ئاياللار بىلىۋېلشقا تېگىشلىك ئەرلەرنىڭ ئارزۇلىرى
سۈرەييە يۈسۈپ، گۈلبانۇ ئابدۇۋەلى
(سۈرەييە پىسخىكىلىق مەسلىھەت بېرىش ئورنىدىن)
پىسخىكىلىق مەسلىھەت بېرىش ئورنىمىزغا كېلىپ، مەسلىھەت ئالىدىغانلارنىڭ كۆپىنچىسى مۇھەببەت، نىكاھ ۋە تۇرمۇش ئىشلىرىدا كۆڭۈلسىزلىككە ئۇچراپ، مەسلىھەت ئالغىلى كېلىدۇ. مۇھەببەتلىشىۋاتقانلارنىڭ كۆپىنچىسى توي قىلغاندىن كېيىنكى تۇرمۇشنى ناھايىتى گۈزەل، رومانتىك بولىدۇ دەپ ئويلاپ، شېرىن خىياللارنى قىلىپ، توي قىلىشقا ئالدىرايدۇ، توي قىلغاندىن كېيىن بولسا، توي قىلىش دېگەننىڭ مۇھەببەتلىشىشكە ئوخشىمايدىغانلىقىنى، تەسەۋۋۇرىدىكىدەك رومانتىك بولمايدىغانلىقىنى چۈشىنىپ يېتىدۇ. بۇ دۇنيادىكى ھەرقانداق بىر كىشى شېرىن مۇھەببەتكە ئىنتىلىدۇ ھەم بەختلىك ئائىلىسىنىڭ بولۇشىنى ئۈمىد قىلىدۇ، لېكىن بۇلارغا ئېرىشىش ئۇنداق ئوڭاي ئىش ئەمەس، گۈزەل ئارزۇ-ئارمانلىرىغا يېتىش ئۈچۈن، ھەربىر كىشى(ئەر-ئايال)مەلۇم تىرىشچانلىق كۆرسىتىشى كېرەك.
ئۇنداق بولسا، توي قىلغاندىن كېيىن ئەرلەر ئايالىنىڭ ئۆزىنى قايسى تەرەپلەردىن چۈشىنىشىنى ئارزۇ قىلىدۇ؟ ماتېرىياللاردا كۆرسىتىلىشىچە، ئەرلەر توي قىلغاندىن كېيىن تۆۋەندىكى بىر قانچە تەرەپلەردە ئايالىنىڭ چۈشىنىشگە ئېرىشىشنى ئارزۇ قىلىدىكەن:
1. ئەرلەر خىزمەتكە بېرىلىپ كەتكەندە، ئايالىنىڭ توغرا چۈشىنىشىنى، يوقىلاڭ ئىشلارنى بانا قىلىپ، يولدىشىدىن ئاغرىنماسلىقىنى ئۈمىد قىلىدۇ. چۈنكى ئەرلەر خىزمەتنى ۋە ئۆز كەسپىنى بىرىنچى ئورۇنغا قويىدۇ، شۇنداقلا بۇ ئۇلارنىڭ ئۆز قىممىتىنى يارىتىش ۋە ئوبرازىنى تىكلەشتىكى مۇھىم ئامىل ھېسابلىنىدۇ. شۇڭا ئەرلەر ئايالىنىڭ ئۆز خىزمىتىنى ھەرقايسى جەھەتلەردىن قوللىشىنى، خىزمەت سەۋەبىدىن ئائىلىسىگە ۋە ئايالىغا تازا ياخشى كۆڭۈل بۆلەلمەسلىكىنى كەچۈرۈۋېتىشىنى ئۈمىد قىلىدۇ.
2 . ئەرلەر ئايالىغا پۇل خەجلەشكە پىخسىقلىق قىلمايدۇ، پەقەت بەزىدە ئايالىنىڭمۇ ئۆز پىكرىگە ھۆرمەت قىلىشىنى ئۈمىد قىلىدۇ. پۇل ۋە مال- دۇنيا ئەرلەرگە نىسبەتەن ئېلىپ ئېيتقاندا، خاتىرجەم، باياشات تۇرمۇش ئاتا قىلالىغاندىن باشقا، شۇ ئەركىشىنىڭ ئائىلىدىكى ھوقۇقىنىڭ سىمۋۇلى بولۇپ ھېسابلىنىدۇ. ئەر كىشىنىڭ ئۆز ئايالىغا پۇل خەجلىشى ئەلۋەتتە ئۆزگەرمەيدىغان ھەقىقەت، بىراق، قىممەترەك نەرسىلەرنى سېتىۋېلىشقا توغرا كەلگەندە، كۆپىنچە ئەرلەر، ئايالىنىڭ ئۆز پىكرىگە ھۆرمەت قىلىشىنى، بىر ئائىلە كىشىلىرى چىرايلىق ئولتۇرۇپ مەسلىھەتلىشىشىنى ئۈمىد قىلىدۇ.
3 . ئەرلەر ئايالىنىڭ ئاغىىنىلىرى بىلەن داۋاملىق ئالاقىلىشىپ، ئىزدىشىپ تۇرۇشىغا قارشى تۇرماسلىقىنى ئۈمىد قىلىدۇ. كۆپىنچە ئەرلەر توي قىلغاندىن كېيىنمۇ، ئۆزىنىڭ ئىلگىرىكى ئاغىينىلىرى بىلەن داۋاملىق ئالاقىلىشىپ، ئىزدىشىپ ئۆتۈشنى ياخشى كۆرىدۇ ۋە ئايالىنىڭ بۇنىڭغا قارشى تۇرماسلىقىنى ئۈمىد قىلىدۇ. بولۇپمۇ يۈز-ئابرۇيغا ئالاھىدە ئەھمىيەت بېرىدىغان ئەرلەرنىڭ مۇناسىۋەت دائىرىسى بىرئاز كەڭ بولۇپ، ھەرقايسى ساھەلەردە ئاغىينىلىرى بولىدۇ. شۇڭا ئەرلەر توي قىلغاندىن كېيىن ئايالىدىن باشقا يەنە دوستلىرىغىمۇ ناھايىتى ئېھتىياجلىق بولىدۇ.
4.كۆپىنچە ئەرلەر چىرايلىق قىزلارغا قاراشنى ياخشى كۆرىدۇ، لېكىن بۇ ئۇلارنىڭ ئەخلاق جەھەتتە پۈتۈنلەي تۈگەشكەنلىكىنى ياكى شەھۋەتپەرەس ئىكەنلىكىنى ئىپادىلىمەيدۇ. ئادەتتە، ئاياللار يولدىشىنىڭ باشقا ئاياللارغا قارىشىنى ياقتۇرمايدۇ، لېكىن، ئەرلەرنىڭ باشقا چىرايلىق قىزلارغا قارىشى پەقەت ئۇلارنىڭ بىرخىل پىسخىكىلىق ماھىيىتىنىڭ ئىپادىلىنىشى بولۇپ ھېسابلىنىدۇ. چۈنكى چىرايلىق نەرسىلەرنى ھەممە ئادەم ياخشى كۆرۈپ ئېرىشكۈسى كېلىدۇ؛ بولۇپمۇ ئەرلەر چىرايلىق نەرسىىلەرنىڭ تەسىرىگە ئاسان ئۇچرايدۇ. ئاتالمىش چىرايلىق نەرسىلەر ئۇلارنى ۋاقىتلىق بىھۇش قىلىدۇ. لېكىن ۋاقتىدا تەدبىر قوللىنىلسا ئېزىپ كېتىشىنى تامامەن توسىغىلى بولىدۇ.
5. 《ئويۇنغا بېرىلىش》ئەرلەرنىڭ تەبىئىتى بولۇپ، بۇ جەھەتتە ئايالىنىڭ چۈشىنىشىگە موھتاج بولىدۇ. ئەرلەرنىڭ يوشۇرۇن ئېڭىدا، بىرخىل بالىلارچە پىسخىكا ساقلانغان بولۇپ، ئۇلار توپ تېپىش، بېلىق تۇتۇش قاتارلىق پائالىيەتلەرنى ۋە ماركىلىق ياڭراتقۇ، تېلېكامىرا، كومپيۇتېر قاتارلىق نەرسىلەرنى ناھايىتى ياخشى كۆرىدۇ ھەم بۇنىڭدىن روھىي ئازادىلىككە، خۇشاللىققا ئېرىشەلەيدۇ، شۇنداقلا بۇ خىل قىزىقىشنىڭ ئۇلارنىڭ خىزمەت ۋە تۇرمۇش بېسىملىرىنى يېنىكلىتىشىگە ياردىمى بولىدۇ. لېكىن ئەرلەر مۇشۇ قىزىقىشى تۈپەيلىدىن، بەزىدە ئايالىغا سەل قاراپ قېلىشى، كۆڭۈل بۆلەلمەسلىكى مۇمكىن.
6. ئاياللار ئەرلەرنىڭ گەپ سۆزىگە بەك ئېسىلىۋالماي، ئۇنىڭ ئەمەلىي ھەرىكىتىنى مۇھىم بىلىشى لازىم. ھەممە ئەر كىشىنىڭ كۆيۈمچان، تاتلىق گەپلەرگە ئۇستا بولۇشى ناتايىن، بەزى ئەرلەرنىڭ گەپ –سۆز، ھەرىكەتلىرى بىر ئاز قوپال بولۇپ، ئايالىغا كۆيۈنۈشنى بىلمەيدىغاندەك، بىغەم تەسىر بېرىپ قويىدۇ. شۇنىڭ ئۈچۈن ئاياللار، ئېرىنىڭ دېگەن گەپلىرىنى ۋە ياكى مۇنداقلا دەپ قويغان چاقچاقلىرىنى مۇھىم دەپ ئېسىلىۋالماي، ئۇلارنىڭ ئەمەلىي ھەرىكىتىگە بەكرەك ئەھمىيەت بېرىش كېرەك.
ئادەتتە ئەرلەر ئەقىلگە تايىنىپ مەسىلىلەرگە باھا بېرىدۇ ۋە شۇ ئاساستا ئىش قىلىدۇ، ئاياللار بولسا ھېسسىياتقا تايىنىدۇ. ئەر-ئاياللاردىكى تەپەككۇر ئۇسۇلىنىڭ ئوخشاش بولماسلىقى تۈپەيلىدىن، ئەرلەرنىڭ بەزى ھەرىكەتلىرى، ئوي - خىيالى ۋە بەزى گەپ سۆزلىرى ئاياللاردا ئېرىگە نىسبەتەن خاتا چۈشەنچە پەيدا قىلىپ قويۇشى ۋە بەزى ئۇقۇشماسلىقلارنى كەلتۈرۈپ چىقىرىشى مۇمكىن. قىسقىسى، مۇكەممەل نىكاھ مۇناسىۋىتىنى ساقلاپ قېلىش ئۈچۈن، ئەر-ئاياللار، بىر-بىرىنى چۈشىنىشى، بىر-بىرىگە كەڭ قورساق بولۇپ، ئۆزئارا يول قويۇشى لازىم. ئۇلى مۇستەھكەم ئىناق ئائىلە قۇرۇش ئۈچۈن، بىر تەرەپ ئۇزاققىچە قۇربانلىق بېرىشى مۇمكىن، بۇ پۈتۈن بىر ئائىلىنىڭ گۈزەل ئەتىسى ئۈچۈن ئەرزىيدۇ. شۇنداق بولغاندىلا، بەختلىك، خاتىرجەم ئائىلە مۇھىتىنى ساقلاپ قالغىلى بولىدۇ.
يۇقىرىدا بىز ئېيتىپ ئۆتكەن ئەھۋاللار قىسمەن كىشىلەرگە ماس كەلمەسلىكىمۇ مۇمكىن، شۇ سەۋەبتىن كۆپ ھاللاردا پىسخىك مەسلىھەتچىسىنىڭ ياردىمىگە موھتاج بولىدۇ. بۇنداق چاغدا، نۇرغۇن كىشىلەر پىسخىكىدىن مەسلىھەت ئالغىلى كېلىپ، تىنچ مۇھىتتا، پىسخىكىدىن مەسلىھەت بەرگۈچىنىڭ ياردىمىدە، كەيپىياتى ياخشىلىنىپ، قىسمەن مەسىلىلەرگە بولغان كۆز قارىشنى ئۆزگەرتىدۇ-دە، كېينكى تۇرمۇشىنى ياخشى ئۆتكۈزۈش ئۈچۈن تىرىشىشقا بەل باغلايدۇ.
يىغىپ ئېيتقاندا، مۇكەممەل نىكاھ، خاتىرجەم تۇرمۇشقا ئېرىشىش ئۈچۈن، نوقۇل بىرلا تەرەپ ئەمەس بەلكى ئەر-ئاياللار ئورتاق كۈچ چىقىرىشى لازىم.
دىققەت: بۇ ماقالە پەقەت تەڭرىتاغ مۇنبىرىگىلا مەنسۇپ، باشقا مۇنبەرگە قەتئىي يوللاشقا بولمايدۇ!
بۇ يازمىنى ئاخىرىدا Abdulla74 تەھرىرلىگەن. ۋاقتى 2011-12-12 11:47 
يوللىغان ۋاقتى 2011-12-11 21:52:00
يوللىغان ۋاقتى 2011-12-11 22:36:11
