«مايلامچى مەمۇرلارغا مەدھىيە!»(مۇئەللىم)
"جۇڭگو ياشلار گېزىتى" 2012 - يىلى 5 - ئاينىڭ 21 - كۈنى خەۋىرى.... 2012 - يىلى 5 - ئاينىڭ 15 - كۈنى شېنجېن شەھىرىگە بىۋاستە قاراشلىق ئورگانلاردىن 8000 نەپەردىن ئارتۇق دۆلەت مەمۇرى كوچىغا چىقىپ ھەقسىز ئاياق مايلاش، چاچ ياساش، رىمونتچىلىق ... قاتارلىق خەلققە نەپ يەتكۈزۈش پائالىيىتى ئېلىپ بېرىپ ئاممىنىڭ ئالقىشىغا ئېرىشتى..... توۋا دەيمەن! 8000 نەپەر دۆلەت مەمۇرى خىزمەت كۈنىدە خىزمەت ئورنىدا ئولتۇرۇپ ئىش بېجىرمەي، كوچىغا چىقىپ مايلامچىلىق ۋە ساتىراچلىق قىلسا خىزمەت ۋاقتىدا خىزمەت ئورنىدا ئولتۇرماي نۇرغۇن ئىشقا دەخلى يەتكۈزۈش مەسئۇلىيىتى سۈرۈشتۈرۈلمەستىن ئەكسىچە پۈتكۈل مەتبۇئاتلاردا ئېلان قىلىپ، ئۆزىنى كۆرسىتىشنى زادى نېمە دەپ چۈشەندۈرۈگۈلۈك؟
ئادەتتە كوچىغا چىقىپ ساتىراچلىق ۋە رىمونتچىلىق قىلىش تۈگۈل تامنىڭ تۈۋىدىكى 1 كۋادرات مېتىرلىق ئورۇننى ئىگەللەپ مايلامچىلىق قىلسا قوغلاپ سۈر توقاي قىلىۋېتىدىغان شەھەر باشقۇرۇش ئەترىتىدىكىلەر نەگە كەتكەندۇ؟
بىز مەسىلىلەرگە ھۆكۈم قىلىشتا ئىقتىسادىي ۋە ئىجتىمائىي ئۈنۈمىگە ئاساسەن ھۆكۈم قىلىپ ئادەتلەنگەن. بىز يەنە شۇ بويىچە بۇ مەسىلىگە ھۆكۈم قىلىپ باقايلى.
1. ئىقتىسادىي ئۈنۈم
خەۋەردە ئالاھىدە تىلغا ئېلىنغان گۇاڭ نىڭ خۇ ئىسىملىك بىر مەمۇر 8 جۈپ ئاياق مايلىغان. بىر جۈپ ئاياغنىڭ مايلاش ھەققىنى 3 يۈەندىن ھېساپلىساق يېرىم كۈندە خەلق ئۈچۈن 24 يۈەنلىك ئىش قىلىپ بەرگەن بولىدۇ. شېنجېن شەھىرىنىڭ مەمۇرىلارنىڭ ئايلىق ئوتتۇرىچە مۇئاشى 7 -8 مىڭ ئەتراپىدا. شۇ بويىچە ھېساپلىغاندا يېرىم كۈنلۈك مۇئاشى 150 يۈەندىن ئاشىدۇ. 150 يۈەن ئېلىپ 24 يۈەنلىك ئىش قىلىپ بەرسە .....
دېمەك بۇ پائالىيەتنىڭ ئىقتىسادىي ئۈنۈمى مەۋجۇت ئەمەس.
2. ئىجتىمائىي ئۈنۈمى
8000 نەپەر مەمۇر شۇ يېرىم كۈن ۋاقىت ئىچىدە ئۆز خىزمەت ئورنىدا ئولتۇرۇپ، ئىللىق چىراي ۋە يۇقىرى قىزغىنلىق بىلەن ئىش بىجىرگىلى كەلگەنلەرنىڭ ئىشىنى بىجىرىپ، ئىش بىجىرىشتە قىيىنچىلىق ياكى ئاۋارىچىلىققا يولۇققانلارغا ياردەم قىلغان بولسا مېنىڭچە ئەلۋەتتە بۇ ئاياق مايلاپ ۋە ياكى ساتىراچلىق قىلغانغا قارىغاندا تېخىمۇ ئەھمىيەتلىك بولغان بولاتتىغۇ دەيمەن.
ئەمدى بىز مەزكور پائالىيەتنىڭ دۆلەتكە ۋە جەمىئىيەتكە ئېلىپ كەلگەن زىيىنى توغرىسىدا تەھلىل يۈرگۈزۈپ باقايلى.
1. شېنجىن شەھىرىدە مايلامچىلىق، ساتىراچلىق، رىمونتچىلىق بىلەن كۈن ئېلىپ جان بېقىۋاتقان، ئائىلىسىنى قامداۋاتقان نۇرغۇن كىشىلەر بار ئىدى. 8000 نەپەر مەمۇر مەزكۇر پائالىيىتى شۇ كىشىلەرنى يېرىم كۈنلۈك تاپاۋەتتىن ئايرىدى. ئايىقىنى ھەقسىز مايلىتىۋالغان كىشىلەر ئۈچۈن بۇ ھېچقانچە چوڭ ياردەم ئەمەس، ئەمما مايلامچىلىق بىلەن جان بېقىۋاتقان كىشىلەر ئۈچۈن بۇ بىر چوڭ زەربە، يەنى بۇ ئۇلارنىڭ بىر كۈن ئاچ قېلىشىدىن دېرەك بېرىدۇ.
ئەجىبا بۇ مەمۇرلار بۇنى پەقەتلا ئويلىمىغانمىدۇ؟
2. مەزكۇر پائالىيەت ئۈچۈن مەمۇرلارغا مەخسۇس كۆك رەڭلىك مۇلازىمەت كىيىمى سەپلەپ بېرىلگەن. بۇ يېرىم كۈنلۈك پائالىيەت ئۈچۈن 8000 قۇر كىيىم سېتىۋېلىندى دېگەنلىك. بىر قۇر كىيىمنى 100 يۈەندىن ھېساپلىساقمۇ بۇ 800 مىڭ يۈەن بولىدۇ دېگەن گەپ. بۇ پۇل قەيەردىن كەلگەن؟ ئەلۋەتتە دۆلەت مالىيىسىدىن يەنى پۇقرالار تاپشۇرغان باجدىن چىقىم قىلىنىدۇ. پۇقرالار تاپشۇرغان باجدىن 800 مىڭ يۈەن سەرپ قىلىپ پۇقرالار ئۈچۈن زادى قانچە پۇللۇق ئىش قىلىپ بېرىلدى؟
سەمىمىي تەكلىپ:
ھۆرمەتلىك مەمۇرلار، زادى خەلق ئۈچۈن خىزمەت قىلىش، خەلق ئۈچۈن ياخشى ئىش قىلىپ بېرىش نىيىتىڭلار بولسا ئۆز خىزمەت ئورنۇڭلاردا ئاكتىپلىق بىلەن ياخشى ئىشلەپ، ئىللىق چىراي، كىچىك پىئېل بولۇپ ئىش بىجىرگىلى كەلگەنلەرنىڭ قىيىنچىلىقىنى ھەل قىلىشىغا قولۇڭلاردىن كېلىشىچە ياردەم بېرىڭلار. خەلق سىلەردىن مىننەتدار بولىدۇ.
مۇشۇنداق پائالىيەتلەرگە سەرپ قىلىنىدىغان چىقىملارنى تېجەپ ئاپەتكە ئۇچرىغان رايۇنلارغا ئىئانە قىلىڭلار.
مايلامچى، ساتىراچ ۋە رىمونتچىلارنىڭ ئىشىنى تارتىۋالماي ئەكسىچە پات پات ئايىقىڭلارنى مايلىتىپ، چېچىڭلارنى ياسىتىپ ... تۇرۇڭلار. شۇندىلا شۇ ئەمگەكچىلەر سىلەردىن مىننەتدار بولىدۇ.
شۇندىلا مەنمۇ ھەم سىلەرگە ھەقىقى مەدھىيە ئوقۇيمەن.
يوللىغان ۋاقتى 2012-5-22 03:14:40
يوللىغان ۋاقتى 2012-5-22 10:23:27
