چىۋىن ساناش خادىمى قوبۇل قىلىنىدۇ (مۇئەللىم)
ئالدىنقى كۈنى ئېلان قىلىنغان بېيجىڭ شەھەرلىك شەھەر مۇھىتى كومىتېتى ئېلان قىلغان "ئاممىۋىي ھاجەتخانىلارنى باشقۇرۇش مۇلازىمەت ئۆلچىمى" بەس - مۇنازىرە قوزغىدى. چۈنكى "ئۆلچەم"دە ئاممىۋىي ھاجەتخانىلاردىكى چىۋىن سانىنىڭ ئىككىدىن ئاشماسلىقى بەلگىلەنگەن ئىدى.
"قېلىپلاشتۇرۇش"، "تەرتىپكە سېلىش" دېسە ھەدىدىن ئاشۇرىۋېتىدىغان، "دوپپىسىنى ئال دېسە بېشىنى كېسىدىغان" رەڭۋاز، شەكىلۋاز كىشىلەرنىڭ ئويلاپ تاپقان تۈزۈملىرىنى قاراڭ. دېمىسەممۇ ھەممە كىشى بىلىدىغۇ، بۇ چىۋىن دېگەن نىجىسنىڭ قانىتى بار، قەيەردە مەينەتچىلىك بولسا شۇ يەرگە خالىغانچە ئۇچۇپ بارىۋېرىدۇ. يا ئۇلارغا ئۆچېرەت بەلگىلەپ، ئارخىپ تۇرغۇزۇپ ھەر بىر ھاجەتخانىغا ئىككىدىن تەقسىملەپ قويغىلى بولمىسا. قائىدە - تۈزۈمنى ھەرقانچە يوغان يېزىپ ھاجەتخانىغا چاپلاپ قويغان بىلەنمۇ يا چىۋىنلەر خەت تونىمىسا، قانداق قىلىپ ھەر بىر ھاجەتخانىدىكى چىۋىن سانىنى ئىككىدىن ئاشۇرماي كونترول قىلغىلى بولسۇن؟ شۇنداقمۇ قاملاشمىغان تۈزۈم بولامدۇ؟ بۇنى قانداقمۇ ئىجرا قىلغىلى، ئەمەلىيلەشتۈرگىلى بولسۇن؟
نېمىلا دېگەن بىلەن تۈزۈم دېگەن تۈزۈمدە؟ ئىجرا قىلماي نېمە ئامال دەيسىز؟ شۇڭا مەزكۇر ئۇقتۇرۇشنى چىقاردۇق.
چىۋىن ساناش خادىمى قوبۇل قىلىنىدۇ!
شەھىرىمىزدىكى ھاجەتخانىلارنىڭ مۇھىتىنى ياخشىلاش ئۈچۈن مەخسۇس چىۋىن ساناش خادىمى قوبۇل قىلىنىدۇ. خىزمەت ۋەزىپىسى ھاجەتخانىلاردىكى چىۋىنلەرنىڭ سانىنى ئىككىدىن ئاشۇرماسلىق. ناۋدا بىر ھاجەتخانىغا بىرلا ۋاقىتتا ئىككىدىن ئارتۇق چىۋىن كىرىۋالسا ئۇلارغا نەسىھەت قىلىپ ئارتۇقىنى چىقىرىۋېتىش، نەسىھەتكە قۇلاق سالمىغان چىۋىنلەرنى مۇناسىۋەتلىك ئورۇنلارنىڭ بىر تەرەپ قىلىشىغا تاپشۇرۇپ بېرىش.
ئېلان چىقىرىلغان كۈندىن باشلاپ 10 كۈن ئىچىدە مۇناسىۋەتلىك كىنىشكىلەرنى ئېلىپ ھاجەتخانىمىزغا كېلىپ تىزىمغا ئالدۇرۇڭ. (خىزمەت تەجرىبىسى بارلار ئالدىن ئويلىشىلىدۇ)
يوللىغان ۋاقتى 2012-5-25 02:29:19
{:158:
