قارا قۇرۇم ئېتىكىدىكى كارۋان ناخشىسى
مۇتەللىپ مەتتوختى ماقالىسى ۋە فوتوسى
بۈگۈنكى كۈندە كىشىلەر ماددىي تۇرمۇشىنىڭ كۈندىن-كۈنگە ئېشىشى تۈرتكىسىدە مەنىۋىي تۇرمۇشىدا بەلگىلىك ئۆزگىرىش ھاسىل قىلىپ، بەزىبىر تەۋەككۈل قىلىش خاراكتىرىدىكى تەنتەربىيە پائالىيەتلىرى بىلەن كۆپلەپ شۇغۇللانماقتا. بۇنىڭ بىر تۇرى بولغان ئىكىسپىدىتسىيە ساياھەت ھەرىكىتى نۆۋەتتە كىشىلەر ياخشى كۆرىدىغان ۋە ئىختىيارىي ھالدا كوللىكتىپ ئەترەت بولۇپ تەشكىللىنىدىغان جۇشقۇن ھالەتنى شەكىللەندۈرمەكتە. خوتەن ۋىلايىتىدە بولسا بۇ تۈردىكى ساياھەت پائالىيەتلىرىمۇ خېلى كۆپ تەشكىللىنىدىغان بولدى. ئۇلار ئاساسلىقى خوتەن ۋىلايىتىنىڭ تاغلىق رايۇنلىرىدا 《كوئىنلۇن -قاراقۇرۇم 》تاغلىرى ئېكىسپىدىتسىيە ھەرىكەتلىرىنى جانلاندۇرماقتا.
بىر قېتىملىق خىزمەت سەۋەبى بىلەن ماڭىمۇ بۇنداق پۇرسەت يار بولدى . تۇنجى قېتىم 2007-يىلى 2-ئاي ۋاقتى بىلەن 《قاراڭغۇ تاغ خاتىرىسى》ھۆججەتلىك فىلىم ئىشلەش گۇرۇپپىسى ئەزالىرىغا ئەگىشىپ دېڭىز يۈزىدىن ئېگىزلىكى 3000 مىتىردىن 4000مىتىرغىچە بولغان، ئۇزۇنسىغا سوزۇلغان تار، تىك قىيا تاغ يوللىرىنى بويلاپ 14ئىشەكلىك كارۋاننى ھاسىل قىلىپ تاغلىق رايۇن قاراڭغۇ تاغ كەنتىگە قاراپ كېتىۋاتقىنىمدا، ئىختىيارسىز ھالدا ئەجداتلىرىمىز ياڭرىتىپ كېلىۋاتقان كارۋان ناخشىسىنىڭ قارا–قۇرۇم تاغلىرى ئارىسىدىكى سىماسى كۆز ئالدىمدا نامايەن بولدى.
《قاراڭغۇ تاغ》كەنتى خوتەن ناھىىيىسىگە قاراشلىق قاشتېشى يېزىسىنىڭ تەۋەلىكىدە بولۇپ، قاراقۇرۇم تاغلىرى ئارىسىغا جايلاشقان . ئارانلا 320 نەچچە ئاھالە ۋە 830 نەچچە نوپۇسقا ئىگە چارۋىچىلىق مەھەللىسى ھېساپلىنىدۇ. خوتەن شەھىرى بىلەن بولغان ئارىلىقى 170 كىلومىتر كېلىدۇ. قاشتېشى يېزىسى بىلەن بولغان ئارىلىقى 40كىلومىتر، ئاساسلىقى تىك قىيا شەكىللىك چىغىر يوللار بولۇپ، پۇتۇن مۇساپىنى ئات-ئۇلاغلار بىلەن كۆپىنچە پىيادە بېسىشقا توغرا كېلىدۇ، يول بويى تۆۋەنگە چۈشىدىغان ئىگىزگە يامىشىدىغان ئەھۋاللار كۆرۈلۈپ تۇرىدۇ.
يەرلىك خەلىقلەر ئۆزلىرىنىڭ ئىشچانلىقى ۋە ئەقىل پاراسىتى بىلەن بۇ يۇرتنىڭ تەبىئىي ئەۋزەللىكلىرىدىن پايدىلىنىپ، يۇرۇڭقاش دەرياسىنىڭ ئەۋزەك سۇلىرىنى ئۆزلىرىنىڭ ھايات ماياكى قىلىپ، تاغ-داۋانلارنىڭ ياۋايى ئوت-چۆپلىرىنى ئۆزلىرىنىڭ تۇرمۇش ھەمراھلىرى قىلىپ، قارا-قۇرۇم تاغلىرىنىڭ ھەربىر چوققىلىرىنى ئۆزلىرىنىڭ سۇنماس-پۈتمەس ئىرادىسىنىڭ سىموۋولى قىلىپ مەزمۇت قەدەملەر بىلەن بۇ يۇرتنىڭ گۈزەل مەنزىرىسىنى ياراتماقتا.
مۇشۇ گۈزەل مىنۇتلارنىڭ تۈرتكىسىدە شۇ يىلى يازدا يەنى 7-ئاي ئىچىدە ئىككىنچى قېتىم بۇ يۇرتقا قەدەم تەشرىپ قىلدىم. يەنىلا ئالدىنقى قېتىمقىغا ئوخشاش يول بويى تەسىرلىك كۆرۈنۈشلەرنى سۈرەتكە ئالغاچ، چوڭ-كىچىك سەپەرداشلارقوشۇلۇپ، قرا-قۇرۇم تاغلىرى ئېتىكىدىكى يەنە بىر كارۋاننى شەكىللەندۈردۇق ھەمدە دوستلىرىم بىلەن بىرگە مۇڭلۇق كارۋان ناخشىسىغا جۆر بولدۇق.
مانا بۇلار شۇ مىنۇتلارنىڭ تۇگىمەس يالدامىلىرى .
يوللىغان ۋاقتى 2012-1-14 19:42:06
يوللىغان ۋاقتى 2012-1-15 02:13:09
