تىلىمىزنىڭ مۇكەممەللىكىنى قوغدايلى

akbulak$

	تىل ئالاقىلىشىش قۇرالى،شۇنداقلا مىللەتنىڭ مەدەنىي مىراسى ھەم ئەۋلادلارنىڭ راۋاجى.ھەرقانداق بىر مىللەت ئۆز تىلىنىڭ،ئۆز يېزىقىنىڭ بولغانلىقىدىن پەخىرلىنىدۇ ۋە زوقلىنىدۇ.مىللەتنىڭ راۋاج تېپىشى تىلنىڭ تاكاممۇللىشىشىدىن دېرەك بېرىدۇ،ئۇنداقتا بىزنىڭ تىلىمىز راستىنلا تاكاممۇللاشتىمۇ؟ تىلىمىزنىڭ ھازىرقى ئەھۋالىدىن ئالغاندا،بىزدە ئەبجەش سۆز-جۈملىلەر كۆپىيۋاتىدۇ.بۇ تىل جەھەتتىكى <<يامان سۈپەتلىك كېسەل>>بولۇپ،بۇنىڭ ئالدىنى ئالماي بولمايدۇ،ئەلۋەتتە.بىر قىسىم ئادەملىرىمىز مەيلى ئۆزئارا سۆھبەتتە،سورۇنلاردا بولسۇن ياكى ئۆي پاراڭلىرىدا بولسۇن،مەقسەت-مۇددئالىرىنى ئۆز ئانا تىلى بولغان ئۇيغۇر تىلىدا تولۇق،ئېنىق ئۇقتۇرغىلى ،ئىپادىلىگىلى بولسىمۇ،نېمىشقىدۇر سۆزلەرنى باشقىچە ئاھاڭدا قوللىنىپ كېلىۋاتىدۇ.ئەگەر بۇنداق ئەھۋالنى ۋاقتىدا تۈزەتمەي،مۇشۇنداق كېتىۋەرسەك،شەك-شۈھبىسىزكى،كېلەچەككە<<شالغۇتلاشقان سورتلۇق>>ئەۋلادلارنى تەربىيلەپ چىقىمىز،شۇنىڭ بىلەن جەمئىيەتتە تىلى ساپ بولمىغان،تىلى چالاشتۇرۇلغان بىر مىللەت پەيدا بولىدۇ-دە،زامانداش بولۇپ ياشاۋاتقان مۇشۇ دەۋر ئۇيغۇرلىرىمىز كەلگۈسى ئەۋلادلار ئالدىدا ئانا تىلىغا بولغان مەسئۇليەتسىزلىكىمىز بڭلەن كۆتۈرگۈسىز ئىزا-ئاھانەتكە قالىمىز.   ھەرقانداق بىر مىللەت كىشىسى ئۆز ئانا تىلىغا بولغان مېھرى مۇھببەتنى ئۇنتىماسلىقى كېرەك.ھازىر بەزى كىشىلىرىمىز مەيلى نەرسىلەرنىڭ نامى بولسۇن،مەيلى يەر-جايلارنىڭ نامى،ئىدارە-جەمئىيەتلەرنىڭ نامى،دورا،ھايۋان،ئۆسۈملىكلەرنىڭ نامى بولسۇن ۋە ياكى سۆز-ئاتالغۇلار بولسۇن،ئۇلارنى قېلىپلاشقان،بىرلىككە كەلتۈرۈلگەن ناملىرى بىلەن ئەمەس،بەلكى خەنزۇ تىلىنىڭ ئاھاڭى بويىچە ئاتاپ،جاپاكەش،مېھنەتكەش،ئانا تىل ئۈچۈن ئۆز بارلىقىنى بېغىشلاۋاتقان تىلشۇناسلارنىڭ ئەمگىكىنى ھۆرمەت قىلماي كەلمەكتە.مەسىلەن:گاڭبىرىڭنى(قەلىمىڭنى)ئىشلىتىپ تۇراي؛دوختۇرلار بالاڭ چۆگەي(كالىتسىي كەملىك)بولۇپ قاپتۇ دەيدۇ؛خۇڭچىلۇغا(قىزىل بايراق يولىغا)بېرىپ دەنناۋ(كومپېيوتېر)بازىرىنى كۆرۈپ كېلىمەن.........يەنى بەزى خاس ئاتالغۇلىرىمىز يوقاپ كېتەي دەپ قالدى. بىز ئىلگىرى چىشى بۇغىنى<<مارال>>،چىشى كالىنى<<ئىنەك>>،چىشى قوينى<<ساغلىق>>،توخۇنى<<مىكيان>>،چىشى ئۆدەكنى<<بەرچىن>>دەپ ئاتايتۇق.....بۇ سۆزلەر كىشىلەرنىڭ شەھەرلىشىشىگە ئەگىشىپ تاشلىنىپ قېلىۋاتىدۇ..........   ئاخىرىدا تەكىتلەيدىغىنىمىز شۇكى،بىزنىڭ تىلىمىز مەۋجۇدلۇقىمىزنىڭ بەلگىسى،بىزنىڭ پەخرىمىز.شۇڭا،ھەممىمىز تىلىمىزنىتوغرا ھەم ساپ تەرەققىي قىلدۇرۇشقا ئىنتىلىشىمىز،ھە دېسىلا ئەبجەش سۆز-جۈملىلەرنى ئىشلىتىشتىن ساقلىنىشىمىز،تەرجىمان ۋە زىيالىلىرىمىز بۇ جەھەتتە تېخىمۇ ئەستايىدىل بولۇپ،ئۆز ئانا تىلىمىزنىڭ پاساھىتىنى تېخىمۇ جۇلالاندۇرۇپ،ئەۋلادلىرىمىزغا ئۇنى مۇكەممەل يەتكۈزۈشكە تېگىشلىك تۆھپە قوشۇشىمىز كېرەك.ئەۋلادلار ئالدىدا گوناھكار بولۇپ قالماسلىق ئۈچۈن ئەجداتلىرىمىزدىن قالغان ئانا تىلىمىزنى قوغداش ۋە تېخىمۇ مۇكەممەللەشتۈرۈش ھەممىمىزنىڭ بۇرچى!         <<تىل ۋە تەرجىمە>>2006-يىل4-سانىدىن

barquk

	توغرا گەپلەركەن ، ھەقىقەتەن تىلىمىزنىڭ مۇكەممەللىكىنى ئۆزىمىز ساقلىمىساق باشقىلار بىزگە ساقلىشىپ بەرمەيدۇ !

harsan

	توغرا دەيسىز! ئانا تلىمىزنىڭ ھۆرمىتىنى ئۆزىمىز قىلماي تۇرۇپ ،باشقىلاردىن رەنجىشكە ھەققىمىز يوق.

VESAL

	بىر قىسىم ئاتا ــ ئانىلار ئۆزىنىڭ ئۇيغۇرلىقىنى ئۇنتۇپ، ھەتتا باللىرى بىلەن خەنزۇچە سۆزلىشىپ كىتىدۇ تىخى.

سەرتۇغ

	ياخغى يېزىلغان ئەھمىيەتلىك تىما بوپتۇ..

munawar

	ئەھمىيەتلىك تىما ئىكەن بۇ ئىشتا ھەممەيلەن ئۈزىمىزدىن باشلىشىمىز كىرەك

yadikar618

	تىلىمىزنى قوغداش ھەربىر ئۇيغۇرنىڭ مەجىبۇرىيىتى،بۇنى بۇزۋاتقانلار ،يەنىلا ئۇيغۇرزىيالىلىرى.

Erkman

	تىلىمىزنى  قوغداشتا  ئىملاغا سەل قاراشقىمۇ  قەتئىي بولمايدۇ!