ماھىر غىجەكچى مەخمۇت ئابلېزغا تون كىيدۈرۈلدى 
2012-يىل 3-ئىيۇن چۈشتىن بۇرۇن، تونۇلغان مۇقام سەنئەتكارى، ماھىر غېجەكچى مەخمۇت ئابلېز ئەپەندىگە تون كىيدۈرۈش مۇراسىمى ئاق بوز ئات رېستورانىدا داغدۇغىلىق ئۆتكۈزۈلدى. بۇ پائالىيەتكە مەخمۇت ئابلىز ئەپەندىنىڭ ئۇرۇق-تۇغقان، دوستلىرى، خىزمەتداشلىرى، يۇرتداشلىرى، شۇنداقلا ئاپتونوم رايونىمىزدىكى نۇقتىلىق ئاخبارات ۋاسىتىلىرىدىن بولۇپ، 300 تىن ئارتۇق ئادەم قاتناشتى.
شىنجاڭ ئۇيغۇر ئاپتونوم رايونلۇق خەلق ھۆكۈمىتى مەسلىھەتچىلەر ئىشخانىسىنىڭ مۇدىرى، شىنجاڭ ئۇنىۋېرسىتېتىنىڭ دوكتور يېتەكچىسى، تىلشۇناس، پىروفېسسور ئارسلان ئابدۇللا تەھۇر مەخمۇت ئابلىزنىڭ تەرجىمىھالىنى تونۇشتۇردى
پائالىيەتتە مەخمۇت ئەپەندىنىڭ سەنئەت ھاياتى تونۇشتۇرۇلدى، ئۇنىڭ قۇمۇل ۋىلايەتلىك سەنئەت ئۆمەكتە ئۇزۇن يىل ئىشلەپ، قۇمۇل 12 مۇقامىنى توپلاش، رەتلەش، ئېيتىش، شۇنداقلا مۇقام ۋارىسلىرىنى تەربىيەلەش جەھەتتە قولغا كەلتۈرگەن نەتىجىلىرى مۇئەييەنلەشتۈرۈلدى. ئۇنىڭ يۇرتداشلىرى، كەسىپداشلىرى، ئۇرۇق-تۇغقانلىرى ئۇنىڭغا گۈلدەستىلەرنى تەغدىم ئەتتى، تون كىيگۈزدى. ھەممەيلەن مەخمۇت ئابلىزغا زور ئۇتۇق، ئائىلىسىگە سالامەتلىك، ئاسايىشلىق تىلەشتى. تونۇلغان مۇقام سەنئەتكارى، ماھىر غېجەكچى مەخمۇت ئابلىز ئەپەندىنىڭ تەرجىمىھالى: مەخمۇت ئابلىز 1950-يىلى قۇمۇل شەھىرىنىڭ ئاستانە يېزىسىدا تۇغۇلغان. 1958-يىلىدىن 1966-يىلىغىچە ئوتتۇرا، باشلانغۇچ مەكتەپلەرنى شۇ يەردە ئوقۇغان. 1966-يىلىدىن 1976-يىلىغىچە يېزىدا قايتا تەربىيە ئالغان ۋە يېزا، ناھىيە، ۋىلايەت تەۋەسىدىكى ئىشتىن سىرتقى سەنئەت پائالىيەتلىرىگە قاتناشقان. ئۇنىڭ سەنئەت جەھەتتىكى ئالاھىدىلىكى ئالاھىدە ئېتىبارغا ئايلىنىپ 1976-يىلى 1-ئايدا قۇمۇل ۋىلايەتلىك سەنئەت ئۆمىكىگە قوبۇل قىلىنغان، مەخموت ئابلىز قۇمۇل سەنئەت ئۆمىكىگە قوبۇل قىلىنغاندىن كېيىن پىشقەدەم ئۇستازلاردىن كەسپىي بىلىملەرنى كەمتەرلىك بىلەن ئۆگىنىپ ئۆزىنىڭ سەنئەت جەھەتتىكى ماھارىتىنى مۇكەممەللەشتۈرۈشكە تىرىشتى. شۇ چاغلاردا ئالقىشقا ئېرىشىۋاتقان «غېرىب - سەنەم»، «غۇنچەم»، «گۈلنىسا»، «ۋەتەن قۇربانلىرى»...قاتارلىق درامىلاردا رول ئالدى ۋە مۇزىكا ئورۇنلاش جەھەتتىكى تالانتىنى نامايان قىلدى.
مەخمۇت ئابلىز 1978-يىلى «يۇرتىمىز گۈللەيدۇ مەڭگۈ»، «ئايدىڭدا» قاتارلىق ناخشىلىرى بىلەن ئىجادىيەت سېپىگە رەسىمي قەدەم قويدى. شۇندىن ئېتىبارەن ھازىرغا قەدەر 100 گە يېقىن ناخشا-مۇزىكا ئىشلىدى. بۇ ئىجادىيەتلىرىنىڭ كۆپىنچىسى رادىيودا، ئاز بىر قىسمى تېلېۋىزوردا ئېلان قىلىندى. مەخمۇت ئابلىز 2005-يىلى پېنسىيەگە چىققانغا قەدەر ئىجاد قىلغان ناخشا-مۇزىكىلاردىن ئاپتونوم رايونىمىز تەۋەسىدىكى ھەرخىل باھالاش پائالىيەتلىرىدە «قۇمۇل سۆيگۈسى»، «قۇمۇلنى كۆرۈڭ دوستلار» قاتارلىق ناخشىلىرى 1-دەرىجىلىك مۇكاپاتقا، «مۇقاملىرىم»، «قەدىرلىگىن ھاياتنى»، «قىزىمغا»، «قار لەيلىسى»، «سالام ئۇستاز»، «چۆمدى قۇمۇل پەيزىگە» قاتارلىقلار 2-دەرىجىلىك مۇكاپاتقا ئېرىشكەن.
2002-يىلى شىنجاڭ ئۇيغۇر ئاپتونوم رايونى بويىچە ئۆتكۈزۈلگەن «يېڭى ئەسىردىكى تۇنجى قېتىملىق سەنئەت كۆرىكى» دە «بايرام ناخشىسى» ناملىق ناخشا ئالاھىدە ئىجادىيەت مۇكاپاتىغا ئېرىشتى . 1996-يىلى قۇمۇل ۋىلايەتلىك مەمۇرى مەھكىمە بىلەن شىنجاڭ تېلېۋىزىيە ئىستانسىسى بىرلىشىپ ئىشلىگەن چوڭ تىپتىكى بەدىئىي فىلىم «قۇمۇل بوستانلىقىدا نەزمە»، 2005-يىلى ئىشلىگەن «قوغۇن يۇرتىدا مەشرەپ» قاتارلىق بەدىئىي فىلىملەردە مەخمۇت ئابلىز مۇزىكا يېتەكچىسىلىك ۋەزىپىسىنى ئۈستىگە ئېلىپ، فىلىمنىڭ تاماشىبىنلار بىلەن ئوڭۇشلۇق يۈز كۆرۈشىشىدە ئالاھىدە ھەسسە قوشتى.
2002-يىلى قۇمۇل ۋىلايەتلىك ناخشا-ئۇسسۇل ئۆمىكى مۇزىكا ئەترىتى يېڭى ياش كۈچلەرگە «قۇمۇل ئون ئىككى مۇقامى» نى ئۆگىتىش كۇرسى تەشكىللىدى. مەخمۇت ئابلىز بۇ جەھەتتە ئۆزىنىڭ پىشقەدەملىك سالاھىيىتى بىلەن يېتەكچىلىك قىلىپ «قۇمۇل ئون ئىككى مۇقام» نى بەش شەھەر، ئون ئىككى تاغدىكى پۇراقلىرى ھەم ئورتاقلاشقان، قېلىپلاشقان، شەكلىدە كۇرسانتلارغا يەتكۈزدى، 2008-يىلى شىنجاڭ خەلق رادىيو ئىستانسسى بىلەن قۇمۇل ناخشا-ئۇسسۇل ئۆمىكى بىرلىشىپ «قۇمۇل ئون ئىككى مۇقامى» نى لېنتىغا ئېلىشتا مەخمۇت ئابلىز مۇزىكا يېتەكچىسى ۋە مۇزىكا تەھرىرلىكىگە تەكلىپ قىلىندى. ئۇ ھاردىم –تالدىم دېمەستىن، بىر تەرەپتىن نوتا يېزىپ، بىر تەرەپتىن ئۆگەتتى ھەم ئۆزىمۇ مۇزىكا چېلىش، مۇقام ئېيتىشقا قاتنىشىپ «قۇمۇل ئون ئىككى مۇقامى» لېنتىسىنىڭ سۈپەتلىك چىقىشىغا يەنە بىر كىشىلىك ھەسسە قوشتى.
مەخمۇت ئابلېز قۇمۇل ۋىلايەتلىك ناخشا-ئۇسسۇل ئۆمىكىنىڭ سەنئەتكارلىرى بىلەن بىللە
2006-يىلى ئەركىن كېرەم بىلەن بىرلىشىپ قۇمۇل خەلق ناخشىلىرىدىن «ئايخېنىم سۈزۈك چىراي»، «بىدەرت داغەي»، «ئەي يار»، «يار سېنىڭ قەلەندەرىڭ بولاي» ...قاتارلىقلارنى رادىيو ۋە تېلېۋىزىيە ئارقىلىق كەڭ جامائەتچىلىككە سۇندى. شۇنداقلا يېقىندا مەخمۇت ئابلىزنىڭ ئىجراسىدىكى «قۇمۇل مۇقاملىرىدىن ئارىيە»، «شاھ يىگىت» ناملىق پىلاستىنكىنى ئىشلەپ كۆرۈرمەنلەرنىڭ ھۇزۇرىغا سۇندى. مەخمۇت ئابلىز ياخشى بىر سەنئەتكار بولۇپلا قالماي، يەنە مۇنەۋۋەر ئاتا، ھازىر يېقىملىق ناخشىلىرى بىلەن رايونىمىز ئىچى ۋە سىرتىدا ھەتتا چەت ئەللەردىمۇ تونۇلغان سودىيەئاي مەخمۇت تەلەپچان ئاتىنىڭ كۆڭۈل قويۇپ پەرۋىشلىگەن پەرزەنتلىرىنىڭ بىرى.
پائالىيەت مەيدانىدىن كۆرۈنۈش
مەخمۇت ئابلىز ئاكىنىڭ كۈيۈئوغلى مەۋلان ناخشا ئېيتماقتا
مەخمۇت ئابلىز ئاكىنىڭ قىزى سودىيەئاي مەخمۇت ناخشا ئېيتماقتا
مەخمۇت ئابلىز ئانىسى بىلەن
شىنجاڭ خەلق رادىيو ئىستانسسى 107.4 سەنئەت رادىيوسىنىڭ باش نازارەتچىسى، ئۇيغۇر رادىيو درامىچىلىق ساھەسىدىكى تۆھپىكار سىنارىست، رېژىسسور ھەجەرگۈل قاسىم سۆز قىلدى
«شىنجاڭ مەدەنىيىتى» ژۇرنىلىنىڭ دائىمىي ئىشلارغا مەسئۇل مۇئاۋىن باش مۇھەررىرى، ژۇرنالىست، شائىر، نەسىرچى، مەملىكەتلىك ئاز سانلىق مىللەتلەر ئەدەبىياتىدىكى ئەڭ يۇقىرى مۇكاپات-جۇڭگو تۇلپار مۇكاپاتىنىڭ ساھىبى بەگمەت يۈسۈپ ئەپەندى سەنئەتكار مەخمۇت ئابلىزغا بېغىشلانغان شېئىرنى ئوقۇماقتا
داڭلىق كىيىم لايىھەلىگۈچى خانىش ھاپىز ئۆزى تەييارلىغان توننى مەخمۇت ئابلىز ئەپەندىمگە سوۋغا قىلدى
مەخمۇت ئابلىز ئاكىنىڭ سىڭلىسى يۈرەك سۆزلىرىنى ئېيتماقتا
مەنبە: تەڭرىتاغ تورى.
| 
يوللىغان ۋاقتى 
يوللىغان ۋاقتى 
