ئەسسالامۇ ئەلەيكۇم مۇنبەر ئەھلى، ھەممىڭلەرگە كەمىنە سادادىن ئوتلۇق سالام! ئۇزۇن ۋاقىت بوپتۇ مەلۇم ئىشلار سەۋەبىدىن مۇنبەرگە قەدەم باسمىغىلى، مانا ھازىر كىرىپ قارىسام نۇرغۇن ئادەملەرنى تونۇيالمىدىم، يېڭىدىن تىزىملىتىپ ئەزا بولۇپ كىرگەن تورداشلار كۆپىيىپتۇ، مۇنبەردە ياخشى، مەنىلىك، كىشىگە بىلىم بېرەلەيدىغان تېمىلار كۆپىيىپتۇ، مەن بۇنىڭدىن ناھايىتى خۇشال، شۇنداقلا بۇنىڭدىن كېيىن، تورداشلار بىلەن داۋاملىق تەڭرىتاغ مۇنبىرىدە ئۆز ئارا پىكىر ئالماشتۇرۇپ، يېڭى ئۇقۇم، يېڭى بىلىملەرنى تەڭ ئۆگىنىپ، ئورتاق تەرەققىي قىلىشنى خالايمەن. بۈگۈن قايتا كىرگەنكەنمەن مەنمۇ بىكار كىرمىدىم ئەلۋەتتە، سىلەرگە يېقىندا كۆرگەن-ئاڭلىغانلىرىمدىن ئېلىپ كەلدىم، كەڭ مۇنبەرداشلارنىڭ تۆۋەندىكى تېمام ئۈستىدە ئورتاق پىكىرلىشىشىنى ئۈمىد قىلىمەن.
شىنجاڭ پۇتبولچىلىقى كەمسىتىلىشكە ئەمەس، قوللاشقا مۇھتاج
-قارىمامسەن ئاداش، شۇنچە ئۇزۇن يولنى بېسىپ مۇسابىقە كۆرگىلى بارسام، شۇ بارغىنىمغا تۇشلۇق بىر توپ سولىيالمىدى ئەمەسمۇ ؟ ئەمدى ئىككىنچى بارمايمەن ئۇنداق پىسپاس مۇسابىقىنى كۆرگىلى...
-بىز دىگەن ئۇيغۇر، ئۇيغۇرنى بىلىسەن، دەسلەپ ئاتتەك چاپىمىز، كەينىدىن ئوق تەگكەندەك ياتىمىز، شۇ ياتقانچە توپىغا كۆمۈلۈپ كېتىمىز، 35 مىڭ تاماشىبىن بار مەيداندا بىر توپ سولىيالماي، ئۇنىڭدىن كۆرە دادا-ئاپىسىغا ياردەملىشىپ ئېتىزدا كەتمەن چاپسىچۇ...
-شۇنى دېمەمسەن ئاداش، بولدى ئىككىنچى كەلمەيمىز...
بۇ گەپ-سۆزلەرنى ئاڭلاپ ئىچىمنى ئاچچىق يۇتتى. 12-ماي چۈشتىن كېيىن ئۈرۈمچى ئەرگۇڭ تەنتەربىيە مەيدانىدا شىنجاڭ تاشئالما كوماندىسى بىلەن تيەنجىن پاراۋۇز كوماندىسى مۇسابىقىگە چۈشتى. بۇ مۇسابىقىنى تۆت يىلدىن بۇيان زارىقىپ كۈتكەن شىنجاڭلىقلار 12-ماي شىنجاڭ كوماندىسىنىڭ مۇسابىقىسىنى كۆرۈپ، ماھىرلارغا مەدەت بېرىش ئۈچۈن ئارىلىقنى يىراق كۆرمەي ئەرگۇڭ تەنتەربىيە مەيدانىغا بېرىپ مۇسابىقە كۆرۈپ ، جۇڭگو ب دەرىجىلىكلەر بىرلەشمە مۇسابىقىسىدىكى ئەڭ كۆپ تاماشىبىن رېكورتىنى يېڭىلىدى. شۇ كۈنى 35 مىڭ پۇتبول مەستانىسى گۈلدۇراس ئالقىش سادالىرى ئىچىدە << ھۇررا>> توۋلاپ، مۇسابىقە كەيپىياتىنى ئەڭ يۇقىرى پەللىگە كۆتۈردى. شۇنچە كۆپ پۇتبول مەستانىلىرىنىڭ مەدەت بېرىشى مەيداندا ئاكتىپ ھۇجۇم قوزغاپ ئويناۋاتقان شىنجاڭ كوماندىسىنى سەل تەمتىرىتىپ قويغان بولغاچقا 90 مېنۇتلۇق مۇسابىقىدە ئىككى تەرەپ بىرمۇ توپ كىرگۈزەلمەي تەڭلىشىپ قالدى.
مۇسابىقە ئاياغلاشقاندىن كېيىن مەن يۇقىرىدىكى گەپ-سۆزلەرنى ئاڭلاپ قالدىم. بەزىلەر توغرا چۈشەنگەن بولدى، بەزىلەر يەنە ئاغزىغا كەلگەننى دەۋەردى. لېكىن ئويلاپ باقسام، ئاشۇ ئاغزىغا كەلگەننى دەۋەرگەنلەرگە بىز رەددىيە بېرىپ تۇرمىساق قەتئىي بولمايدىكەن. بولمىسا بىزنىڭ ئەمدى بىخ سۈرۈۋاتقان شىنجاڭ پۇتبولچىلىقىنىڭ تەرەققىياتى بىخ ھالىتىدىلا ئۇجۇقۇپ كېتىشى مۇمكىن.
بەلكىم نۇرغۇنلىغان تورداشلار مەركىزىي تېلېۋىزىيە ئىستانىسى 5-قانىلى << پۇتبول كېچىسى>> پروگراممىسىدا بەرگەن << مانا بۇ شىنجاڭ >> ناملىق قىسقا فىلىمنى كۆرگەن بولۇشى مۇمكىن. شۇ قىسقا فىلىمدا بىزنىڭ پۇتبول ئەزىمەتلىرىمىزنىڭ زىيارىتى ھەممەيلەننىڭ دىققىتىنى تارتىدۇ. ئۇلار شۇنداق دېدى:بىزگە 3000-4000 يۈەن پۇل بولسا يېتىدۇ، بىز شۇ پۇل بىلەن ئاتا-ئانىمىزنى رازى قىلساق، ئۇلارنىڭ ئۈمىدىنى ئاقلىساق بىزگە شۇ كۇپايە. ئويلاپ بېقىڭلار قېرىنداشلىرىم، ياخشىراق ئويلاپ بېقىڭلار، چەت ئەللەردە بولسۇن، ياكى ئىچكىرى ئۆلكىلەردە بولسۇن، مۇشۇ پۇتبول ئەزىمەتلىرىمىزگە ئوخشاش پۇتبولچىلار نەچچە مائاش ئېلىپ توپ تېپىۋاتقاندۇ؟ بىز نۇرغۇن پۇتبولچىلارنىڭ ئىقتىسادىي كىرىم سەۋەبىدىن توختامنى بىكار قىلغانلىقى توغرىسىدا خەۋەرلەرنى ئاڭلاپ تۇرىمىز، ئەمما بىزنىڭ پۇتبولچىلىرىمىزچۇ؟ ئۇلارغا پۇل مۇھىم ئەمەس، بەلكى پۇتبول مۇھىم. بەلكىم دېگەن بىر گېپىنى ئاڭلىغان بولۇشۇڭلار مۇمكىن، بىز مۇشۇنداق توپ ئويناپ كېيىنكىلەرگە يول ئېچىپ بەرمەكچى! بۇ نېمىدىگەن ئالىيجاناپ روھ ھە ! بۇ ئەنە شۇ 17-18 ياشلىق 90-يىلدىن كېيىن تۇغۇلغان بالىلارنىڭ ئېيتقان سۆزلىرى. ئۇلارمۇ ئۆزىنىڭ يېشىغا نىسبەتەن تېخى ياش. لېكىن ئۇلارنىڭ ئويلاۋاتقىنى ئۆزى قانچە جاپا تارتسىمۇ، ئىقتىسادىي كىرىم يارىتالمىسىمۇ، مەملىكىتىمىزگە، دۇنياغا داڭلىق پۇتبول چولپىنى بولۇپ كېتەلمىسىمۇ كېيىنكىلەرگە بىر چىقىش يولى تېپىپ بېرىش، شىنجاڭ پۇتبولچىلىقىنى تەرەققىي قىلدۇرۇش ئۈچۈن ئۆزىنى بېغىشلاش روھى !
مانا مۇشۇنداق شارائىتتا، بىزنىڭ ئۇلاردىن ئاغرىنىشقا يەنە نېمە سەۋەبىمىز بار؟ پۇتبول مەيدانىدا يېڭىش-يېڭىلىش بولۇپ تۇرىدۇ، لېكىن ھېچقانداق بىر پۇتبول مەستانىسى ئۆزى خالاپ << ھۇررا >> توۋلىغان پۇتبول كۇلۇبىنىڭ ئارقىسىدىن گەپ تاپمايدۇ دوستلار، شۇڭا مەيلى شىنجاڭ كوماندىسى ياخشى نەتىجىلەرنى قازانسۇن ياكى مۇسابىقىدە ئۇتتۇرسۇن، بىز باشتىن ئاخىر ئۇلارغا مەدەت بېرىش، قوللاش پوزىتسىيەسىدە بولايلى! چۈنكى شىنجاڭ پۇتبولچىلىقى كەمسىتىشكە ئەمەس، قوللاشقا مۇھتاج !
يوللىغان ۋاقتى 2012-5-22 11:17:52
