شەھەرلەردىكى يېشىللىق ۋە كىچىك سەيلىگاھلار
يوللانغان ۋاقتى : 2008-09-14 12:15:47 كۆرۈلۈش سانى : 47
| كىچىك | نورمال | چوڭ |
     |
|
شەھەرلەردىكى يېشىللىق ئادەتتە ئاممىۋى يېشىللىق (ھەر خىل باغچە، سەيلە - ساياھەت قىلىدىغان، دەم ئالىدىغان دەل - دەرەخلىك)، ئولتۇراق رايوندىكى يېشىللىق، قاتناش بۆلەكلىرىدىكى يېشىللىق، مەلۇم ئورۇنغا قارايدىغان يېشىللىق، ئىشلەپچىقىرىش مۇداپىئەسى يېشىللىقى ۋە شەھەر ئىچى ياكى شەھەر ئەتراپىغا جايلاشقان مەنزىرە نۇقتىلىرىدىكى يېشىللىق (مەنزىرىلىك ساياھەت رايونى، دەم ئېلىپ كۈتۈنۈش رايونى، داۋالىنىپ كۈتۈنۈش رايونى) دىن ئىبارەت ئالتە خىلغا بۆلۈنىدۇ.
زامانىۋى شەھەرلەردە يېشىللىق كۆلىمى قانچە چوڭ بولسا، شەھەرنىڭ مۇھىت سۈپىتى شۇنچە ياخشى بولىدۇ. چۈنكى يېشىللىق شاۋقۇن - سۈرەننى ئۈنۈملۈك تىزگىنلەپ، زەھەرلىك، زىيانلىق گازلارنى ۋە چاڭ - توزانلارنى سۈمۈرۈپ، شەھەرنىڭ كىلىماتىنى تەڭشەپ ۋە ياخشىلاپ، كىشىلەرگە ياخشى پائالىيەت مۇھىتى يارىتىپ بېرىدۇ ھەمدە شەھەر مۇھىتىنى گۈزەللەشتۈرۈپ، شەھەرنىڭ ھۆسنىگە ھۆسن قوشىدۇ. ئامېرىكىنىڭ ۋاشىنگتون شەھىرى، پولشانىڭ ۋارشاۋا شەھىرى، ئاۋسترالىيىنىڭ كانبېررا شەھىرى، چاۋشيەننىڭ پيۇڭياڭ شەھىرى ۋە سىنگاپور، جەنۋە قاتارلىق جايلاردا يېشىللىق كۆپ بولغانلىقى، يەنە كېلىپ مۇۋاپىق پىلانلانغانلىقى، ياخشى باشقۇرۇلغانلىقى ئۈچۈن، ئۇلار دۇنياغا داڭلىق »باغچە شەھەر « لەرگە ئايلانغان. جۇڭگونىڭ خاڭجۇ، خېفېي، گۇيلىن، نەننىڭ، چىڭداۋ قاتارلىق شەھەرلىرىمۇ باغچە شەھەر يۆنىلىشىگە قاراپ تەرەققىي قىلماقتا.
يېشىللىق مەيدانلىرى، ئولتۇراق رايونلىرىدىكى ئاممىۋى يېشىللىق، يوللارنىڭ كېسىشكەن يېرىدىكى يېشىللىق ۋە كوچا - كويلاردىكى يېشىللىقلارنى جۇڭگولۇقلار ئادەتتە باغچە دەپ ئاتاشقا ئادەتلەنگەن. بۇنداق باغچىلارنىڭ كۆلىمى كىچىك، سانى كۆپ بولۇپ، كىشىلەرنىڭ پايدىلىنىشىغا قۇلايلىق. باغچىلاردا يەرلەرنى گۈل - گىياھ، دەل - دەرەخلەر ئارقىلىق كۆكەرتىش ئاساس قىلىنىدۇ، پىيادىلەر يولى ۋە ئارام ئالىدىغان ئورۇندۇقلار مۇۋاپىق ئورۇنلاشتۇرۇلىدۇ. بۇنداق باغچىلاردا ئانچە - مۇنچە بالىلار ئويۇنچۇقلىرى، كۆلچەك، گۈلزارلىق، ھەيكەل، گۈل جاھازلىرى، تەشۋىقات كارىدورى دېگەندەكلەرمۇ بار.
جۇڭگودا باغچە قۇرۇلۇشىنىڭ مۇۋەپپەقىيەتلىك مىساللىرى ناھايىتى كۆپ. داليەن شەھىرىنىڭ جۇڭشەن مەيدانىدىكى يېشىللىق، خاڭجۇ شەھىرىنىڭ ۋۇلىن مەيدانىدىكى يېشىللىق، شاڭخەي شەھىرىنىڭ جياڭشى ئوتتۇرا يولىدىكى كىچىك باغچە، تيەنجىن شەھىرىنىڭ گۇيلىن يولىدىكى باغچە، خېفېي شەھىرىدىكى داۋشياڭ باغچىسى ۋە خېبىڭ باغچىسى قاتارلىقلار كىشىلەرنىڭ ياقتۇرۇشىغا ئېرىشىپ كەلمەكتە."
|