ئالىي مەكتەپلەرگە قوبۇل قىلىنىدىغان ئوقۇغۇچىلارنىڭ سانى كۆپەيتىلدى
ئالىي مەكتەپ ئىمتىھانى يېقىنلاشقاندا ، قايسى ئالىي مەكتەپكە ئىمتىھان بېرىش ئائىلە باشلىقلىرى ۋە ئىمتىھان بەرگۈچىلەر ئەڭ كۆڭۈل بۆلىدىغان مەسىلە . 4-ئىيۇن شىنجاڭدىكى ھەرقايسى ئالىي مەكتەپلەرنىڭ ئوقۇغۇچى قوبۇل قىلىش پىلانى ، كەسىپلىرى بېسىلغان ‹‹شىنجاڭ ئوقۇغۇچى قوبۇل قىلىش ۋە ئىمتىھان ›› ژۇرنىلىنىڭ 3-سانى شىنجاڭدىكى 154 مىڭ 700 ئىمتىھان بېرىدىغان ئوقۇغۇچىنىڭ قولىغا ئارقا-ئارقىدىن تارقىتىلدى ، ئىمتىھان بەرگۈچىلەر ئالىي مەكتەپلەرنىڭ شىنجاڭدىن ئوقۇغۇچى قوبۇل قىلىش پىلانى ، كەسىپلىرى ۋە قوبۇل قىلىدىغان ئوقۇغۇچى سانى قاتارلىق ئۇچۇرلارنى شۇنىڭدىن سۈرۈشتۈرسە بولىدىكەن .
شىنجاڭ مەركىزىي شەھەر گېزىتىنىڭ مۇخبىرى ئاپتونوم رايونلۇق ئوقۇغۇچى قوبۇل قىلىش ئىشخانىسىدىن تۆۋەندىكى ئىشلاردىن خەۋەر تاپتى ؛ بۇ يىل ئاپتونوم رايونىمىزدىن جەمئىي 154 مىڭ 700 ئوقۇغۇچى ئالىي مەكتەپ ئىمتىھانىغا قاتنىشىدىغان بولۇپ ، ئۆتكەن يىلدىكىگە قارىغاندا 7000 غا يېقىن ئوقۇغۇچى كۆپ ئىكەن . شۇنىڭ بىلەن بىر ۋاقىتتا، شىنجاڭ ئىچى-سىرتىدىكى ئادەتتىكى ئالىي مەكتەپلەرنىڭ شىنجاڭدىن پىلان بويىچە قوبۇل قىلىدىغان ئوقۇغۇچى سانىمۇ مۇناسىپ ھالدا كۆپەيتىلىپ ، 123 مىڭغا يېتىدىكەن ، ئۆتكەن يىلقىغا سېلىشتۇرغاندا 4500 گە يېقى ئوقۇغۇچى ئارتۇق قوبۇل قىلىنىدىكەن.
مۇخبىر ‹‹شىنجاڭ ئوقۇغۇچى قوبۇل قىلىش ۋە ئىمتىھان ›› ژۇرنىلىدىن تۆۋەندىكىلەرنى كۆرگەن ، بۇ يىل ئاپتونوم رايونىمىزنىڭ ئالىي مەكتەپلەرگە ئوقۇغۇچى قوبۇل قىلىش سىياسىتىدە ئۆتكەن يىلدىكىگە قارىغاندا بەزى ئۆزگىرىشلەر بولىدىكەن، مەسىلەن ، ‹‹نىشانلىق ھەقسىز تەربىيەلىنىدىغان پېداگوگىكا ئوقۇغۇچىلىرى ›› جەھەتتە ، تەربىيەلەيدىغان ئالىي مەكتەپلەر رايونلار تەۋسىيە قىلغان شەرتكە ئۇيغۇن كەلمەيدىغان ئوقۇغۇچىلارنى قايتۇرىۋېتىشكە ھوقۇقلۇق ئىكەن ؛ داڭلىق ئالىي مەكتەپلەر ئوقۇغۇچى قوبۇل قىلىش جەھەتتە ، بۇ يىل چىڭخۇا ئۇنىۋېرسىتېتى ، بېيجىڭ ئۇنىۋېرسىتېتى پىلان بويىچە شىنجاڭدىن 73 ئوقۇغۇچى قوبۇل قىلىدىغان بولۇپ ، ئۆتكەن يىلدىكىگە قارىغاندا 8 ئوقۇغۇچىنى ئارتۇق قوبۇل قىلىدىكەن ؛ شۇنىڭ بىلەن بىر ۋاقىتتا، ئاپتونوم رايون بويىچە (بىڭتۈەننى ئۆز ئىچىگە ئالمايدىكەن ) يېزىلاردىن زاكاسلىق ، نىشانلىق تىبابەتچىلىك ئوقۇغۇچىلىرىنى ھەقسىز تەربىيەلەش پىلانى بويىچىمۇ 200 ئوقۇغۇچى قوبۇل قىلىنىدىكەن.
ئۇقۇشىمىزچە ، بۇ يىل ئاپتونوم رايوننىڭ ‹‹نىشانلىق ھەقسىز تەربىيەلىنىدىغان پېداگوگىكا ئوقۇغۇچىلىرى›› نى قوبۇل قىلىش پىلانى 3000 نەپەر بولۇپ ، بۇلار تولۇق كۇرس ، مەخسۇس كۇرس ، ئوتتۇرا دەرىجىلىك پېداگوگىكا مەكتىپىدىن ئىبارەت ئۈچ قاتلام بويىچە قوبۇل قىلىنىدىكەن .بۇنىڭ ئىچىدە پىلان بويىچە تولۇق كۇرسقا 1700 ، مەخسۇس كۇرسقا 900 ، ئوتتۇرا دەرىجىلىك پېداگوگىكا مەكتىپىگە 400 ئوقۇغۇچى قوبۇل قىلىنىدىكەن . تەربىيەلەيدىغان مەكتەپلەرنىڭ ئوقۇغۇچى قوبۇل قىلىش پىكىرىگە تولۇق ھۆرمەت قىلىش ئۈچۈن ، ئۇلارنىڭ رايونلار تەۋسىيە قىلغان شەرتكە ئۇيغۇن كەلمەيدىغان ئوقۇغۇچىلارنى قايتۇرۇۋېتىش ھوقۇقىغا ئىگە بولۇشى ئالاھىدە تەلەپ قىلىنغان .
چىڭخۇا ئۇنىۋېرسىتېتى ، بېيجىڭ ئۇنىۋېرسىتېتى قاتارلىق بازىرى ئىتتىك مەكتەپلەر شىنجاڭدىن ئوقۇغۇچى قوبۇل قىلىش پىلانىنى بىر ئاز كۆپەيتىدىكەن . بېيجىڭ ئۇنىۋېرسىتېتى پىلان بويىچە شىنجاڭدىن 47 ئوقۇغۇچى قوبۇل قىلىدىغان بولۇپ، ئالدىنقى يىلدىكىگە قارىغاندا ئۈچ ئوقۇغۇچىنى ئارتۇق قوبۇل قىلىدىكەن . بۇنىڭ ئىچىدە مەدەنىيەت ، تارىخ تۈرىدىكىلەرگە 17 ئوقۇغۇچى ، تەبىئىي پەن ۋە سانائەت تۈرىدىكىلەرگە 20 ئوقۇغۇچى ، تېبابەتچىلىك بۆلۈمىگە 10 ئوقۇغۇچى قوبۇل قىلىدىكەن. ئوقۇغۇچى قوبۇل قىلىدىغان كەسىپلەر ئىچىدە ، ئىجتىمائىي پەن كەسىپلىرىدىن : قانۇنشۇناسلىق ، ئىقتىساد ۋە پۇل-مۇئامىلە، سودا-سانائەتنى مەمۇرىي باشقۇرۇش تۈرىدىكىلەر ۋە ئەرەب تىلى قاتارلىقلار بار ئىكەن ؛ تەبىئىي پەن كەسىپلىرىدىن : قۇرۇلۇش مېخانىكىسى تۈرىدىكىلەر ، گېئولوگىيە ئاساسىي سىنىپى ، ئېلېكىترونلۇق ئۇچۇر ئىلمىي تۈرىدىكىلەر ، مۇھىت ئىلمىي تۈرىدىكىلەر، ئۇچۇر باشقۇرۇش ۋە ئۇچۇر سىستېمىسى قاتارلىقلار بار ئىكەن .
چىڭخۇا ئۇنىۋېرسىتېتى پىلان بويىچە شىنجاڭدىن 26 ئوقۇغۇچى قوبۇل قىلىدىغان بولۇپ ، ئالدىنقى يىلدىكىگە قارىغاندا بەش ئوقۇغۇچىنى ئارتۇق قوبۇل قىلىدىكەن ، ئوقۇغۇچى قوبۇل قىلىدىغان كەسىپلەر ئىچىدە ، ئىجتىمائىي پەن كەسىپلىرىدىن: ئىجتىمائىي پەنلەر تەجرىبە سىنىپى ، قانۇنشۇناسلىق ، ئىقتىساد ۋە پۇل-مۇئامىلە (خەلقئارالىق سىنىپ)، سودا-سانائەتنى باشقۇرۇش تۈرىدىكىلەر (بوغالتېرلىق ئىلمى) بار بولۇپ ، ھەر قايسىسىغا بىردىن ئوقۇغۇچى قوبۇل قىلىنىدىكەن ؛ تەبىئىي پەن كەسىپلىرىدىن : بىناكارلىق ، توپا-تاش قۇرۇلۇشى ، سۇ ۋە سۇ ئېلېىكتىر قۇرۇلۇشى ، مېخانىكا قۇرۇلۇشى ۋە ئاپتوماتلاشتۇرۇش(مېخانىكا فاكۇلتېتى)، فىزىكا، خىمىيە ، بىئولوگىيە ، كىلىنىكىلىق مېدىتسىنا (داۋالاش ، دورىگەرلىك تەجرىبە سىنىپى)، ئىقتىساد ۋە پۇل-مۇئامىلە (خەلقئارالىق سىنىپ) قاتارلىقلار بار ئىكەن .
بۇنىڭدىن سىرت ، بارلىق بۆلۈملەر دوختۇرلىرىنى مۇھىم نۇقتا قىلغان ئاساسىي قاتلام داۋالاش - ساقلىقنى ساقلاش قوشۇنى قۇرۇلۇشىنى كۈچەيتىش ئۈچۈن ، بۇ يىل ئاپتونوم رايون بويىچە (بىڭتۈەننى ئۆز ئىچىگە ئالمايدىكەن) يېزىلاردىن زاكاسلىق، نىشانلىق تىبابەتچىلىك ئوقۇغۇچىلىرىنى ھەقسىز تەربىيەلەش پىلانى بويىچىمۇ 200 ئوقۇغۇچى قوبۇل قىلىنىدىكەن . بۇنىڭ ئىچىدە كىلىنىكىلىق مېدىتسىنا كەسپىگە 150 ، جۇڭيى تېبابىتى داۋالاش كەسپىگە 50 ئوقۇغۇچى قوبۇل قىلىنىدىكەن ، يۇقىرىقى ئىككى كەسىپنىڭ ئوقۇش مۇددىتى بەش يىل بولىدىكەن (مىللىيچە تىلدا ئوقۇغان ئوقۇغۇچىلارغا بىر يىل تەييارلىق بۆلۈمى قوشىلىدىكەن)، ئوقۇتۇش ۋەزىپىسىنى شىنجاڭ تېببىي ئۇنىۋېرسىتېتى ئۈستىگە ئالىدىكەن . ئىمتىھانغا تىزىملىتىشتا ئىمتىھان بەرگۈچىلەرنىڭ نوپۇس تەۋەلىكى چەكلەنمەيدىكەن . ئوخشاش شەرت ئاستىدا يېزا نوپۇسىدىكى ۋە نوپۇسى نىشانلىق تەربىيەلەشنى ھاۋالە قىلغان ئورۇنلار تۇرۇشلۇق ناھىيە ، شەھەرلەردىكى ئوقۇغۇچىلار ئالدىن قوبۇل قىلىنىدىكەن . ‹‹شىنجاڭ ئوقۇغۇچى قوبۇل قىلىش ۋە ئىمتىھان ›› ژۇرنىلىنىڭ تونۇشتۇرىشىچە ، يېزا-بازارلىق شىپاخانىلارغا ئىشقا ئۇرۇنلاشقان ئوقۇغۇچىلار ئۇدا ئالتە يىلدىن ئارتۇق خىزمەت قىلىدىكەن . كېلىشىمدە بەلگىلەنگەن مۇلازىمەت مۇددىتى ئىچىدە ، شۇ رايون تەۋەسىدىكى يېزا ئاساسىي قاتلام ساقلىقنى ساقلاش ئاپپاراتلىرى ئارا يۆتكىلىپ ئىشلىسە بولىدىكەن .
بۇ يىل تېخىمۇ كۆپ ئوقۇغۇچىلارنىڭ ئالىي مەكتەپلەرگە كىرىپ بىلىم ئاشۇرۇشى ئۈچۈن ، شىنجاڭدىكى قىسمەن ئالىي مەكتەپلەرمۇ ئوقۇغۇچى قوبۇل قىلىش سالمىقىنى ۋە ئوقۇغۇچى قوبۇل قىلىش پىلانىنى ئاشۇرغان . شىنجاڭ پېداگوگىكا ئۇنىۋېرسىتېتى خەنزۇ تىلى بويىچە ئىجتىمائىي پەن كەسىپلىرىگە بىرىنچى تۈركۈم بىرىنچى قېتىمدا ، پىلان بويىچە 332 ئوقۇغۇچى قوبۇل قىلىدىغان بولۇپ ، ئۆتكەن يىلدىكىگە قارىغاندا 119 ئوقۇغۇچىنى ئارتۇق قوبۇل قىلىدىكەن ؛ شىنجاڭ تېببىي ئۇنىۋېرسىتېتى خەنزۇ تىلى بويىچە ، تەبىئىي پەن ۋە سانائەت پەنلىرى كەسىپلىرىدىكى تولۇق كۇرسقا بىرىنچى تۈركۈم بىرىنچى قېتىمدا ، پىلان بويىچە 426 ئوقۇغۇچى قوبۇل قىلىدىغان بولۇپ ، ئۆتكەن يىلدىكىگە قارىغاندا 152 ئوقۇغۇچىنى ئارتۇق قوبۇل قىلىدىكەن .
تەرجىمە قىلغۇچى: مۇسا ئەخمەت
مەنبە:تەڭرىتاغ ئۇيغۇرچە تورى
يوللىغان ۋاقتى 
يوللىغان ۋاقتى 
