خەپ ھاراق
(مۇخەممەس)
(بىر مەيخور تىلىدىن)
مەخمۇت ئاۋۇت(مۇزاتى)
پۇلۇم باردا چىڭ ياماشتىڭ خەپ ھاراق،
پۇللىرىمنى بۇزۇپ چاچتىڭ خەپ ھاراق،
بىھۇش قىلىپ كۆڭۈل ئاچتىڭ خەپ ھاراق،
پۇلۇم تۈگسە زەھەر چاچتىڭ خەپ ھاراق،
مېنى سېرىپ بەدەر قاچتىڭ خەپ ھاراق.
زورلاش بىلەن ئوتلاپ سالدىم بىر نۆۋەت،
ئىككىنچىسى كەلدى يەنە قىپ دەۋەت،
ئۈچىنچىدە تەنگە كىردى جاسارەت،
ئىچكەنسىرى قىلالمىدىم قانائەت،
ئاستاغىنا ھىم چىرماشتىڭ خەپ ھاراق.
شۇندىن بېرى تۇتار پات-پات خۇمارى،
بولماس ئىچمەي ئۈلپەتداشلار قاتارى،
چىشلىۋالسا قىلار مېنى ئاھ-زارى،
شۇنداقتىمۇ بولغاچ يامان خۇمارى،
غۇلاچ كېرىپ قوينۇڭ ئاچتىڭ خەپ ھاراق.
دائىم ئىشكەچ ئايلاندۇردى زابويغا،
كەيىپلىكتە سالدى مېنى ھەر كويغا،
ئەقلىم يوقاپ ئوخشاپ قالدىم تومپايغا،
شالىم چېچىپ يۈردۈم قاتراپ ھەر جايغا،
ھۇش-كاللامنى ئېلىپ قاچتىڭ خەپ ھاراق.
مەسخۇش يۈرگەچ يۈرۈشمىدى ئىشلىرىم،
مۇشت-پەشۋا يەپ ساق قالمىدى چىشلىرىم،
كەتتى زايە ۋاقتىم، يازۇ-قىشلىرىم،
كۆرگەنلىرىم بولدى خىيال-چۈشلىرىم،
تاۋىقىمغا توپا چاچتىڭ خەپ ھاراق.
كەيىپلىكتە تاپالمىغاچ ئۆيۈمنى،
يۇرت ئىچىدە تۆكۈۋالدىم يۈزۈمنى،
ئەمدى ھېچكىم ئىلىك ئالماس سۆزۈمنى،
ئەجەپ بولدۇم تونالمىدىم ئۆزۈمنى،
زەئىپلەشتىم، سەن ياماشتىڭ خەپ ھاراق.
ئىچىۋەردىم بىلىپ ئۇنى غەنىمەت،
كېلىپ ئېغىر بولالمىدىم سالامەت،
ئىشتىن قېلىپ كەملىدى پۇل-دارامەت،
گاراڭ يۈرگەچ قاچتى مەندىن قۇت-ئامەت،
زاۋاللىققا سەن يول ئاچتىڭ خەپ ھاراق.
رىقابەتتە سەن يەڭدىڭ، مەن ئۇتۇلدۇم،
جىنايەتكە يول ئېلىپ مەن تۇتۇلدۇم،
تەربىيىدە ئۆزگەرتىلدىم، كۈتۈكدۈم،
بۇ نىجىستىن پاكلاندىم ھەم قۇتۇلدۇم،
سەسكەندۈردۈڭ،ھەدىن ئاشتىڭ خەپ ھاراق.
كەچتىم سەندىن يولىمايمەن يېنىڭغا،
جەۋرى سالدىڭ قىيناپ مېنىڭ جېنىمغا،
كۈيە بولدۇڭ بىسات ، پۇلۇ-مېلىمغا،
خەنجەر ئۇردۇڭ ساپ يۈرۈگۈم-دىلىمغا،
لەنەت ساڭا، زېھنىم قاچتى خەپ ھاراق.
..............................................
ئەي يارەنلەر بۇ كوچىغا كىرمەڭلار،
بولۇپ خۇمار شىرىن خىيال سۈرمەڭلار،
ئۇ باشلىسا ھەريان ئېزىپ يۈرمەڭلار،
ئىبرەت بولسۇن مەندەك كۈننى كۆرمەڭلار،
تۇيۇق يولغا ئىشىك ئاچتىڭ خەپ ھاراق.
ئاپتورى : باي ناھىيىسىدىن: مەخمۇت ئاۋۇت(مۇزاتى)
يېزىلغان ۋاقتى: 2012-يىل 6-ئاينىڭ4-كۈنى(باي)
يوللىغان ۋاقتى 
