ شەكلى تىكەن شەكلىدە بولغاچقا بىتەكگۈلنىڭ بەدىنىدە  سۇ تەركىبلىرى  ئاسانلىقچە پارغا ئايلىنالمايدۇ. شۇڭا پىتەكگۈل  قۇرغاقچىلىقتىن  قورقمايدۇ.  شۇنداقلا يەنە قۇملۇقتا ئۇزۇن ئۆمۈر كۆرەلەيدۇ.