ئەي قىز
(2)
مەخمۇت ئاۋۇت(مۇزاتى)
پەرىلەر پەرىسى-ئايجامال ئەي قىز،
كېلىدۇ زوقۇم بولغاچ غۇبارسىز؛
پەخرىمسەن مىللىتىم-ئاۋامنىڭ ئەي قىز،
ھاياتلىق يولىدا قالدۇرغاچ پاك ئىز.
زىممەڭگە يۈكلەنگەن بۇرچۇڭ مۇقەددەس،
كەلگۈسى ئانىسەن، بۈيۈكسەن پەۋەس؛
لايىقتۇر تەرىپلەش، قامچىلاش ئەمەس،
گەر ئېزىپ شەيتانغا قىلمىساڭ ھەۋەس.
قۇياشتەك چېھرىڭگە باققاندا كىشى،
جېنىغا جان قوشار ياققاچقا ئىشى؛
پاك شەرمى-ھايادىن يۇقار تەشۋىشى،
شادلىنار بارچە دىل بولۇپ قۇردىشى.
كۆز تېگىپ كەتمىسۇن پاكلىق جىسمىڭغا،
داغ چۈشۈپ قالمىسۇن گۈلدەك ئىسمىڭغا؛
چۈشمىسۇن ھەم كۈيە كەڭرى رىسقىڭغا،
تىلەيمەن چىن ئىنساپ سەبىي دىلىڭغا.
پارلىقىڭ-ھۆرمىتىڭ، ئاۋامنىڭ بەختى،
غۇرۇرۇڭ-ۋىجدانىڭ ئۇ تاجۇ-تەختى؛
ئەخلاقىڭ كۆتۈرەر ئەلنىڭ ھۆرمىتى،
بولغۇسى سەن بىلەن يۇرتۇم جەننىتى.
سۆيۈنەر ئەل دىلى سېنىڭدىن ئەي قىز،
تەرىپلەر، ماختىشار بولغاچ پەخرىمىز؛
ئەل گۈلى-زىننىتى، ئۈمۈدى ئەي قىز،
ئاداشما، ئۆڭمىگىن يولۇڭدىن ھەرگىز.
شېئىرىنىڭ ئاپتورى: باي ناھىيىسىدىن: مەخمۇت ئاۋۇت(مۇزاتى)
2012-يىل 6-ئاينىڭ 2-كۈنى(باي)
يوللىغان ۋاقتى 
